ସୋନପୁର/ବିଜେପୁର,୨୯।୮(ନି.ପ୍ର./ଡି.ଏନ୍.ଏ.): ବରଗଡ଼ ଜିଲା ବିଜେପୁର ଗୋଷ୍ଠୀ ଉନ୍ନୟନ ଅଧିକାରୀ(ବିଡିଓ) ପଦ୍ମନାଭ ସାମନ୍ତରାୟଙ୍କୁ ଭିଜିଲାନ୍ସ ବିଭାଗ ରବିବାର ଗିରଫ କରିଛି। ସନ୍ଧ୍ୟାରେ ତାଙ୍କୁ ବଲାଙ୍ଗୀରର ସ୍ବତନ୍ତ୍ର ଭିଜିଲାନ୍ସ କୋର୍ଟରେ ହାଜର କରାଯାଇଥିଲା। ବିଚାରପତି ଜାମିନ ନାମଞ୍ଜୁର କରିବାରୁ ତାଙ୍କୁ ବଲାଙ୍ଗୀର ଜେଲ ହାଜତକୁ ପଠାଇ ଦିଆଯାଇଛି।
ବିଡିଓ ସାମନ୍ତରାୟ ସକାଳ ୭ଟାରେ ଭିଜିଲାନ୍ସ ହାତରେ ଧରା ପଡ଼ିଥିଲେ। ସେ ମୋଟା ଅଙ୍କର ଟଙ୍କା ଧରି ଏକ କାର୍ରେ ଭୁବନେଶ୍ୱର ପାତ୍ରପଡ଼ାସ୍ଥିତ ବାସଭବନକୁ ଯାଉଥିବା ସମ୍ବଲପୁର ଭିଜିଲାନ୍ସ ଏସ୍ପି ସାରା ଶର୍ମାଙ୍କୁ ବିଶ୍ୱସ୍ତ ସୂତ୍ରରୁ ସୂଚନା ମିଳିଥିଲା। ଏସ୍ପିଙ୍କ ନିର୍ଦ୍ଦେଶ କ୍ରମେ ସୋନପୁର ଭିଜିଲାନ୍ସ ଟିମ୍ ବିନିକା ମହାନଦୀ ସେତୁ ବ୍ରିଜ୍ ଛକରେ ବିଡିଓ ଯାଉଥିବା କାର୍କୁ ଅଟକାଇ ତନଖି କରିଥିଲେ। ବିଡିଓଙ୍କ ବ୍ୟାଗ୍ରୁ ନଗଦ ୩ ଲକ୍ଷ ୫୦ ହଜାର ଟଙ୍କା ମିଳିଥିଲା। ପଚରାଉଚୁରା ସମୟରେ ଏତେ ପରିମାଣର ଟଙ୍କା କେଉଁଠୁ ଆଣିଥିଲେ ତା’ର ସନ୍ତୋଷଜନକ ଉତ୍ତର ବିଡିଓ ଭିଜିଲାନ୍ସ ଅଧିକାରୀଙ୍କୁ ଦେଇପାରି ନ ଥିଲେ। ପରେ ସାମନ୍ତରାୟଙ୍କ ବିଜେପୁରସ୍ଥିତ ଅଫିସ, ଦାୟିତ୍ୱରେ ଥିବା ସିଡିପିଓଙ୍କ ଅଫିସ ଓ ବିଡିଓଙ୍କ ବାସଭବନରେ ଭିଜିଲାନ୍ସର ବରଗଡ଼ ଟିମ୍ ଚଢ଼ାଉ କରିଥିଲା । ବିଡିଓଙ୍କ ସରକାରୀ ବାସଭବନରୁ ନଗଦ ୪୫ ହଜାର ୧୫୦ ଟଙ୍କା ମିଳିଥିଲା। ସେହିପରି ଭିଜିଲାନ୍ସର ଅନ୍ୟ ଟିମ୍ ବିଡିଓଙ୍କ ପରିବାର ରହୁଥିବା ଭୁବନେଶ୍ୱର ପାତ୍ରପଡ଼ାସ୍ଥିତ ବାସଭବନ ଓ ପୁରୀ ଜିଲା ବଳଙ୍ଗା ଥାନା ଗଡ଼ଚାନ୍ଦପୁର ପୈତୃକ ଘରେ ଚଢ଼ାଉ କରିଥିବା ସୂଚନା ମିଳିଛି। ଚଢ଼ାଉ ଜାରି ରହିଥିବା ବେଳେ ବିଡିଓଙ୍କ ପ୍ରକୃତ ସମ୍ପତ୍ତି ଆକଳନ କରାଯାଇପାରିନାହିଁ। ସମ୍ବଲପୁର ଭିଜିଲାନ୍ସ ବିଭାଗରେ ଏକ ମାମଲା(ନଂ. ୨୮/୨୧)ରୁଜୁ ହୋଇଛି । ସାମନ୍ତରାୟ ଦୀର୍ଘ ୪ ବର୍ଷ ଧରି ବିଜେପୁର ବିଡିଓ ଭାବେ କାର୍ଯ୍ୟ କରୁଛନ୍ତି। କିଛି ମାସ ହେବ ସିଡିପିଓ ଦାୟିତ୍ୱରେ ମଧ୍ୟ ରହିଥିଲେ। ତାଙ୍କର ସିନିୟର କ୍ଲାସ୍ ଓ୍ବାନ୍ ଅଫିସର ଭାବେ ପଦୋନ୍ନତି ହୋଇଥିଲେ ମଧ୍ୟ ଏଠାରୁ ବଦଳି ହୋଇ ନ ଥିଲା ।