ମାଳଦ୍ୱୀପକୁ ବଡ଼ ଝଟକା: ୧୦,୫୦୦ ହୋଟେଲ ବୁକିଂ-୫,୫୨୦ ଫ୍ଲାଇଟ ଟିକେଟ ବାତିଲ କଲେ ଭାରତୀୟ…

ନୂଆଦିଲ୍ଲୀ,୯।୧ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଲାକ୍ଷାଦ୍ୱୀପ ଗସ୍ତ ପରେ ସୋସିଆଲ ମିଡିଆରେ ଶେୟାର କରିଥିବା ଫଟୋ ପରେ ମାଳଦ୍ୱୀପ ଉପରେ ଦେଇଥିବା ବିବୃତ୍ତିରୁ ଆରମ୍ଭ ହୋଇଥିବା ବିବାଦ ସମାପ୍ତ ହେବାର ନା ଧରୁନି। ପ୍ରଧାନମନ୍ତ୍ରୀ ମୋଦିଙ୍କ ଉପରେ ମାଳଦ୍ୱୀପର ଅନେକ ନେତାଙ୍କ ଆପତ୍ତିଜନକ ମନ୍ତବ୍ୟ ପରେ ଭାରତୀୟମାନେ ମାଳଦ୍ୱୀପ ବୟକଟ ଅଭିଯାନ ଆରମ୍ଭ କରିଛନ୍ତି। ଭାରତୀୟମାନେ ପ୍ରତ୍ୟେକ ସୋସିଆଲ ମିଡିଆ ପ୍ଲାଟଫର୍ମରେ ଲାକ୍ଷାଦ୍ୱୀପର ଫଟୋ ଶେୟାର କରିବା ସହ ଏହାର ସୌନ୍ଦର୍ଯ୍ୟକୁ ପ୍ରଶଂସା କରୁଛନ୍ତି। ଭାରତୀୟଙ୍କ ଏହି ଅସନ୍ତୋଷ ଯୋଗୁ ଗତ ତିନି ଦିନ ମଧ୍ୟରେ ମାଳଦ୍ୱୀପ ପର୍ଯ୍ୟଟନ ଶିଳ୍ପ ଏକ ବଡ଼ ଝଟକା ପାଇଛି।

ପ୍ରଧାନମନ୍ତ୍ରୀଙ୍କ ଉପରେ ଆପତ୍ତିଜନକ ମନ୍ତବ୍ୟ ପରେ କ୍ରୋଧିତ ହୋଇ ଭାରତୀୟମାନେ ମାଳଦ୍ୱୀପ ଯାତ୍ରାକୁ କ୍ରମାଗତ ଭାବରେ ବାତିଲ କରୁଛନ୍ତି। ସେମାନେ ମାଳଦ୍ୱୀପ ପରିବର୍ତ୍ତେ ଲାକ୍ଷାଦୀପକୁ ଅଗ୍ରାଧିକାର ଦେଉଛନ୍ତି। ଫଳସ୍ବରୂପ, ଭାରତୀୟମାନେ ଏପର୍ଯ୍ୟନ୍ତ ୧୦,୫୦୦ ହୋଟେଲ ବୁକିଂ ଏବଂ ମାଲଦ୍ୱୀପ ପାଇଁ ୫,୫୨୦ ବିମାନ ଟିକେଟ ବାତିଲ କରିଛନ୍ତି। ଏକ ଗଣମାଧ୍ୟମ ରିପୋର୍ଟ ଅନୁଯାୟୀ, ମାଳଦ୍ୱୀପ ପ୍ରତି ଭାରତୀୟଙ୍କ ଉପରେ ଅସନ୍ତୋଷ ବଢ଼ିବାରେ ଲାଗିଛି। ଭାରତ ସହ ସମ୍ପର୍କ ନଷ୍ଟ ହେବା ମାଳଦ୍ୱୀପର ଅର୍ଥନୀତି ଉପରେ ସିଧାସଳଖ ପ୍ରଭାବ ପକାଇବାକୁ ଯାଉଛି। ତେବେ ଭାରତୀୟଙ୍କ ଏହି ପଦକ୍ଷେପ ଭାରତୀୟ ପର୍ଯ୍ୟଟନ ପାଇଁ ଏକ ଲାଇଫ ଲାଇନ ଭାବରେ ବିବେଚନା କରାଯାଉଛି। କାରଣ ଅଧିକାଂଶ ଭାରତୀୟ ବର୍ତ୍ତମାନ ମାଳଦ୍ୱୀପ ପରିବର୍ତ୍ତେ ଲାକ୍ଷାଦ୍ୱୀପ ଯିବାକୁ ପସନ୍ଦ କରୁଛନ୍ତି।