ବ୍ରହ୍ମପୁର ଅଫିସ,୧୪।୧୨: ରୁଟ୍ସ ଅଫ ଓଡ଼ିଶା ଫାଉଣ୍ଡେଶନ ପକ୍ଷରୁ ମିଶନ ଓଡ଼ିଶା ସହଯୋଗରେ ଗତ ୧୧ ତାରିଖରୁ ଭୁବନେଶ୍ୱର କଳିଙ୍ଗ ଷ୍ଟାଡ଼ିୟମଠାରୁ ଟୁର ଦି କଳିଙ୍ଗ ସାଇକେଲ ଶୋଭଯାତ୍ରା ବାହାରିଛି। ଶୋଭାଯାତ୍ରାରେ ସାମିଲ ହୋଇଥିବା ସ୍ବେଚ୍ଛାସେବୀମାନେ ସାଇକେଲରେ ଦୀର୍ଘ ୧୩୦୦ କିମି ଯାତ୍ରା କରି ଓଡ଼ିଶାର ପ୍ରତ୍ୟେକ ପର୍ଯ୍ୟଟନସ୍ଥଳରୁ ବିଶ୍ୱ ଦରବାରରେ ପହଞ୍ଚାଇବାକୁ ଲକ୍ଷ୍ୟ ରଖିଥିବା ଟିମ ଲିଡ଼ର ତଥା ରୁଟସ୍ ଅଫ ଓଡ଼ିଶା ଫାଉଣ୍ଡେସନ ଅଧ୍ୟକ୍ଷ ସୁଧୀର କୁମାର ଦାଶ କହିଛନ୍ତି। ଏଥିସହ ବିଶ୍ୱତାପନକୁ ରୋକିବା, ନିଶା ନିବାରଣ ଓ ପରିବେଶ ପ୍ରଦୂଷଣର ରୋକିବାବହୁ ସଚେତନତା ବାର୍ତ୍ତା ମଧ୍ୟ ବାଣ୍ଟୁଛନ୍ତି। ଏହି ଟିମ ସୋମବାର ସନ୍ଧ୍ୟାରେ ବ୍ରହ୍ମପୁରରେ ପହଞ୍ଚିଥିଲା। ମଙ୍ଗଳବାର ପୂର୍ବାହ୍ନରେ ଟିମକୁ ବ୍ରହ୍ମପୁର ଏସ୍ପି ସର୍ବଣା ବିବେକ ଏମ ଓ ବ୍ରହ୍ମପୁର ଡ଼ିଏଫଓ ଅମ୍ଲାନ ନାୟକ ଇଞ୍ଜିନିୟରିିଂ ସ୍କୁଲ ଛକ ସ୍ଥିତ ରାଜସ୍ବ ନିରୀକ୍ଷଣ ବଙ୍ଗଳାରେ ସ୍ବାଗତ ଜଣାଇଥିଲେ। ଟିମ ଏହି ଅଭିନବ ପ୍ରୟାସ ମାଧ୍ୟମରେ ସଚେତନତା ସୃଷ୍ଟି କାର୍ଯ୍ୟକ୍ରମକୁ ଉଭୟ ଏସପି ଓ ଡ଼ିଏଫଓ ସାଧୁବାଦ ଜଣାଇଛନ୍ତି। ମିଳିଥିବା ସୁଚନା ଅନୁସାରେ ଏହି ଟିମ୍ ପ୍ରଥମ ଦିନ ଭୁବନେଶ୍ୱର କଳିଙ୍ଗ ଷ୍ଟାଡ଼ିୟମରୁ ବାହାରିଛି। ତୃତୀୟ ଦିନ ସୁଦ୍ଧା ପ୍ରାୟ ୪୫୦ କିମି ରାସ୍ତା ଅତିକ୍ରମ କରିଛନ୍ତି। ଏହି ସାଇକେଲ ଶୋଭାଯାତ୍ରା ଡ଼ିସେମ୍ବର ୨୩ ତାରିଖରେ ଉଦଯାପିତ ହେବ। ଶୋଭାଯାତ୍ରା ଓ ସଚେତନ ବାର୍ତ୍ତା ସହ ଏହି ଟିମ ପଥ ମଧ୍ୟରେ ବହୁ ଶିକ୍ଷାନୁଷ୍ଠାନ, ସାମାଜିକ ଅନୁଷ୍ଠାନ, ସାଧାରଣ ଲୋକଙ୍କ ସହ ମିଶି ପରିବେଶ ସଚେତନା, ପ୍ଳାଷ୍ଟିକ ବର୍ଜନ, ସାଇକେଲର ବହୁଳ ଉପଯୋଗ ଭଳି ବହୁ ବିଷୟରେ ସଚେତନ ବାର୍ତ୍ତା ବାଣ୍ଟୁଛନ୍ତି।