ନବରଙ୍ଗପୁର/ଉମରକୋଟ,୧୦ା୧: ନବରଙ୍ଗପୁର ଜିଲା ବଡକୁମାରୀ ପଞ୍ଚାୟତ ଅଧୀନ ତାଲାପଦର ନାଗୀନଦୀ ଉପରେ ବିଜୁ ସେତୁ ଯୋଜନାରେ ତିଆରି ଚାଲିଥିବା ପୋଲ ଭୁଶୁଡି ପଡ଼ିବାରୁ ଜଣଙ୍କର ମୃତ୍ୟୁ ହୋଇଥିବା ବେଳେ ୩ଜଣ ଶ୍ରମିକ ଗୁରୁତର ହୋଇଛନ୍ତି। ମୃତକ ହେଲେ ଉମରକୋଟ ଗ୍ରାମ୍ୟ ଉନ୍ନୟନ ବିଭାଗର ଚତୁର୍ଥ ଶ୍ରେଣୀ କର୍ମଚାରୀ ମହେନ୍ଦ୍ର ମାଳୀ। ଏଥିରେ ପୁରୀ ଜିଲା ପାତ୍ରପଡା ଅଞ୍ଚଳର ସନ୍ତୋଷ ଭୋଇ(୩୨), ରମେଶ ଭୋଇ(୫୦) ଓ ବେହେରାଡାର ପ୍ରକାଶ ତାଣ୍ଡି(୫୦) ଗୁରୁତର ଅଛନ୍ତି। ଖବରପାଇ ନବରଙ୍ଗପୁର ଜିଲାପାଳ ଅଜିତ୍ କୁମାର ମିଶ୍ର, ଏସ୍ପି ପ୍ରହଲ୍ଲାଦ ସାହାଇ ମୀନା, ଝରିଗାଁ ବିଧାୟକ ପ୍ରକାଶ ଚନ୍ଦ୍ର ମାଝି ଘଟଣାସ୍ଥଳରେ ପହଞ୍ଚତ୍ଛନ୍ତି। ପୋଲ ଭୁଶୁଡିବା ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ବିଧାୟକ କହିଛନ୍ତି।
ସୂଚନା ଅନୁଯାୟୀ, ୨ କୋଟି ୪୧ ଲକ୍ଷ ୫ଶହ ଟଙ୍କା ବ୍ୟୟ ଅଟକଳରେ ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ହେବାକୁ ଥିବା ଏହି ବିଜୁ ସେତୁର କାର୍ଯ୍ୟାଦେଶ ପୁରୀର ଠିକାଦାର ଅସିଦ ବିଶ୍ୱାଳ ପାଇଥିଲେ। ୨୦୧୮ ଏପ୍ରିଲ ୪ ତାରିଖରୁ ଏହି କାମ ଆରମ୍ଭ ହୋଇ ୨୦୧୯ ମାର୍ଚ୍ଚ ୧୧ରେ ଶେଷ ହେବାର ଥିଲା। କିନ୍ତୁ ଏବେ ସୁଦ୍ଧା କାମ ସରିପାରି ନ ଥିଲା। ୩ ଦିନ ତଳେ ଜିଲାପାଳ ସେଠାକୁ ଯାଇ କାମ ତୁରନ୍ତ ସାରିବାକୁ ନିର୍ଦ୍ଦେଶ ଦେଇଥିଲେ। ଏହାପରେ ପୋଲ କାମ ଜୋରଦାର ଚାଲିଥିଲା। ସେତୁର ୬ଟି ସ୍ଲାବ ପାଇଁ ବ୍ୟବସ୍ଥା ହୋଇଛି। ୩ଟି ସ୍ଲାବ ଶେଷ ହୋଇଥିବାବେଳେ ୪ର୍ଥ ନମ୍ବର ସ୍ଲାବ ରବିବାର ପଡିଥିଲା। ଏଥିରେ ୩୦ ଜଣ ମହିଳା ଶ୍ରମିକଙ୍କ ସମେତ ପୁରୀ ଜିଲାର ୧୪ ଜଣ ଠିକା ଶ୍ରମିକ ନିୟୋଜିତ ହୋଇଥିଲେ। ମହିଳାମାନେ କାମ ସାରି ଘରକୁ ଫେରି ଯାଇଥିଲେ। ବିଭାଗୀୟ କନିଷ୍ଠ ଯନ୍ତ୍ରୀ ନିରଞ୍ଜନ ସାହୁ କାମ ତଦାରଖ ପାଇଁ ମହେନ୍ଦ୍ରଙ୍କ ସହ ସେଠାରେ ପହଞ୍ଚତ୍ ଥିଲେ। ସନ୍ଧ୍ୟା ପ୍ରାୟ ୫ଟାବେଳେ ମହେନ୍ଦ୍ର ୩ଜଣ ଶ୍ରମିକଙ୍କ ସହ ପୋଲ ଉପରକୁ ଯାଇ ସ୍ଳାବ କାମ ଦେଖୁଥିବା ବେଳେ ହଠାତ୍ ତାହା ଭୁଶୁଡି ପଡିଥିଲା। ସ୍ଥାନୀୟ ଲୋକଙ୍କ ସହାୟତାରେ ଆହତଙ୍କୁ ଉଦ୍ଧାର କରାଯାଇ ଜେଇଇଙ୍କ ଗାଡିରେ ଉମରକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ମହେନ୍ଦ୍ରଙ୍କ ମୃତ୍ୟୁ ହୋଇଛି। ନିମ୍ନମାନର କାମ ଚାଲିଥିଲା। ଶ୍ରମିକଙ୍କ ସୁରକ୍ଷା ବ୍ୟବସ୍ଥା ପ୍ରତି ଦୃଷ୍ଟି ଦିଆଯାଇ ନ ଥିଲା ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି।