ନୂଆଦିଲ୍ଲୀ,୨୪।୪: ନ୍ୟାୟିକ ବ୍ୟବସ୍ଥାକୁ ନେଇ ଦେଇଥିବା ମନ୍ତବ୍ୟ ପାଇଁ ପୂର୍ବତନ ଆଇପିଏଲ ଅଧ୍ୟକ୍ଷ ଲଲିତ ମୋଦିଙ୍କୁ ସୁପ୍ରିମକୋର୍ଟରୁ ଆଶ୍ୱସ୍ତି ମିଳିଛି। ବିନା ସର୍ତ୍ତରେ କ୍ଷମା ପ୍ରାର୍ଥନା କରିବା ପରେ ସୁପ୍ରିମକୋର୍ଟ ଲଲିତ ମୋଦିଙ୍କ ବିରୋଧରେ ଅବମାନନା ପ୍ରକ୍ରିୟା ବନ୍ଦ କରି ଦେଇଛନ୍ତି। ସୁପ୍ରିମକୋର୍ଟ କହିଛନ୍ତି, ଭବିଷ୍ୟତରେ ଲଲିତ ମୋଦି ଏପରି କୌଣସି କାର୍ଯ୍ୟକଳାପ କରିବେ ନାହିଁ, ଯାହା ନ୍ୟାୟପାଳିକାର ଭାବମୂର୍ତ୍ତିକୁ କ୍ଷୁର୍ଣ୍ଣ କରିବ।
ଏପ୍ରିଲ ୧୩ରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଲଲିତ ମୋଦି ସୁପ୍ରିମକୋର୍ଟ ଏବଂ ନ୍ୟାୟପାଳିକାର ଭାବମୂର୍ତ୍ତିକୁ କ୍ଷୁର୍ଣ୍ଣ କରିଥିବା ଟୁଇଟ୍ ପାଇଁ କ୍ଷମା ମାଗିଛନ୍ତି। ବିଚାରପତି ଏମ. ଆର୍. ଶାହ ଏବଂ ସି. ଟି. ରବିକୁମାର ଲଳିତ ମୋଦି ଫାଇଲ କରିଥିବା ପିଟିସନ ଉପରେ ଧ୍ୟାନ ଦେଇଥିଲେ। ପିଟିସନ୍ରେ ଉଲ୍ଲେଖ ଥିଲା, ଅଦାଲତଙ୍କ ଗରିମା ଅଥବା ମର୍ଯ୍ୟାଦା କିମ୍ବା ଭାରତୀୟ ନ୍ୟାୟିକ ବ୍ୟବସ୍ଥାର ଅବମାନନା ହେବା ଭଳି କୌଣସି ପ୍ରକାର କାର୍ଯ୍ୟ ଭବିଷ୍ୟତରେ କରିବି ନାହିଁ।