![](https://www.dharitri.com/wp-content/uploads/2024/04/ddd-25.jpg)
ଚଣ୍ଡିଖୋଲ,୨୨ା୪(ପ୍ରଦୀପ୍ତ କୁମାର ପୃଷ୍ଟି):ବଡ଼ଚଣା ବିଧାନସଭା ଆସନ ପାଇଁ ବିଜେଡି ପକ୍ଷରୁ ପ୍ରାର୍ଥୀ ଭାବେ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କ ନାମ ଘୋଷଣା ପରେ ରାଜନୀତି ସରଗରମ ହୋଇଛି। ବର୍ଷା ରବିବାର ବଡ଼ଚଣା ବିଧାୟକ ଅମର ପ୍ରସାଦ ଶତପଥୀଙ୍କୁ ତାଙ୍କ ସରକାରୀ ବାସଭବନରେ ସାକ୍ଷାତ କରି ସହଯୋଗ ଲୋଡ଼ିଛନ୍ତି। ଅନ୍ୟପକ୍ଷରେ ବିଧାୟକଙ୍କ ସମର୍ଥକମାନେ ପ୍ରାର୍ଥୀ ପରିବର୍ତ୍ତନ ଲାଗି ମୁଖ୍ୟମନ୍ତ୍ରୀଙ୍କ ନିକଟରେ ଦାବି ଉପସ୍ଥାପନ କରିଛନ୍ତି। ଏ ସମ୍ପର୍କରେ ଗଣମାଧ୍ୟମ ଜରିଆରେ କର୍ମୀମାନଙ୍କୁ ଧୈର୍ଯ୍ୟ ରଖିବାକୁ ବିଧାୟକ ନିବେଦନ କରିଛନ୍ତି। ବିଧାୟକ ଶତପଥୀ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ଟିକେଟ ମିଳୁ ବା ନ ମିଳୁ ସେ ବିଜୁ ଜନତା ଦଳରେ ରହିବେ। ମୁଖ୍ୟମନ୍ତ୍ରୀଙ୍କ ନିଷ୍ପତ୍ତିକୁ ସମ୍ମାନ ଜଣାଉଛନ୍ତି। ବଡ଼ଚଣାବାସୀଙ୍କ ସହିତ ତାଙ୍କର ଏକ ଭାବାବେଗର ସମ୍ପର୍କ ରହିଛି। ବଡ଼ଚଣାର ପ୍ରତ୍ୟେକ ପରିବାର ସହିତ ଜଡିତ ଅଛନ୍ତି। ତାଙ୍କୁ ସେମାନେ ଏତେ ଭଲ ପାଆନ୍ତି ଯେ, ୧୯୯୦ରୁ ବିଧାୟକ ଭାବେ ନିର୍ବାଚିତ କରିଆସୁଛନ୍ତି। ପ୍ରତ୍ୟେକ ଥର ଭୋଟ ପରିମାଣ ବଢ଼ିଚାଲିଛି। ସେମାନଙ୍କ ଭଲ ପାଇବାକୁ ଭୁଲି ହେବ ନାହିଁ। ଯେତେଦିନ ବଞ୍ଚିଥିବେ ବଡ଼ଚଣାବାସୀଙ୍କ ସେବା କରିବେ। ତେଣୁ ସମୟର ଗତିକୁ ନେଇ ଧୈର୍ଯ୍ୟ ରଖିବାକୁ ପ୍ରତ୍ୟେକ କର୍ମୀଙ୍କୁ ସେ ପରାମର୍ଶ ଦେଇଛନ୍ତି।