![](https://www.dharitri.com/wp-content/uploads/2024/04/bhaskar-rao.jpg)
ରାୟଗଡା,୫।୪(ଆଶିଷ ରଞ୍ଜନ ପଣ୍ଡା): ନିର୍ବାଚନକୁ ଆଉ ମାସେ ସମୟ ରହିଥିବା ବେଳେ ଜିଲା ବିଜେଡିରେ ପରିବର୍ତନ । ଯାହାକୁ ନେଇ ଜିଲାରେ ହଟଚମଟ ସୃଷ୍ଟି ହୋଇଛି । ଦଳର ଜିଲା ସଭାପତିରେ ପରିବର୍ତ୍ତନ କରିଛି ଦଳ । ଜିଲା ସଭାପତି ସୁଧୀର ଦାସଙ୍କ ସ୍ଥାନରେ ଭେଟେରାନ ନେତା ତଥା ପୂର୍ବତନ ରାଜ୍ୟସଭା ଏମପି ଏନ.ଭାସ୍କର ରାଓଙ୍କୁ ଦଳ ଜିଲା ସଭାପତି ଦାୟିତ୍ୱ ଦେଇଛି । ଜିଲାରେ ସୃଷ୍ଟି ହୋଇଥିବା ପରିସ୍ଥିତିକୁ ଦୃଷ୍ଟିରେ ରଖି ଦଳ ଭାସ୍କରଙ୍କ ଉପରେ ଭରସା କରି ଏଭଳି ନିଷ୍ପତ୍ତି ନେଇଛି । ଆଗାମୀ ସାଧାରଣ ନିର୍ବାଚନକୁ ଜିଲାରେ ଭାସ୍କର ପରିଚାଳନା କରିବେ ବୋଲି ସୂଚନା ମିଳିଛି ।
ଅନ୍ୟପଟେ ସୁଧୀର ଦାସଙ୍କୁ ଦଳର ରାଜ୍ୟ ସାଧାରଣ ସମ୍ପାଦକ ଏବଂ ବିଷମକଟକ ନିର୍ବାଚନ ମଣ୍ଡଳୀର ନିର୍ବାଚନ ପରିଚାଳନା ଦାୟିତ୍ୱ ମିଳିଛି । ଏଥିସହ ଆଉ ଜଣେ ଟପ ନେତା କୃଷ୍ଣ ମହାପାତ୍ରଙ୍କୁ ରାୟଗଡା ନିର୍ବାଚନ ପରିଚାଳନା ଦାୟିତ୍ୱ ଦିଆଯାଇଛି ।
ସୂଚନା ଥାଉକି, ଗତ କିଛି ବର୍ଷ ହେବ ସମଗ୍ର ଜିଲାରେ ବିଜେଡି ଭିତରେ ଗୋଷ୍ଠୀ କନ୍ଦଳ ତୀବ୍ର ହୋଇଥିଲା । ଏହିଭଳି କନ୍ଦଳ ପାଇଁ ଗତ ନିର୍ବାଚନରେ ଦଳ ରାୟଗଡା ଆସନରେ ପରାଜିତ ହୋଇଥିଲା । ଆଉ ଏବେ ଅନୁସୟା ମାଝୀଙ୍କୁ ପ୍ରାର୍ଥୀ ଘୋଷଣା ପରେ ତାଙ୍କୁ ତୀବ୍ର ବିରୋଧ କରିଥିଲେ ଦଳୀୟ ନେତା ଓ କର୍ମୀ । ଫଳରେ ଲଗାତାର ଭାବେ ଦଳର ଶୀର୍ଷ ନେତୃତ୍ୱ ଏକାଧିକ ବାର ଉଭୟ ଭାସ୍କର ଓ ସୁଧୀର ଗୋଷ୍ଠୀକୁ ଡାକି ଆଲୋଚନା କରିଥିଲେ । ଗତ ତିନି ଦିନ ଧରି ଏହି ସମସ୍ୟାର ସମାଧାନ ପାଇଁ ମାନସ ମନ୍ଥନ ଚାଲିଥିଲା । ଶେଷରେ ଜିଲା ସଭାପତି ପରିବର୍ତନ କରି ସମାଧାନ କରିବାକୁ ଦଳ ତରଫରୁ ଉଦ୍ୟମ କରାଯାଇଛି । ୫୨ବର୍ଷର ଦୃଢ ରାଜନୈତିକ ନେତୃତ୍ୱକୁ ଭରସା କରି ଦଳ ଭାସ୍କରଙ୍କୁ ଏହି ଗୁରୁ ଦାୟିତ୍ୱ ଦେଇଛି।