ନୂଆଦିଲ୍ଲୀ, ୧୨।୫ : ରେଲୱେ ବୋର୍ଡ ଗୋଟିଏ ଦିନରେ ୧୯ ଜଣ ବରିଷ୍ଠ ପ୍ରଥମ ଶ୍ରେଣୀ ଅଧିକାରୀଙ୍କୁ ବାଧ୍ୟତାମୂଳକ ଅବସର ଦେଇଛି। ସେମାନଙ୍କୁ ସ୍ବେଚ୍ଛାକୃତ ଅବସର (ଭିଆର୍ଏସ୍) ପ୍ରଦାନ କରାଯାଇଛି । ସେମାନ କାର୍ଯ୍ୟର ସମୀକ୍ଷା କରିବା ପରେ, ଏହି ଅଧିକାରୀମାନେ କାର୍ଯ୍ୟରେ ଅନିୟମିତତା ପ୍ରଦର୍ଶନ କରିଥିବା ଜଣାପଡିଥିଲା । ଏନେଇ ସେମାନଙ୍କୁ ବାରମ୍ବାର ଚେତାବନୀ ମଧ୍ୟ ଦିଆଯାଉଥିଲା ।
ଏହାପୂର୍ବରୁ ବୋର୍ଡ ୭୫ ଅଧିକାରୀଙ୍କୁ ଭିଆର୍ଏସ୍ ପ୍ରଦାନ କରାଯାଇଥିଲା। ଏହାକୁ ମିଶାଇ ଗତ ୧୧ ମାସ ମଧ୍ୟରେ ୯୪ ଜଣ ବରିଷ୍ଠ ପ୍ରଥମ ଶ୍ରେଣୀ ଅଧିକାରୀଙ୍କୁ ବାଧ୍ୟତାମୂଳକ ଅବସର ଦିଆ ଗଲାଣି।
ରେଲଓ୍ବେ ସୂତ୍ରରୁ ପ୍ରକାଶ ଯେ, ଯେଉଁମାନେ ଭିଆର୍ଏସ୍ ପାଇଛନ୍ତି ସେମାନଙ୍କ ମଧ୍ୟରେ ଇଲେକ୍ଟ୍ରିକାଲ, ପର୍ସନାଲ, ମେକାନିକାଲ, ଷ୍ଟୋର, ସିଭିଲ ଇଞ୍ଜିିନିୟର, ସିଗନାଲ ଇଞ୍ଜିିନିୟର ଏବଂ ଟ୍ରାଫିକ ସର୍ଭିସର ବରିଷ୍ଠ ଅଧିକାରୀ ଅଛନ୍ତି। ଏଥିରେ ରେଲୱେ ବୋର୍ଡର ଦୁଇଜଣ ସଚିବ ସ୍ତରୀୟ ଅଧିକାରୀ ଏବଂ ଜୋନାଲ ରେଳବାଇର ଜଣେ ଜେନେରାଲ ମ୍ୟାନେଜର ଅନ୍ତର୍ଭୁକ୍ତ।
ଏହା ବ୍ୟତୀତ ପଶ୍ଚିମ ରେଳବାଇ, କେନ୍ଦ୍ରୀୟ ରେଳବାଇ, ପୂର୍ବ ରେଳବାଇ, ଉତ୍ତର ରେଳବାଇ, ଉତ୍ତର ରେଳବାଇ, ରେଳ କୋଚ କାରଖାନା କାପୁରତାଲା, ଆଧୁନିକ କୋଚ କାରଖାନା ରାୟବରେଲି, ଡିଜେଲ ଲୋକୋମୋଟିଭ ୱାର୍କସ ବାରାଣାସୀ ଏବଂ ଆରଡିଏସଓ-ଲକ୍ଷ୍ନୌ ଆଦି ରେଳବାଇ ଅଣ୍ଡରଟେକିଂର ବରିଷ୍ଠ ଅଧିକାରୀମାନେ ଅଛନ୍ତି।
ବିଶେଷଜ୍ଞମାନେ କହିଛନ୍ତି ଯେ ଧାରା -୫୬ (ଜେ) ଅନୁଯାୟୀ ସରକାର ଅଧିକାରୀଙ୍କୁ ଚାକିରିରୁ ହଟାଇ ପାରିବେ। ଏହି ପ୍ରକ୍ରିୟା ଅଧୀନରେ ଅବସରପ୍ରାପ୍ତ ଅଧିକାରୀଙ୍କୁ ଦୁଇରୁ ତିନି ମାସର ଦରମା ଦିଆଯାଏ। ପେନସନ ଏବଂ ଅନ୍ୟାନ୍ୟ ଦେୟ ମଧ୍ୟ ଦିଆଯାଇଥାଏ। ସ୍ବେଚ୍ଛାକୃତ ଅବସର (ଭିଆର୍ଏସ୍) ଯୋଜନାରେ, କର୍ମଚାରୀଙ୍କୁ ଅବଶିଷ୍ଟ ସେବା ଅନୁଯାୟୀ ବର୍ଷକୁ ଦୁଇମାସ ଆଧାରରେ ଦରମା ପ୍ରଦାନ କରାଯାଏ। ବାଧ୍ୟତାମୂଳକ ଅବସର ସମୟରେ ଏହି ସୁବିଧା ଉପଲବ୍ଧ ନୁହେଁ।
ସୂତ୍ରରୁ ପ୍ରକାଶ ଯେ ଜୁନ-ଜୁଲାଇରେ ଭିଆର୍ଏସ୍ରେ ପଠାଯିବାକୁ ଥିବା ଅଧିକାରୀଙ୍କ ତାଲିକା ମଧ୍ୟ ପ୍ରସ୍ତୁତ ହେଉଛି। କୁହାଯାଉଛି ଯେ ସମ୍ପୃକ୍ତ ଅଧିକାରୀମାନେ ଭିଆର୍ଏସ୍ ମାଗିଥିଲେ। କିନ୍ତୁ ବାସ୍ତବତା ହେଉଛି ଅକ୍ଷମତା, କାର୍ଯ୍ୟରେ ଖରାପ ପ୍ରଦର୍ଶନ ଇତ୍ୟାଦି ପାଇଁ ସେମାନଙ୍କୁ ଦୀର୍ଘ ସମୟ ଧରି ଚେତାବନୀ ଦିଆଯାଉଥିଲା। କାର୍ଯ୍ୟର ସମୀକ୍ଷା କରିବା ପରେ ତିନିଜଣିଆ କମିଟି ତାଙ୍କୁ ଭିଆର୍ଏସ୍ ନେବାକୁ ଚାପ ପକାଇଥିଲେ।
ସୂତ୍ରରୁ ପ୍ରକାଶ ଯେ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ରେଳବାଇର ଜେନେରାଲ ମ୍ୟାନେଜର ଜୋନାଲ ରେଳବାଇର ଏକ ବୈଠକରେ କହିଥିଲେ ଯେ କାମ କର କିମ୍ବା ଘରକୁ ଯାଅ। ବୈଷ୍ଣବଙ୍କ ୧୧ ମାସର କାର୍ଯ୍ୟକାଳରେ, ଭିଆର୍ଏସ୍ ନେଉଥିବା ବରିଷ୍ଠ ଅଧିକାରୀଙ୍କ ସଂଖ୍ୟା ୯୪ ରେ ପହଞ୍ଚିଛି।