ମୁଜଫରପୁର,୧୯।୫: ବିହାରରେ କରୋନା ସ୍ଥିତି ଅଣାୟତ୍ତ ହେବାରେ ଲାଗିଥିବା ବେଳେ ଏବେ ଏହାର ପ୍ରଭାବ ଗ୍ରାମାଞ୍ଚଳରେ ମଧ୍ୟ ଦେଖିବାକୁ ମିଳିଛି। ରାଜ୍ୟ ଗ୍ରାମାଞ୍ଚଳର ପଞ୍ଚାୟତରେ ଥିବା ସ୍ବାସ୍ଥ୍ୟକେନ୍ଦ୍ରଗୁଡ଼ିକର ଅବସ୍ଥା ନ କହିଲେ ଭଲ। ଏଭଳି ସ୍ଥିତିରେ କିଭଳି ସେଠାରେ କରୋନା ଚିକିତ୍ସା ହୋଇପାରିବ ତାହା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏଭଳି ସ୍ଥିତିରେ ମୁଜଫରପୁର ଜିଲାର ସରମସପୁର ପଞ୍ଚାୟତରେ ଗତ ୨୬ ଦିନରେ ୩୭ଜଣ ଲୋକଙ୍କ ମୃତ୍ୟୁ ଘଟିଥିବା ଜଣାପଡ଼ିଛି। ଲଗାତାର ଭାବେ ଲୋକଙ୍କ ମୃତ୍ୟୁ ହୋବରୁ ଗାଁରେ ଭୟର ବାତାବରଣ ଖେଳିଯାଇଛି। ସୂଚନା ମୁତାବକ ସରମସପୁର ପଞ୍ଚାୟତରେ ମାସକ ଅନ୍ତରାଳରେ ପାଖାପାଖି ୩୭ଜଣଙ୍କ ଜୀବନ ହାନି ଘଟିଥିବା ବେଳେ ଲୋକମାନେ ଭୟଭୀତ ହୋଇ ଘରୁ ବାହାରକୁ ବାହାରୁ ନାହାନ୍ତି। ଏନେଇ ଗାଁଲୋକଙ୍କୁ ପଚାରିଯିବାରୁ ସେ କହିଛନ୍ତି, ମୃତ୍ୟୁ ହୋଇଥିବା ବ୍ୟକ୍ତିଙ୍କ ମଧ୍ୟରେ ଅନେକ ଲୋକଙ୍କ ନିକଟରେ କରୋନା ଲକ୍ଷଣ ଦେଖାଯାଇଥିଲା। କିନ୍ତୁ କେହି ନିଜର ଯାଞ୍ଚ କରାଇ ନ ଥିଲେ। ଅନ୍ୟପଟେ ଗାଁରେ ଲୋକଙ୍କ ଯାଞ୍ଚ ସୁବିଧା ମଧ୍ୟ ନାହିଁ। ଏନେଇ ପ୍ରଶାସନକୁ ଅବଗତ କରାଇବାରୁ ସେ ଯାଞ୍ଚ କିଟ୍ ନାହିଁ ବୋଲି କହିଥିଲେ। ତେବେ ପ୍ରଶାସନର ଉଦାସୀନତା ଯୋଗୁ ଲୋକଙ୍କ ଟେଷ୍ଟ ଓ ଚିକିତ୍ସା ହୋଇପାରୁନି ବୋଲି ଉକ୍ତ ପଞ୍ଚାୟତର ସରପଞ୍ଚ କହିଛନ୍ତି।
