ପାଟନା,୨୩ ।୧୦: ବିଧାନସଭା ନିର୍ବାଚନ ପାଇଁ ଉଠୁଛି ପଡୁଛି ବିହାର । ସବୁଦଳ ଭୋଟରଙ୍କୁ ନିଜ ଆଡକୁ ଆକର୍ଷିତ କରିବାକୁ ରାଲିର ଆୟୋଜନ କରିଛନ୍ତି । ଶୁକ୍ରବାର ଗୋଟିଏ ପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏନ୍ଡିଏ ପ୍ରଚାରର ମଙ୍ଗ ଧରିଥିବା ବେଳେ ଅନ୍ୟପଟେ ମହାମେଣ୍ଟର ରାଲିରେ ଯୋଗ ଦେଇଛନ୍ତି କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ । ରାଷ୍ଟ୍ରୀୟ ଜନତା ଦଳ(ଆର୍ଜେଡି) ନେତା ତେଜସ୍ୱୀ ଯାଦବଙ୍କ ସହ ମିଶି ନବାଦରେ ଏକ ନିର୍ବାଚନ ରାଲିକୁ ସମ୍ବୋଧିତ କରିଛନ୍ତି ରାହୁଲ । ସେଠାରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ବର୍ଷିଛନ୍ତି । ଭାରତ-ଚାଇନା ସୀମା ବିବାଦଠାରୁ ଲକ୍ଡାଉନ ସମୟରେ ପ୍ରବାସୀ ଶ୍ରମିକଙ୍କ କଥା ଉଠାଇଛନ୍ତି । ଅନ୍ୟପଟେ ନିର୍ବାଚନରେ ବିଜୟ ଲାଭ କଲେ ରୋଜଗାର ଦେବାର ପ୍ରତିଶ୍ରୁତି ଦେଇଛନ୍ତି ତେଜସ୍ୱୀ । ରାହୁଲ କହିଛନ୍ତି ଯେତେବେଳେ କରୋନା ମହାମାରୀ ଯୋଗୁ ଦେଶରେ ଲାଗୁ କରାଯାଇଥିବା ଲକ୍ଡାଉନ ସମୟରେ ପ୍ରବାସି ଶ୍ରମିକ ଜୀବିକା ହରାଇ ପଳାୟନ କରୁଥିଲେ ସେତେବେଳେ ପ୍ରଧାନମନ୍ତ୍ରୀ କେଉଁଠି ଥିଲେ । ସେମାନଙ୍କ ସମସ୍ୟା ବୁଝିପାରି ନ ଥିଲେ ଏହାହିଁ ସତ୍ୟ । ତେଣୁ ଏହି ସତ୍ୟତାକୁ ବିହାରବାସୀ ଭଲଭାବେ ବୁଝିଛନ୍ତି ଓ ଏହି ନିର୍ବାଚନରେ ସେମାନେ ତା’ର ଉତ୍ତର ଦେବେ ବୋଲି ରାହୁଲ କହିଛନ୍ତି । ସୂଚନାଯୋଗ୍ୟ, ରାହୁଲଙ୍କର ଏହା ପ୍ରଥମ ରାଲି ।
