ମୁମ୍ବାଇ,୧୯।୩: ମହାରାଷ୍ଟ୍ରର ଗାଡଚିରୋଲିରେ ନକ୍ସଲମାନଙ୍କ ସହ ହୋଇଥିବା ଏନକାଉଣ୍ଟରରେ ପୋଲିସ ବଡ଼ ସଫଳତା ହାସଲ କରିଛି। ଏହି ଏନକାଉଣ୍ଟରରେ ସି୬୦ କମାଣ୍ଡୋଙ୍କ ଗୁଳିରେ ୪ ଜଣ ନକ୍ସଲ ନିହତ ହୋଇଛନ୍ତି। ଗାଡଚିରୋଲି ଜିଲାର ଏସପି ନୀଲୋତ୍ପଳଙ୍କ ଅନୁଯାୟୀ. ସୋମବାର ଅପରାହ୍ନରେ ତେଲେଙ୍ଗାନା ରାଜ୍ୟ କମିଟିର କିଛି ସଦସ୍ୟ ଆସନ୍ତା ଲୋକ ସଭା ନିର୍ବାଚନରେ ବିଶୃଙ୍ଖଳା ସୃଷ୍ଟି କରିବାକୁ ଷଡଯନ୍ତ୍ର କରିଥିବା ନେଇ ଗୁପ୍ତ ସୂଚନା ମିଳିଛି। ନକ୍ସଲମାନଙ୍କ ଏକ ଟିମ୍ ତେଲେଙ୍ଗାନାରୁ ଗାଡଚିରୋଲିର ପ୍ରାଣହିତା ନଦୀ ପାର ହୋଇ ଜିଲାକୁ ଆସିଛନ୍ତି।
ସୂଚନା ମିଳିବା ହେବା ମାତ୍ରେ ଅତିରିକ୍ତ ଏସପି ଅପ୍ସ ୟତିଶ ଦେଶମୁଖଙ୍କ ନେତୃତ୍ୱରେ ଆହେରୀ ସବ ପୋଲିସ ମୁଖ୍ୟାଳୟରୁ ସି୬୦ ଏବଂ ସିଆରପିଏଫ୍ QATର ଅନେକ ଟିମ ପଠାଯାଇଥିଲା। ଆଜି ସକାଳେ ଏସପିଏସ ରେପାନପାଲ୍ଲୀ ଠାରୁ ୫ କିଲୋମିଟର ଦୂରରେ ଥିବା କୋଲାମାର୍କା ପର୍ବତରେ ଖୋଜାଖୋଜି ବେଳେ ନକ୍ସଲମାନେ ସି୬୦ ଟିମ୍ ଉପରେ ଗୁଳି ଚଳାଇଥିଲେ। ଏଥିରେ ସି୬୦ ଦଳ ଦୃଢ ପ୍ରତିକ୍ରିୟା ପ୍ରକାଶ କରି ୪ ଜଣ ନକ୍ସଲଙ୍କୁ ଗୁଳି କରିଥିଲେ।