ଭାରତୀୟ ଦଳର ଦ୍ରୁତ ବୋଲର ଭୁବନେଶ୍ୱର କୁମାର ଫେବୃୟାରୀ ୫ରେ ନିଜର ୩୧ତମ ଜନ୍ମଦିନ ପାଳନ କରୁଛନ୍ତି। ଗୋଟିଏ ପଟେ ଭାରତୀୟ ଦଳ ଶୁକ୍ରବାରଠାରୁ ଇଂଲଣ୍ଡ ବିପକ୍ଷରେ ମ୍ୟାଚ୍ ଖେଳୁଛି। ମାତ୍ର ଆଘାତ ଯୋଗୁ ଭୁବନେଶ୍ୱର ଟିମ୍ର ଅଂଶ ହୋଇପାରି ନାହାନ୍ତି। କିଛି ଦିନ ହେବ ସୟଦ ମୁସ୍ତାକ ଅଲି ଟ୍ରଫି ଜରିଆରେ ଭୁବନେଶ୍ୱର ଘରୋଇ କ୍ରିକେଟକୁ ଫେରିଥିଲେ, କିନ୍ତୁ ଟିମ୍ ଇଣ୍ଡିଆରେ ଏପର୍ଯ୍ୟନ୍ତ ତାଙ୍କ ସ୍ଥାନ ନିଶ୍ଚିତ ହୋଇ ନାହିଁ। ଦ୍ରୁତ ବୋଲିଂ ପାଇଁ ଜଣାଶୁଣା ଭୁବନେଶ୍ୱରଙ୍କ ପ୍ରେମ କାହାଣୀ କୌଣସି ଫିଲ୍ମ ଠାରୁ କମ୍ ନୁହେଁ। ନିଜ ପଡୋଶୀକୁ ଭଲପାଇ ବସିଥିବା ଭୁବନେଶ୍ୱର ୨୦୧୭ରେ ତାଙ୍କୁ ବିବାହ କରିଥିଲେ। କିନ୍ତୁ ବିବାହ ପୂର୍ବରୁ ସ୍ତ୍ରୀଙ୍କ ଏକ ପ୍ରଶ୍ନ ତାଙ୍କୁ ଅସୁବିଧାରେ ପକାଇ ଦେଇଥିଲା।
ପିଲାଟି ଦିନରୁ ଭୁବନେଶ୍ୱରଙ୍କ କ୍ରିକେଟ ପ୍ରତି ଦୁର୍ବଳତା ରହିଥିଲା। କ୍ରିକେଟ ଖେଳିବା ସାଙ୍ଗକୁ ସେ ନିଜର ପଡୋଶୀ ଝିଅ ନୁପୁର ନଗରଙ୍କୁ ଭଲପାଇ ବସିଥିଲେ। ମାତ୍ର ଉଭୟ ସେମାନଙ୍କ ପ୍ରେମ ସମ୍ପର୍କରେ ଘରେ କହିବାକୁ ଡରୁଥିଲେ। କାରଣ ଉଭୟଙ୍କ ବାପା ପୋଲିସରେ ଥିଲେ। ବାହାର ଲୋକଙ୍କ ଠାରୁ ଜଣାପଡ଼ିବା ପରେ ଉଭୟଙ୍କ ପରିବାର ସେମାନଙ୍କ ବିବାହ କରିବା ପାଇଁ ରାଜି ହୋଇଥିଲେ। ବିବାହ ପୂର୍ବରୁ ଭାବି ସ୍ତ୍ରୀ ନୁପୁର ଭୁବନେଶ୍ୱରଙ୍କୁ ପ୍ରଶ୍ନ କରିଥିଲେ ଯେ, ବିବାହ ପରେ ତୁମେ କ’ଣ କରିବ? ଏପରି ପ୍ରଶ୍ନ ଶୁଣିବା ପରେ ଭୁବନେଶ୍ୱର ଆଶ୍ଚର୍ଯ୍ୟ ହୋଇଯାଇଥିଲେ ଏବଂ ସେ କ୍ରିକେଟରେ ତାଙ୍କର କ୍ୟାରିୟର କରିବେ ବୋଲି କହିଥିଲେ। ଉକ୍ତ ସମୟରେ ଭୁବନେଶ୍ୱର ଭାରତୀୟ ଦଳ ପାଇଁ ନୁହେଁ ବରଂ ରଣଜୀ କ୍ରିକେଟ ଖେଳୁଥିଲେ। ଏହା ଶୁଣିବା ପରେ ନୂପୁର କହିଥିଲେ ଏବେ ପାଇଁ ଠିକ୍ ଅଛି ତୁମେ କ୍ରିକେଟ ଖେଳୁଛ। ମାତ୍ର ବିବାହ ପରେ ତୁମେ କ’ଣ ଚାକିରି କରିବ ବୋଲି ସେ ପ୍ରଶ୍ନ କରିଥିଲେ।
ପରେ ଉଭୟଙ୍କ ବିବାହ ହୋଇଥିଲା। ନୂପୁର ପେସାରେ ଜଣେ ଇଞ୍ଜିନିୟର। ସେ ନୋଏଡାର ଏକ କମ୍ପାନୀରେ କାମ କରୁଥିଲେ।