ନୂଆଦିଲ୍ଲୀ,୨୨।୧୦: ଆଇସିସି ଟି -୨୦ ବିଶ୍ୱକପ ୨୦୨୧ର ସୁପର -୧୨ ମ୍ୟାଚ ଅକ୍ଟୋବର ୨୩ରୁ ଆରମ୍ଭ ହେବ, କିନ୍ତୁ ଏହା ପୂର୍ବରୁ ଅଷ୍ଟ୍ରେଲିଆର ପୂର୍ବତନ କ୍ରିକେଟର ବ୍ରାଡ ହଗ ଏକ ବଡ଼ ଭବିଷ୍ୟବାଣୀ କରିଛନ୍ତି। ସେ ଟୁର୍ନାମେଣ୍ଟର ସେମିଫାଇନାଲ ପୂର୍ବାନୁମାନ କରିଛନ୍ତି। ହଗ୍ କହିଛନ୍ତି, ଚଳିତ ଟି-୨୦ ବିଶ୍ୱକପ୍ର ସେମିଫାଇନାଲ୍ ଭାରତ, ପାକିସ୍ତାନ, ୱେଷ୍ଟଇଣ୍ଡିଜ ଏବଂ ଇଂଲଣ୍ଡ ଖେଳିବେ।
ଦୀପ ଦାସଗୁପ୍ତାଙ୍କ ୟୁଟ୍ୟୁବ ଶୋ ‘ଦୀପପଏଣ୍ଟ’ରେ ବ୍ରାଡ ହଗ କହିଛନ୍ତି, ଗ୍ରୁପ -୧ରୁ ୱେଷ୍ଟଇଣ୍ଡିଜ ଏବଂ ଇଂଲଣ୍ଡ ଓ ଗ୍ରୁପ-୨ରୁ ପାକିସ୍ତାନ ଏବଂ ଭାରତ ସେମିଫାଇନାଲ୍ ଖେଳିବାର ସମ୍ଭାବନା ରହିଛି। ସବୁଠାରୁ କୌତୁହଳର ବିଷୟ ହେଉଛି ଯେ ବ୍ରାଡ ହଗ ନିଜ ଦେଶ ଅଷ୍ଟ୍ରେଲିଆକୁ ଆଇସିସି ଟି -୨୦ ବିଶ୍ୱକପ ୨୦୨୧ ର ସେମିଫାଇନାଲ ପାଇଁ ପ୍ରତିଯୋଗୀ ତାଲିକାରେ ଅନ୍ତର୍ଭୁକ୍ତ କରିନାହାଁନ୍ତି।ସେମିଫାଇନାଲରେ ପ୍ରବେଶ କରିବା ପାଇଁ ପାକିସ୍ତାନକୁ ଭାରତ ବିପକ୍ଷ ପ୍ରଥମ ମ୍ୟାଚ ଜିତିବାକୁ ପଡିବ ବୋଲି ବ୍ରାଡ ହଗ କହିଛନ୍ତି । ଯଦି ପାକିସ୍ତାନ ଭାରତ ବିପକ୍ଷ ପ୍ରଥମ ମ୍ୟାଚ ହାରିଯାଏ ତେବେ ସେମାନଙ୍କୁ ଆଗକୁ ବଢିବା କଷ୍ଟକର ହେବ।
ଭାରତ ଏବଂ ପାକିସ୍ତାନ ମଧ୍ୟରେ ଆଇସିସି ଟି -୨୦ ବିଶ୍ୱକପ ୨୦୨୧ ହାଇ ଭୋଲଟେଜ ମ୍ୟାଚ ୨୪ ଅକ୍ଟୋବରରେ ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯିବ। ସମସ୍ତ କ୍ରିକେଟ ପ୍ରଶଂସକ ଉତ୍ସାହର ସହିତ ଏହି ମ୍ୟାଚକୁ ଅପେକ୍ଷା କରିଛନ୍ତି।