ଓ୍ବାଶିଂଟନ,୧୩।୩ : ଆମେରିକାର ସିଗ୍ନେଚର ବ୍ୟାଙ୍କ ଏବଂ ସିଲିକନ ଭ୍ୟାଲି ବ୍ୟାଙ୍କ ବୁଡ଼ିଯିବା ଖବର ସାରା ବିଶ୍ୱରେ ହେଡଲାଇନ ସୃଷ୍ଟି କରିଛି। ବର୍ତ୍ତମାନ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ଦୁଇ ବ୍ୟାଙ୍କର ଦେବାଳିଆ ହେବା ପ୍ରସଙ୍ଗରେଏକ ବଡ ବିବୃତ୍ତି ଦେଇଛନ୍ତି। ବାଇଡେନ ଟୁଇଟ କରି କହିଛନ୍ତି ଯେ ବ୍ୟାଙ୍କଗୁଡିକର ପତନ ପାଇଁ ଯେଉଁମାନେ ଦାୟୀ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଉଭୟ ବ୍ୟାଙ୍କର ଆକାଉଣ୍ଟଧାରୀଙ୍କୁ ମଧ୍ୟ ଆଶ୍ୱସ୍ତି ପ୍ରଦାନ କରି କହିଛନ୍ତି ଯେ ଲୋକଙ୍କ ଟଙ୍କା ସୁରକ୍ଷିତ ରହିବ।
ଏହା ସହିତ ବଡ ବ୍ୟାଙ୍କଗୁଡିକର ମନିଟରିଂ ଏବଂ ନିୟମାବଳୀ ମଧ୍ୟ ମଜବୁତ ହେବ ଯାହା ଦ୍ୱାରା ଏଭଳି ପରିସ୍ଥିତିର ସମ୍ମୁଖୀନ ହେବାକୁ ପଡିବ ନାହିଁ। ଆମେରିକାର ରାଷ୍ଟ୍ରପତି ଅନ୍ୟ ଏକ ଟୁଇଟରେ ଲେଖିଛନ୍ତି ଯେ ଆମେ ଆମେରିକୀୟ ଲୋକ ଏବଂ ଆମେରିକୀୟ ବ୍ୟବସାୟ ଜଗତକୁ ନିଶ୍ଚିତ କରିବାକୁ ଚାହୁଁଛୁ ଯେ ସେମାନଙ୍କର ବ୍ୟାଙ୍କ ଜମା ସୁରକ୍ଷିତ ଏବଂ ଯେତେବେଳେ ସେମାନେ ଆବଶ୍ୟକ କରନ୍ତି ସେତେବେଳେ ସେମାନେ ଏହାକୁ ନେଇ ପାରିବେ।