ଇନ୍ଦୋର,୨୦ା୨: ବର୍ଡର-ଗାଭାସ୍କର ଟ୍ରଫିରେ ୦-୨ରେ ପଛୁଆ ରହିଥିବା ଅଷ୍ଟ୍ରେଲିଆକୁ ବଡ଼ ଝଟ୍କା। ସୋମବାର ଦଳର ପ୍ରମୁଖ ଦ୍ରୁତ ବୋଲର ଜୋଶ ହାଜେଲଉଡ୍ ଆକିଲିଶ୍ଙ୍କ ଗୋଇଠିରେ ଇଞ୍ଜୁରୀ କାରଣରୁ ଇନ୍ଦୋର ଏବଂ ଅହମ୍ମଦାବାଦରେ ହେବାକୁ ଥିବା ଟେଷ୍ଟରୁ ବାଦ୍ ପଡିଛନ୍ତି । ପୂର୍ବରୁ ଅଷ୍ଟ୍ରେଲିଆ ଦଳରେ ସାମିଲ ଥିଲେ ମଧ୍ୟ ସେ ନାଗପୁର ଏବଂ ଦିଲ୍ଲୀ ଟେଷ୍ଟରେ ଖେଳି ନ ଥିଲେ।
ଦକ୍ଷିଣ ଆଫ୍ରିକା ବିପକ୍ଷ ଅନ୍ତିମ ଟେଷ୍ଟରେ ହାଜେଲଉଡଙ୍କ ବାମ ଗୋଇଠିରେ ଆଘାତ ଲାଗିଥିଲା। ହାଜେଲଉଡ ବାଦ୍ ପଡିଥିବା ବେଳେ ସେ ଅଷ୍ଟ୍ରେଲିଆ ପ୍ରତ୍ୟାବର୍ତ୍ତନ କରିବେ ବୋଲି ସୂଚନା ଦେଇଛନ୍ତି ଅଷ୍ଟ୍ରେଲିଆ ମୁଖ୍ୟ କୋଚ୍ ଆଣ୍ଡ୍ର୍ୟୁ ମ୍ୟାକଡୋନାଲ୍ଡ। ତେବେ ଓପନର ଡେଭିଡ୍ ଓ୍ବାର୍ନରଙ୍କ ଆହତ ସମସ୍ୟା ସମ୍ପର୍କରେ କିଛି ଅପ୍ଡେଟ୍ ପ୍ରଦାନ କରି ନାହାନ୍ତି ମୁଖ୍ୟ କୋଚ୍। ଓ୍ବାର୍ନରଙ୍କ ମୁଣ୍ଡରେ ଏବେ ସୁଦ୍ଧା ଫୁଲା ଏବଂ ଦରଜ ରହିଛି। ଆହତ ସମସ୍ୟାକୁ ଦେଖିବା ପରେ ଚୂଡାନ୍ତ ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି।