ନ୍ୟୁୟର୍କ,୨୫।୩: ୟୁକ୍ରେନ ଉପରେ ରୁଷିଆର ଆକ୍ରମଣକୁ ନେଇ ଆମେରିକା ଲଗାତାର ରୁଷିଆ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରୁଛି। ରୁଷିଆକୁ ଜି-୨୦ରୁ ବାଦ୍ ଦେବାକୁ ଆମେରିକାର ରାଷ୍ଟ୍ରପତି ଜୋ ବାଇଡେନ କହିଛନ୍ତି। ୟୁକ୍ରେନ ଉପରେ ରୁଷିଆର ଆକ୍ରମଣ ସମ୍ପର୍କରେ ଜରୁରୀକାଳୀନ ନାଟୋ ବୈଠକ ପରେ ବାଇଡେନ୍ ବ୍ରୁସେଲ୍ସରେ ଏହା କହିଛନ୍ତି। ଜି -୨୦ ହେଉଛି ୧୯ଟି ଦେଶ ଏବଂ ୟୁରୋପୀୟ ସଂଘ ମଧ୍ୟରେ ଏକ ଆନ୍ତଃ ସରକାରୀ ମଞ୍ଚ। ଏହା ପ୍ରମୁଖ ବିଶ୍ୱସ୍ତରୀୟ ପ୍ରସଙ୍ଗରେ କାର୍ଯ୍ୟ କରେ। ବାଇଡେନ୍ କହିଛନ୍ତି, ରୁଷିଆକୁ ଜି -୨୦ରୁ ବାହାର କରାଯାଉ। ସେ ଅନ୍ୟ ବିଶ୍ୱ ନେତାଙ୍କ ସହ ଏହି ପ୍ରସଙ୍ଗ ଉଠାଇଛନ୍ତି। କିନ୍ତୁ ଏହି ଏହା ଜି-୨୦ ଉପରେ ନିର୍ବର କରେ।
ରୁଷିଆ ଆକ୍ରମଣ ହେତୁ ୟୁକ୍ରେନ ଛାଡିଥିବା ୩.୫ ମିଲିୟନ ଲୋକଙ୍କ ମଧ୍ୟରୁ ଆମେରିକା ଏକ ଲକ୍ଷ ଶରଣାର୍ଥୀଙ୍କୁ ଆଶ୍ରୟ ଦେବ। ହ୍ବାଇଟ୍ହାଉସ୍ର ଜଣେ ଅଧିକାରୀ ଏହି ସୂଚନା ଦେଇଛନ୍ତି। ୟୁକ୍ରେନରୁ ଶରଣାର୍ଥୀଙ୍କୁ ଆମେରିକା ସ୍ବାଗତ କରିବ, କିନ୍ତୁ ଅଧିକାଂଶ ଶରଣାର୍ଥୀ ୟୁରୋପରେ ରହିବାକୁ ପସନ୍ଦ କରିବେ ବୋଲି ଅଧିକାରୀମାନେ ପୂର୍ବାନୁମାନ କରିଛନ୍ତି।
