ମୁମ୍ବାଇ: ଛୋଟ ପରଦାର ଫେମଶ ଅମିନେତ୍ରୀଙ୍କ କଥା ଯଦି ଆଲୋଚନା କରାଯାଏ ତେବେ ଉର୍ବଶୀ ଢୋଲକିଆଙ୍କ ନାମ ନିଶ୍ଚିତ ଭାବେ ଆସିବ । ଏବେ ଉର୍ବଶୀଙ୍କୁ ନେଇ ଏକ ବଡ ଖବର ଆସିଛି । ସୂଚନା ଅନୁଯାୟୀ, ମୁମ୍ବାଇରେ ଉର୍ବଶୀଙ୍କ କାର ଦୁର୍ଘଟଣାର ଶିକାର ହୋଇଛି । ହେଲେ ଏଥିରେ ଉର୍ବଶୀଙ୍କର ସେମିତି କିଛି କ୍ଷତି ହୋଇନାହିଁ । ସୂଚନାଯୋଗ୍ୟ, ଉର୍ବଶୀ ଡୋଲକିଆ ସୁପରଷ୍ଟାର ସଲମାନ ଖାଁଙ୍କ ଶୋ’ ବିଗବସ ୬ର ୱିନର ହୋଇଥିଲେ ।
ସମାଚାର ଏଜେନ୍ସି ଏଏନଆଇର ରିପୋର୍ଟ ଅନୁଯାୟୀ, ଉର୍ବଶୀଙ୍କ ଏହି ଦୁର୍ଘଟଣା ଶନିବାର ହୋଇଛି । ସେ ଶୁଟିଂ ପାଇଁ ମୁମ୍ବାଇର ମିରା ରୋଡ ସ୍ଥିତ ଫିଲ୍ମ ଷ୍ଟୁଡିଓକୁ ଯାଉଥିବା ବେଳେ କାଶିମିରା ଅଞ୍ଚଳରେ ପିଲାମାନଙ୍କୁ ନେଇ ଯାଉଥିବା ଏକ ସ୍କୁଲ ବସ ପଛରୁ ତାଙ୍କ କାର ସହ ଧକ୍କା ହୋଇଥିଲା । ଏହି ଦୁର୍ଘଟଣାରୁ ଉର୍ବଶୀ ଓ ତାଙ୍କ ଷ୍ଟାଫ ମେମ୍ବର୍ସ ଅଳ୍ପକେ ବର୍ତ୍ତି ଯାଇଛନ୍ତି । ତେବେ ଦୁର୍ଘଟଣା ଘଟାଇଥିବା ଗାଡି ଏକ ସ୍କୁଲ ବସ ହୋଇଥିବାରୁ ଉର୍ବଶୀ ଏହାକୁ ନେଇ କୌଣସି ଆଇନଗତ କାର୍ଯ୍ୟାନୁଷ୍ଠାନକୁ ମନା କରି ଦେଇଛନ୍ତି ।
ଏହି ଦୁର୍ଘଟଣାରେ ଉର୍ବଶୀଙ୍କର ସେମିତି କିଛି କ୍ଷତି ହୋଇ ନ ଥିଲେ ମଧ୍ୟ କିଛି ସମୟ ପାଇଁ ରେଷ୍ଟ ନେବାକୁ ଡାକ୍ତର ତାଙ୍କୁ ପରାମର୍ଶ ଦେଇଛନ୍ତି ।