ପାଟନା,୪।୧୧: ନଭେମ୍ବର ୭ରେ ବିହାର ବିଧାନସଭା ନିର୍ବାଚନର ତୃତୀୟ ତଥା ଅନ୍ତିମ ପର୍ଯ୍ୟାୟ ଅନୁଷ୍ଠିତ ହେବ। ୧୫ ଜିଲାର ୭୮ଟି ଆସନରେ ଏଥିପାଇଁ ଭୋଟିଂ କରାଯିବ। ଭୋଟର ୧୨୦୮ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ। ଏହି ପର୍ଯ୍ୟାୟରେ ଆର୍ଜେଡିର ପ୍ରାର୍ଥୀ ସର୍ବାଧିକ ୪୬ ଆସନରେ ନିର୍ବାଚନ ଲଢୁଛନ୍ତି। ସେହିପରି ୨୫ ଆସନରେ କଂଗ୍ରେସ ପ୍ରାର୍ଥୀ ରହିଛନ୍ତି। ସେହିପରି ସିପିଆଇ ଏମ୍ଏଲ୍ର ୫, ସିପିଆଇର ୨, ଜେଡ଼ିୟୁର ୩୭, ଭାଜପାର ୩୫ ଜଣ ପ୍ରାର୍ଥୀ ରହିଛନ୍ତି। ୨୦୧୫ରେ ଏହି ବିଧାନସଭା ଆସନଗୁଡ଼ିକ ମଧ୍ୟରୁ ଜେଡ଼ିୟୁ ୨୩ରେ ବିଜୟୀ ହୋଇଥିଲା। ସେହିପରି ଆର୍ଜେଡ଼ି ୨୦, କଂଗ୍ରେସ ୧୧, ଭାଜପା ୨୦ ଆସନରେ ବିଜୟୀ ହୋଇଥିଲା। ସିପିଆଇ ଏମ୍ଏଲ୍କୁ ଗୋଟିଏ ଆସନ ମିଳିଥିବାବେଳେ ଅନ୍ୟ ରାଜନୈତିକ ଦଳକୁ ୩ଟି ଆସନ ମିଳିଥିଲା। ତେବେ ଏବେ ପରିସ୍ଥିତି ବଦଳି ଯାଇଛି। ଏହି ଆସନଗୁଡ଼ିକ ମଧ୍ୟରୁ କାହାଖାତାକୁ ଅଧିକ ସଂଖ୍ୟା ଯିବ ସେ ନେଇ ଚର୍ଚ୍ଚା ଜାରି ରହିଛି। ଶେଷ ପର୍ଯ୍ୟୟ ପାଇଁ ବିଭିନ୍ନ ରାଜନୈତିକ ଦଳ ପକ୍ଷରୁ ଭୋଟରଙ୍କୁ ହାତେଇବାର ଉଦ୍ୟମ କରାଯାଉଛି।
