ଟୋକିଓ, ୩୦।୭-
ଟୋକିଓ ଅଲିମ୍ପିକ୍ସରେ ଜନ ସଂଖ୍ୟାରେ ବହୁତ ଛୋଟ ଦେଶର ଆଥଲେଟ୍ମାନେ ମଧ୍ୟ ପଦକ ଜିତି ଦେଶକୁ ଗର୍ବିତ କରିଛନ୍ତି। ଏପରି ଜଣେ ଆଥଲେଟ୍ ହେଲେ ଆଲେସାଣ୍ଡ୍ରା ପେରିଲି। ପେରିଲି ହେଉଛନ୍ତି ୩୪,୦୦୦ ଲୋକସଂଖ୍ୟା ବିଶିଷ୍ଟ ସାନ୍ ମାରିନୋ ଦେଶର ଆଥଲେଟ୍। ସେ ମହିଳା ଟ୍ରାପ୍ ଶୁଟିଂ ଇଭେଣ୍ଟରେ ବ୍ରୋଞ୍ଜ ପଦକ ଜିତି ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି। ୨୦୧୨ ଲଣ୍ଡନ ଅଲିମ୍ପିକ୍ସରେ ସେ ଅଳ୍ପକେ ପଦକ ହାସଲରୁ ବଞ୍ଚତ୍ତ ହୋଇ ୪ର୍ଥ ସ୍ଥାନରେ ରହିଥିଲେ। ”ଏହା ମୋ ପାଇଁ ପ୍ରଥମ ଅଲିମ୍ପିକ୍ ନ ଥିଲେ ହେଁ ପ୍ରଥମ ପଦକ। ମୋ ଦେଶ ପାଇଁ ମଧ୍ୟ ଏହା ପ୍ରଥମ ଅଲିମ୍ପିକ୍ସ ପଦକ। ଆମ ଦେଶ ବହୁତ ଛୋଟ ସତ, ମାତ୍ର ପଦକ ହାସଲ କରି ବହୁତ ଗର୍ବ ଅନୁଭବ ହେଉଛି“ ବୋଲି ନିଜ ପ୍ରତିକ୍ରିୟାରେ ପେରିଲି ପ୍ରକାଶ କରିଛନ୍ତି। ଏହା ପୂର୍ବରୁ କମ୍ ଲୋକସଂଖ୍ୟା ବିଶିଷ୍ଟ ଦେଶଭାବେ ବର୍ମୁଡାର ଫ୍ଲୋରା ଡୁଫି ସ୍ବର୍ଣ୍ଣ ପଦକ ପାଇଥିଲେ। ମାତ୍ର ଅଲିମ୍ପିକ୍ସରେ ଭାଗ ନେଇଥିବା ସବୁଠାରୁ କମ୍ ଲୋକସଂଖ୍ୟା ବିଶିଷ୍ଟ ଦେଶ ହେଉଛି ସାନ୍ ମାରିନୋ। ତେଣୁ ପେରିଲି ଏବେ ଡୁଫିଙ୍କୁ ପଛରେ ପକାଇ ଦେଇଛନ୍ତି। ଟ୍ରାପ୍ ଶୁଟିଂ ଇଭେଣ୍ଟରେ ସ୍ଲୋଭାକିଆର ଜୁଜାନା ରେହାକ ଷ୍ଟିଫେସକୋଭା ସ୍ବର୍ଣ୍ଣ ଏବଂ ଆମେରିକାର କାଏଲ ବ୍ରାଓନିଂ ରୌପ୍ୟ ପଦକ ପାଇଥିଲେ।