ଭୁବନେଶ୍ୱର,୨୮।୯: ୪ଦିନର କାର୍ଯ୍ୟବନ୍ଦ ଆନ୍ଦୋଳନ ପରେ ଶନିବାର ନର୍ସିଂ କର୍ମଚାରୀଙ୍କ ସହ ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଆଲୋଚନା କରିଛନ୍ତି। ସରକାର ଓଡ଼ିଶା ନର୍ସିଂ କର୍ମଚାରୀ ସଂଘର ସମସ୍ତ ଦାବି ନେଇ ଅବଗତ ରହିଛି। ଏହାକୁ ପୂରଣ କରିବା ପାଇଁ ସଂଘ ପକ୍ଷରୁ ସରକାର ଏକ ଆନ୍ତଃବିଭାଗୀୟ କମିଟି ଗଠନ କରିଛନ୍ତି। ଖୁବ୍ଶୀଘ୍ର ଦାବି ପୂରଣ ନେଇ ପଦକ୍ଷେପ ନିଆଯିବ ବୋଲି ମନ୍ତ୍ରୀ ପ୍ରତିଶୃତି ଦେବାପରେ ଆନ୍ଦୋଳନରୁ ଓହରିବାକୁ ରାଜି ହୋଇଛି ସଂଘ। ତେଣୁ ରବିବାର ଠାରୁ ରାଜ୍ୟରେ ଚିକିତ୍ସା ବ୍ୟବସ୍ଥା ପୁଣିଥରେ ସଜାଡ଼ି ହେବ ବୋଲି ଆଶା ପ୍ରକାଶ ପାଇଛି। ଲୋକସେବା ଭବନଠାରେ ଆୟୋଜିତ ଏହି ବୈଠକରେ ସ୍ବାସ୍ଥ୍ୟମନ୍ତ୍ରୀଙ୍କ ସମେତ ବିଭାଗ ଶାସନ ସଚିବ ଏବଂ ଅନ୍ୟାନ୍ୟ ଅଧିକାରୀ ଉପସ୍ଥିତ ଥିଲେ। ଏନେଇ ସଂଘର ସମ୍ପାଦକ ଅଶ୍ୱିନୀ ଦାଶ କହିଛନ୍ତି, ଆଲୋଚନା ଫଳପ୍ରଦ ହୋଇଛି। ଆମର ମୁଖ୍ୟ ଦାବି ଥିଲା ସରକାରଙ୍କ ସହିତ ସିଧାସଳଖ ଆଲୋଚନା କରିବା। ଯାହାକି ପୂରଣ ହେଲା। ସରକାର ଆମର ସବୁ ଦାବି ନେଇ ଅବଗତ ଥିବା କହିବା ସହ ତାହାକୁ ପୂରଣ କରିବାକୁ ମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି। ତେବେ ସଂଘର ଏହି ଆନ୍ଦୋଳନ ଜଣେ ବା ଦୁଇଜଣ ଲିଡରଙ୍କ ନିଷ୍ପତ୍ତି ନୁହେଁ। ସଂଘର ସାଧାରଣ ପରିଷଦ ବୈଠକରେ ହୋଇଥିବା ନିଷ୍ପତ୍ତି ଅନୁଯାୟୀ ଆନ୍ଦୋଳନ ହୋଇଥିଲା। ତେଣୁ ସଂଘ ଭର୍ଚୁଆଲ ମାଧ୍ୟମରେ ସମସ୍ତ ଜିଲାର ମୁଖ୍ୟଙ୍କ ସହ ଆଲୋଚନା କରିବା ପରେ ଏନେଇ ନିଷ୍ପତ୍ତି ନେବ। ତେବେ ରାଜ୍ୟବାସୀଙ୍କ ପାଇଁ ସ୍ବାର୍ଥକୁ ଦୃଷ୍ଟିରେ ରଖିବା ସହ ଯେପରି ରୋଗୀସେବାରେ ବ୍ୟାଘାତ ସୃଷ୍ଟି ନ ହେବ ସେ ନେଇ ପଦକ୍ଷେପ ନିଆଯିବ ବୋଲି ସମ୍ପାଦକ କହିଛନ୍ତି।
୧୦ଦଫା ଦାବି ନେଇ ସମଗ୍ର ରାଜ୍ୟରେ ଗତ ବୁଧବାର (୨୫ ତାରିଖ) ଠାରୁ ସଂଘ କାର୍ଯ୍ୟବନ୍ଦ ଆନ୍ଦୋଳନ ଆରମ୍ଭ କରିଥିଲା। ପ୍ରଥମ ଦୁଇଦିନ ଜରୁରୀକାଳୀନ ସେବା ଜାରି ରହିଥିବାବେଳେ, ଶୁକ୍ରବାର ଠାରୁ ଏହି ସେବାକୁ ମଧ୍ୟ ବନ୍ଦ କରି ଦିଆଯାଇଥିଲା। ପ୍ରଥମେ ଆନ୍ଦୋଳନରେ ମାତ୍ର ୧୦ ପ୍ରତିଶତ ନର୍ସିଂ କର୍ମଚାରୀ ସାମିଲ ହୋଇଥିବାବେଳେ, ଶୁକ୍ରବାର ଠାରୁ ସଂଘ ନେତୃତ୍ୱରେ ରହିଥିବା ପ୍ରାୟ ୧୬ହଜାର କର୍ମଚାରୀ ଏଥିରେ ଯୋଗଦେଇ ଥିଲେ। ଭୁବନେଶ୍ୱର, କଟକ, ବ୍ରହ୍ମପୁର, ରାଉରକେଲା, ସମ୍ବଲପୁର ସବୁଠି ନର୍ସିଂ କର୍ମଚାରୀଙ୍କ ଆନ୍ଦୋଳନ ଜାରି ରହିଥିଲା। ଫଳରେ ଦୁଇଦିନ ଧରି ରାଜ୍ୟରେ ସମସ୍ତ ସରକାରୀ ହସ୍ପିଟାଲଗୁଡିକରେ ସ୍ବାସ୍ଥ୍ୟବ୍ୟବସ୍ଥା ଏକପ୍ରକାର ଦୋହଲି ଯାଇଥିଲା। ରୋଗୀଙ୍କୁ ସାଲାଇନ୍ ଲଗାଇବା ଠାରୁ ଆରମ୍ଭ କରି ଇଞ୍ଜେକ୍ସନ ଦେବା ଏବଂ ଅନ୍ୟାନ୍ୟ କାର୍ଯ୍ୟ ପାଇଁ ହାତଗଣତି ଆଉଟ୍ସୋର୍ସିଂ ନର୍ସ ଏବଂ ନର୍ସିଂ ଛାତ୍ରୀଛାତ୍ରଙ୍କ ଉପରେ ନିର୍ଭର କରିବାକୁ ପଡୁଥିଲା। ରୋଗୀଙ୍କୁ ଗୋଟେ ଓ୍ବାର୍ଡରୁ ଅନ୍ୟ ଓ୍ବାର୍ଡକୁ ସ୍ଥାନାନ୍ତର କରିବା ବେଳେ ରୋଗୀଙ୍କ ସମ୍ପର୍କୀୟ ସାଲାଇନ୍ ଧରି ଆଗେଆଗେ ଯିବା ଦୃଶ୍ୟ ଦେଖିବାକୁ ମିଳିଥିଲା। ସ୍ଥିତି ଏପରି ହୋଇଥିଲା ଯେ, ଜରୁରୀକାଳୀନ ଚିକିତ୍ସା ସେବା ୁ ରୋଗୀଙ୍କୁ ବିଭିନ୍ନ ଘରୋଇ ହସ୍ପିଟାଲକୁ ରେଫର୍ କରାଯାଇଥିଲା।