ଓ୍ବାଶିଂଟନ୍: ସାରା ବିଶ୍ୱରେ ତାପମାତ୍ରା ବୃଦ୍ଧି ଚିନ୍ତାର କାରଣ ପାଲଟିଛି। କ୍ରମବର୍ଦ୍ଧିଷ୍ଣୁ ବିଶ୍ୱତାପନ ଓ ଜଳବାୟୁ ପରିବର୍ତ୍ତନଜନିତ ପ୍ରଭାବ କେବଳ ମଣିଷ, ଜୀବଜନ୍ତୁ ଓ ବୃକ୍ଷଲତାଙ୍କୁ ପ୍ରଭାବିତ କରିନାହିଁ ବରଂ ହିମାଳୟ ଓ ବିଶ୍ୱର ବୃହତ୍ ହିମବାହ ମଧ୍ୟ ଏହି ସଙ୍କଟ ଯୋଗୁ କ୍ଷୟ ହେବାରେ ଲାଗିଛି। ପୃଥିବୀର ସବୁଠାରୁ ବଡ଼ ଗ୍ଲେସିୟର୍ କୁହାଯାଉଥିବା ‘ଆଣ୍ଟାର୍କଟିକ୍ ଏ-୭୬ଏ’ ଆଗାମୀ ଦିନରେ ସମ୍ପୂର୍ଣ୍ଣ ଭାବେ ତରଳିଯିବ ବୋଲି ଆମେରିକାର ମହାକାଶ ଗବେଷଣା ସଂସ୍ଥା ନାସା ଆଶଙ୍କା ବ୍ୟକ୍ତ କରିଛି।
ବିଶ୍ୱ ତାପମାତ୍ରା ବୃଦ୍ଧି ସକାଶେ ହିମବାହ ତରଳିବାରେ ଲାଗିଛି, ଯାହାକୁ ନେଇ ଆଗାମୀ ଦିନରେ ପ୍ରାକୃତିକ ବିପର୍ଯ୍ୟୟର ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ। ସେହିପରି ପୃଥିବୀର ସର୍ବବୃହତ୍ ହିମବାହ କୁହାଯାଉଥିବା ‘ଆଣ୍ଟାର୍କଟିକ୍ ଆଇସ୍ବର୍ଗ ଏ-୭୬ଏ’ରେ ମଧ୍ୟ ତାପମାତ୍ରା ବୃଦ୍ଧିର ପ୍ରଭାବ ପଡ଼ିଛି। ଦିନକୁ ଦିନ ଏହି ସର୍ବବୃହତ୍ ହିମବାହର ଆୟତନ କମିବାରେ ଲାଗିଛି। ଆଗକୁ ଆଣ୍ଟାର୍କଟିକ୍ ଏ-୭୬ଏ ସମ୍ପୂର୍ଣ୍ଣ ଭାବେ କ୍ଷୟ ହୋଇଯିବା ନେଇ ଆମେରିକୀୟ ମହାକାଶ ଗବେଷଣା ସଂସ୍ଥା ପକ୍ଷରୁ କୁହାଯାଇଛି। ନାସା ଜାରି କରିଥିବା ସାଟେଲାଇଟ୍ ଚିତ୍ରରୁ ଏହା ସ୍ପଷ୍ଟ ଭାବେ ଦୃଷ୍ଟିଗୋଚର ହେଉଛି।
ଆଣ୍ଟାର୍କଟିକ୍ ଏ-୭୬ଏ ହିମବାହର ଲମ୍ବ ୧୩୫ କିଲୋମିଟର ହୋଇଥିବାବେଳେ ଏହାର ପ୍ରସ୍ଥ ୨୬ କିଲୋମିଟର। ଶେଷଥର ପାଇଁ ୨୦୨୧ରେ ଏହାର ମାପ କରାଯାଇଥିଲା। ଏହାର ଆୟତନ ଲଣ୍ଡନର ଆୟତନଠାରୁ ଦୁଇଗୁଣା ବୋଲି ଆମେରିକା ନ୍ୟାଶନାଲ ଆଇସ୍ ସେଣ୍ଟର କହିଛି। ୨୦୨୧ ମେ ରେ ଆଣ୍ଟାର୍କଟିକା ମହାଦେଶର ପଶ୍ଚିମଭାଗରେ ଥିବା ରୋନେ ଆଇସ୍ ସେଲ୍ଫ ୩ ବିରାଟ ଖଣ୍ଡ ୭୬ଏ, ୭୬ବି ଏବଂ ୭୬ସିରେ ଭାଗ ହୋଇଥିଲା। ଏଗୁଡ଼ିକ ମଧ୍ୟରୁ ୭୬ଏ ଥିଲା ସବୁଠାରୁ ବଡ଼ ହିମବାହ। ହିମବାହ ସମୁଦ୍ରର ବରଫ ନୁହେଁ। ଭାସମାନ ଅବସ୍ଥାରେ ଥିବା ବରଫର ବିରାଟ ଖଣ୍ଡକୁ ହିମବାହ ବା ଆଇସ୍ବର୍ଗ କୁହାଯାଏ।
ଗତ ଅକ୍ଟୋବର ୩୧ରେ ନାସାର ଟେରା ସାଟେଲାଇଟ୍ ‘ଆଣ୍ଟାର୍କଟିକ୍ ଏ-୭୬ଏ’ ହିମବାହର ଫଟୋ ଉତ୍ତୋନଳ କରିଛି। ଆଣ୍ଟାର୍କଟିକାର ଏଲିଫ୍ୟାଣ୍ଟ ଦ୍ୱୀପ ଏବଂ ସାଉଥ୍ ଓର୍କେନି ଦ୍ୱୀପ ମଧ୍ୟରେ ବିଶ୍ୱର ଏହି ସର୍ବବୃହତ୍ ହିମବାହ ଅବସ୍ଥିତ। ତାପମାତ୍ରା ଯୋଗୁ ହିମବାହ ଆୟତନ କମୁଥିବାବେଳେ ଆଗାମୀ ଦିନରେ ଏହା ନିଜ ଅବସ୍ଥିତିଠାରୁ ଉତ୍ତର ଦିଗ ଆଡ଼କୁ ଗତି କରିବ ବୋଲି ସାଟେଲାଇଟ୍ ଚିତ୍ର ଦେଖି ବିଶେଷଜ୍ଞମାନେ ଅନୁମାନ କରିଛନ୍ତି।