ଓ୍ବାଶିଂଟନ, ୬।୩ : ରୁଷିଆ ୟୁକ୍ରେନରେ ଆତଙ୍କ ସୃଷ୍ଟି କରିଛି। ଏହାର ଉନ୍ନତ କ୍ଷେପଣାସ୍ତ୍ର, ଆର୍ଟିଲିରି ଏବଂ ଅସ୍ତ୍ରଶସ୍ତ୍ର ୟୁକ୍ରେନର ବହୁ କ୍ଷତି କରିବାରେ ଲାଗିଛି। ତେବେ ପାଶ୍ଚାତ୍ୟ ଅସ୍ତ୍ରଶସ୍ତ୍ର ମାଧ୍ୟମରେ ୟୁକ୍ରେନ ରୁଷିଆକୁ ଟକ୍କର ଦେବାରେ ଲାଗିଛି। ଆମେରିକା ଏବଂ ବ୍ରିଟେନ ୟୁକ୍ରେନକୁ ଅସ୍ତ୍ର ଯୋଗାଉଛନ୍ତି।
କିନ୍ତୁ ଏପରିସ୍ଥଳେ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ପ୍ଲାନ୍-ବି ମଧ୍ୟ ସାମ୍ନାକୁ ଆସିଛି। ରୁଷିଆ ସହିତ ସିଧାସଳଖ ଯୁଦ୍ଧ କରିବା ପରିବର୍ତ୍ତେ ଆମେରିକା ପରଦା ପଛରେ ରହି ୟୁକ୍ରେନକୁ ଅନ୍ୟ ଉପାୟରେ ସାହାଯ୍ୟ କରିବାକୁ ଯୋଜନା ପ୍ରସ୍ତୁତ କରିଛି।
ଖବର ଅନୁଯାୟୀ, ଆମେରିକା ରୁଷିଆର ମୁକାବିଲା ପାଇଁ ପୋଲାଣ୍ଡକୁ ଉସୁକାଉଛି। ତେବେ ପୋଲାଣ୍ଡ ମଧ୍ୟ ଆମେରିକା ସାମ୍ନାରେ ଏନେଇ ଏକ ସର୍ତ୍ତ ରଖିଛି। ଏଥିରେ ୟୁକ୍ରେନର ସହାୟତା ବଦଳରେ ଆମେରିକାରୁ ଏକ ଆଧୁନିକ ଯୁଦ୍ଧ ବିମାନ ଦାବି କରାଯାଇଛି। ଏହି ଚୁକ୍ତି ପ୍ରାଥମିକ ପର୍ଯ୍ୟାୟରେ ରହିଛି ବୋଲି ଚର୍ଚ୍ଚା ହେଉଛି।
ଆମେରିକାର ଚାରିଜଣ ଅଧିକାରୀ ଗଣମାଧ୍ୟମକୁ କହିଛନ୍ତି ଯେ ଯଦି ପୋଲାଣ୍ଡ ଏହାର ବ୍ୟବହୃତ ମିଗ-୨୯ ଏବଂ ସୁଖୋଇ-୨୫ ଯୁଦ୍ଧ ବିମାନକୁ ୟୁକ୍ରେନକୁ ଯୋଗାଇ ଦିଏ, ତେବେ ଆମେରିକା ଏହାର ପ୍ରତିବଦଳରେ ଏଫ୍-୧୬ ଯୁଦ୍ଧ ବିମାନ ଦେଇପାରେ। ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ସାହାଯ୍ୟ ପାଇଁ ଆମେରିକାକୁ ନିବେଦନ କରିବା ପରେ ଏହି ଚୁକ୍ତି ଏବେ ସାମ୍ନାକୁ ଆସିଛି।
ବାଇଡେନ ପ୍ରଶାସନ ଏବଂ ପୋଲାଣ୍ଡ ମଧ୍ୟରେ ଏହି ଚୁକ୍ତି ସାମ୍ନାକୁ ଆସିବା ପରେ ନାଟୋ ଏବଂ ପୁଟିନଙ୍କ ମଧ୍ୟରେ ତିକ୍ତତା ବୃଦ୍ଧି ପାଇବାର ସମ୍ଭାବନା ରହିଛି। ପୋଲାଣ୍ଡ ଗତ ସପ୍ତାହରେ କହିଥିଲା ଯେ ଯଦି ୟୁକ୍ରେନକୁ ବିମାନ ପଠାଇଲେ ଆମେରିକା ଏହାର ଆତ୍ୟାଧୁନିକ ଯୁଦ୍ଧ ବିମାନର ଅଭାବକୁ ପୂରଣ କରିବ।
ପୋଲାଣ୍ଡର ନିଷ୍ପତ୍ତିକୁ ବିରୋଧ ନକରି ହ୍ବାଇଟ ହାଉସ ପକ୍ଷରୁ କୁହାଯାଇଥିଲା ଯେ କିପରି ପୋଲାଣ୍ଡର ଦକ୍ଷତା ବୃଦ୍ଧି କରିପାରିବେ ସେନେଇ ନାଟୋ ସହଯୋଗୀମାନଙ୍କ ସହ ଆଲୋଚନା ହେଉଛି। ଏଭଳି ପରିସ୍ଥିତିରେ ନାଟୋ ଏବଂ ପୁଟିନଙ୍କ ମଧ୍ୟରେ ସିଧାସଳଖ ମୁକାବିଲା ହୋଇପାରେ ବୋଲି ଅନ୍ତର୍ଜାତୀୟସ୍ତରରେ ଚର୍ଚ୍ଚା ହେଉଛି।
