ନବରଙ୍ଗପୁର/ଉମରକୋଟ,୧୧ା୧: ନବରଙ୍ଗପୁର ଜିଲା ଉମରକୋଟ ବ୍ଲକ ବଡକୁମାରୀ ପଞ୍ଚାୟତ ଅଧୀନ ତାଲାପଦର ନାଗୀନଦୀ ଉପରେ ନିର୍ମାଣାଧୀନ ବିଜୁ ସେତୁ ଭୁଶୁଡିବା ଘଟଣାର ତଦନ୍ତ ଆରମ୍ଭ ହୋଇଛି। ଗ୍ରାମ୍ୟ ଉନ୍ନୟନ ବିଭାଜନ(୨)ର ନିର୍ବାହୀ ଯନ୍ତ୍ରୀ ସନ୍ତୋଷ କୁମାର ସାମଲ ଉମରକୋଟ ଥାନାରେ ସହକାରୀ ଯନ୍ତ୍ରୀ ଅସିତ କୁମାର ପାତ୍ର, କନିଷ୍ଠ ଯନ୍ତ୍ରୀ ନିରଞ୍ଜନ ସାହୁ ଓ ଠିକାଦାର ଆଶିଷ କୁମାର ବିଶ୍ୱାଳଙ୍କ ନାମରେ ଏତଲା ଦେଇଛନ୍ତି। ଏ ନେଇ ଉମରକୋଟ ଥାନାରେ ଏକ ମାମଲା(ନଂ.୧୨/୨୧)ରେ ମାମଲା ରୁଜୁ ହୋଇଛି। ସୋମବାର ସୁନାବେଡା ଅଧୀକ୍ଷଣ ଯନ୍ତ୍ରୀ ପ୍ରଦୀପ କୁମାର ଜେନା ଓ କ୍ୱାଲିଟି କଣ୍ଟ୍ରୋଲ ଦଳ ଘଟଣାସ୍ଥଳରେ ପହଞ୍ଚତ୍ ପ୍ରାଥମିକ ତଦନ୍ତ କରିଛନ୍ତି। ଛାତ କିଭଳି ପଡିଥିଲା, ସେଟ୍ରିଙ୍ଗ୍ ପୋଲ ମଧ୍ୟରେ କେତେ ବ୍ୟବଧାନ ରହିଛି ସେ ସବୁ ତଦାରଖ କରାଯାଇଛି। ଏଥିସହ ଭୁଶୁଡି ପଡିଥିବା ସ୍ଥାନରୁ ସିମେଣ୍ଟ କଂକ୍ରିଟ୍ ଢଳେଇର ନମୁନା ସମେତ କାମରେ ବ୍ୟବହୃତ ହେଉଥିବା ବାଲି, ସିମେଣ୍ଟ, ଚିପ୍ସ ଆଦିର ନମୁନା ସଂଗ୍ରହ କରିଛନ୍ତି। ସୂଚନା ଯୋଗ୍ୟ, ଘଟଣାରେ ଜଣଙ୍କର ମୃତ୍ୟୁ ଘଟିଥିବା ବେଳେ ୩ଜଣ ଶ୍ରମିକ ଗୁରୁତର ଆହତ ହୋଇଥିଲେ।