ମୁମ୍ବାଇ: ଲୋକପ୍ରିୟ ରିୟଲିଟି ଶୋ’ ବିଗ୍ବସର ପ୍ରଶଂସକଙ୍କୁ ବଡ଼ ଝଟ୍କା। ଚଳିତ ବର୍ଷ ଶେଷ ସୁଦ୍ଧା ବିଗ୍ବସ ସିଜିନ ୧୪ ଦର୍ଶକଙ୍କୁ ମନୋରଞ୍ଜନ କରିବାକୁ ଆସିବ ବୋଲି ଅନୁମାନ କରାଯାଉଥିଲା। ନିକଟରେ ଲଗାତର ଭାବେ ଏହି ଶୋ’ର ଟିଜର ଓ ପ୍ରୋମୋ ମଧ୍ୟ ପ୍ରସାରିତ ହୋଇଥିଲା। କିନ୍ତୁ ବର୍ତ୍ତମାନ ଖବର ଆସିଛି ଯେ, ଏହି ଶୋ’ର ପ୍ରସାରଣକୁ ଏବେ ସ୍ଥଗିତ ରଖାଯାଇଛି। ପୂର୍ବରୁ ଚଳିତ ବର୍ଷ ସେପ୍ଟେମ୍ବର ଶେଷ ସୁଦ୍ଧା ବିଗ୍ବସ ଆରମ୍ଭ ହେବ ବୋଲି ଚର୍ଚ୍ଚା ହେଉଥିଲା। ହେଲେ ଏବେ ଏହାର ପ୍ରସାରଣକୁ ଅକ୍ଟୋବରକୁ ଘୁଞ୍ଚାଇ ଦିଆଯାଇଛି। କାରଣ ଗତ ସପ୍ତାହରୁ ମୁମ୍ବାଇରେ ଲଗାତର ଭାବେ ପ୍ରବଳ ବର୍ଷା ଜାରି ରହିଛି। ଏଥିଯୋଗୁ ଶୁଟିଂ ସେଟ୍ରେ ମରାମତି କାର୍ଯ୍ୟ ନଷ୍ଟ ହୋଇଥିବା ବେଳେ ବର୍ଷା ଯୋଗୁ ଏହାର ପୁନଃ ମରାମତି କାର୍ଯ୍ୟ ବିଳମ୍ବ ହେଉଛି। ଫଳରେ ଏହି ଶୋ’କୁ ବିଳମ୍ବଳରେ ପ୍ରସାରଣ କରିବାକୁ ଚ୍ୟାନେଲ ଓ ପ୍ରଯୋଜକ ନିଷ୍ପତ୍ତି ନେଇଥିବା ସୂଚନା ରହିଛି। ପ୍ରତିଯୋଗୀଙ୍କ ପାଇଁ ଏହି ସେଟ୍ ଏବେ ସମ୍ପୂର୍ଣ୍ଣ ପ୍ରସ୍ତୁତ ହୋଇପାରିନାହିଁ। ଶୁଟିଂ ସେଟରେ ସମସ୍ତ ସତର୍କତା ଅବଲମ୍ବନ କରାଯାଉଥିବା ବେଳେ ଅକ୍ଟୋବର ୪ରୁ ଏହି ଶୋ’କୁ ଲାଇଭ୍ ଟେଲିକାଷ୍ଟ କରିବା ପାଇଁ ଯୋଜନା କରାଯାଉଛି ବୋଲି ଜଣାପଡ଼ିଛି। ତେବେ ବର୍ତ୍ତମାନ ଏହାର ପ୍ରିମିୟରକୁ ନେଇ ସନ୍ଦେହ ରହିଛି।
