ନୂଆଦିଲ୍ଲୀ,୧୦।୧୦: ୱେଷ୍ଟଇଣ୍ଡିଜର ବିସ୍ଫୋରକ ବ୍ୟାଟ୍ସମ୍ୟାନ କ୍ରିସ୍ ଗେଲ୍ ଟି-୨୦ ବିଶ୍ୱକପ୍ ପୂର୍ବରୁ ବଡ଼ ଭବିଷ୍ୟବାଣୀ କରିଛନ୍ତି। ଭାରତ ବିଶ୍ୱକପ ଜିତିବା ସମ୍ଭାବନା ସହ ଜଡିତ ଏକ ପ୍ରଶ୍ନର ଉତ୍ତରରେ କ୍ରିସ୍ ଗେଲ୍ କହିଛନ୍ତି, ଅଷ୍ଟ୍ରେଲିଆରେ ଅନୁଷ୍ଠିତ ହେବାକୁ ଥିବା ଟି-୨୦ ବିଶ୍ୱକପ୍ରେ ଭାରତ ଫାଇନାଲରେ ପ୍ରବେଶ କରିପାରିବ ନାହିଁ।
ସେ କହିଛନ୍ତି, ଟି-୨୦ ବିଶ୍ୱକପ ଜିତିବା ପାଇଁ ଭାରତ ଏକ ପ୍ରତିଦ୍ୱନ୍ଦ୍ୱୀ, କିନ୍ତୁ ୱେଷ୍ଟଇଣ୍ଡିଜ ଭାରତଠାରୁ ଅଧିକ ସମ୍ଭାବନା ରହିଛି। ଅଷ୍ଟ୍ରେଲିଆ ଏବଂ ୱେଷ୍ଟଇଣ୍ଡିଜ ମଧ୍ୟରେ ଫାଇନାଲ ମ୍ୟାଚ ହେବ ବୋଲି ସେ ପୂର୍ବାନୁମାନ କରିଛନ୍ତି। କିରନ ପୋଲାର୍ଡ, ଆଣ୍ଡ୍ରେ ରସେଲ ଏବଂ ଡ୍ବେନ ବ୍ରାଭୋଙ୍କ ଭଳି ଖେଳାଳିଙ୍କ ଅନୁପସ୍ଥିତିରେ ଇଣ୍ଡିଜ ଦଳ ଫାଇନାଲରେ ପହଞ୍ଚିବା ବାଟରେ ନିଶ୍ଚିତ କିଛି ଅସୁବିଧାର ସମ୍ମୁଖୀନ ହେବ। କିନ୍ତୁ ଦଳ ଏହି ସମସ୍ୟାର ସମାଧାନ କରିବ ବୋଲି ସେ କହିଛନ୍ତି।
କ୍ରିସ୍ ଗେଲ୍ ଏଥର ୱେଷ୍ଟଇଣ୍ଡିଜ ଟି-୨୦ ବିଶ୍ୱକପ ଦଳର ଏକ ଅଂଶ ନାହାନ୍ତି। ଗତ ବର୍ଷ ବିଶ୍ୱକପରୁ ସେ ଇଣ୍ଡିଜ ଦଳରୁ ଦୂରେଇ ରହିଛନ୍ତି। ସେ ଗତ ବର୍ଷ ବିଶ୍ୱକପରେ କୌଣସି ବିଶେଷ ପ୍ରଦର୍ଶନ କରିପାରି ନ ଥିଲେ। ଗତ ଟି-୨୦ ବିଶ୍ୱକପ ପରଠାରୁ ଆଣ୍ଡ୍ରେ ରସେଲ ୱେଷ୍ଟଇଣ୍ଡିଜ ପାଇଁ ଖେଳି ନାହାନ୍ତି।
ଏଥର ଇଣ୍ଡିସ ଦଳ ନିକୋଲାସ ପୁରାନଙ୍କ ନେତୃତ୍ୱରେ ଟି-୨୦ ବିଶ୍ୱକପ ଖେଳିବେ। ଗେଲ୍, ବ୍ରାଭୋ ଏବଂ ରସେଲଙ୍କ ପରି ଭେଟେରାନ ଏହି ଦଳରେ ନ ଥିଲେ ମଧ୍ୟ ଏକରୁ ଅଧିକ ଟି-୨୦ ବିଶେଷଜ୍ଞ ଖେଳାଳି ଅଛନ୍ତି। ଦଳର ବ୍ୟାଟ୍ସମ୍ୟାନ, ଅଲରାଉଣ୍ଡର ଏବଂ ଦ୍ରୁତ ବୋଲରଙ୍କ ଭଲ ସନ୍ତୁଳନ ରହିଛି।