ମୁମ୍ବାଇ: ବଲିଉଡ୍ ଅଭିନେତା ଅର୍ଶଦ ଓ୍ବାରସି ଓ ଭୂମି ପେଡନେକରଙ୍କ ବହୁ ପ୍ରତିକ୍ଷୀତ ଫିଲ୍ମ ‘ଦୁର୍ଗାମତି’ର ଟ୍ରେଲର ବୁଧବାର ରିଲିଜ୍ ହୋଇଛି। ଏହାକୁ ଅମାଜନ ପ୍ରାଇମ୍ ଭିଡିଓ ଇଣ୍ଡିଆର ୟୁଟ୍ୟୁବ ଚ୍ୟାନେଲରେ ରିଲିଜ୍ କରାଯାଇଛି। ଏହି ଟ୍ରେଲର ୩ମିନିଟ୍ ୨୦ ସେକେଣ୍ଡର। ଟ୍ରେଲରକୁ ଦେଖିଲେ ଫିଲ୍ମର ପୁରା କାହାଣୀ ସ୍ପଷ୍ଟ ହୋଇପାରି ନ ଥିବା ବେଳେ କିନ୍ତୁ ଏହା ବେଶ୍ ରୋମାଞ୍ଚକର ହୋଇଛି। ଏଥିରେ ଭୂମିଙ୍କ ଭିନ୍ନ ଲୁକ୍ ଓ ଭୟାନକ ରୂପ ଦେଖିବାକୁ ମିଳିଛି। ବଲିଉଡ୍ ଖିଲାଡ଼ି ବୟ ଅକ୍ଷୟ କୁମାର ନିଜ ଟୁଇଟରରେ ଏହି ଟ୍ରେଲରକୁ ଶେୟାର କରିଛନ୍ତି। ଏଥିସହ କ୍ୟାପସନ୍ରେ ଲେଖିଛନ୍ତି, ତା’ର କ୍ରୋଧରୁ କେହି ବର୍ତ୍ତିପାରିବେ ନାହିଁ। ସୂଚନାଯୋଗ୍ୟ, ଜି ଅଶୋକଙ୍କ ନିର୍ଦ୍ଦେଶିତ ଏହି ଫିଲ୍ମଟି ହେଉଛି ୨୦୧୮ର ତାମିଲ ଓ ତେଲଗୁ ଫିଲ୍ମ ‘ଭାଗମତି’ର ରିମେକ। ଏହି ଅରିଜିନାଲ ଫିଲ୍ମର ନିର୍ଦ୍ଦେଶନା ମଧ୍ୟ ଜି ଅଶୋକ ଦେଇଥିଲେ। କିନ୍ତୁ ଏଥିରେ ଅନୁଷ୍କା ଶେଟ୍ଟୀ ମୁଖ୍ୟ ଚରିତ୍ରରେ ନଜର ଆସିଥିଲେ। ହେଲେ ଦୁର୍ଗାମତିରେ ଅଭିନେତ୍ରୀ ଭୂମି ପେଡନେକର ଜଣେ ଆଇଏଏସ୍ ଅଫିସର ବା ମୁଖ୍ୟ ଚରିତ୍ରରେ ନଜର ଆସିବେ। ଏହି ଫିଲ୍ମ କିଛି ରାଜନେତାଙ୍କ ଉପରେ ଆଧାରିତ ହୋଇଛି। ଯେଉଁଥିରେ ଜଣେ ଭଲ ରାଜନେତାଙ୍କୁ ଫସାଇବାକୁ ଷଡ଼ଯନ୍ତ୍ର କରାଯାଉଥିବା ଦେଖିବାକୁ ମିଳିବ। ଏହାର ଟ୍ରେଲରକୁ ଦେଖିବା ପରେ ବହୁ ଉତ୍ସାହର ସହ ଫିଲ୍ମର ରିଲିଜ୍କୁ ଅପେକ୍ଷା କରିଛନ୍ତି ଦର୍ଶକ। ତେବେ ଡିସେମ୍ବର ୧୧ରେ ଏହି ଫିଲ୍ମ ଅମାଜନ ପ୍ରାଇମ୍ ଭିଡିଓ ଇଣ୍ଡିଆରେ ରିଲିଜ୍ ହେବ ବୋଲି ସୂଚନା ରହିଛି।