ବରଗଡ଼ ଅଫିସ/ସୋହେଲା,୫ା୩(ଡି.ଏନ୍.ଏ.): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରବିବାର ବରଗଡ଼ ଜିଲା ସୋହେଲା ଗସ୍ତରେ ଆସି ରବିବାର ବିଜୁ ଏକ୍ସପ୍ରେସ ଓ୍ବେ ଲୋକାର୍ପିତ କରିଛନ୍ତି। ପ୍ରବାଦପୁରୁଷ ବିଜୁ ପଟ୍ଟନାୟକଙ୍କ ଜନ୍ମଦିନରେ ଓଡ଼ିଶାବାସୀଙ୍କ ସେବାରେ ଏହାକୁ ଉତ୍ସର୍ଗୀକୃତ କରି ସେ ଖୁସି ବ୍ୟକ୍ତ କରିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି, ୧୯୯୩ରେ ବିଜୁ ବାବୁ ସମ୍ବଲପୁର -ରାଉରକେଲା ଏଲ୍ ଆଣ୍ଡ ଟି ରାସ୍ତାର ଶୁଭାରମ୍ଭ କରିଥିଲେ। ସେହିପରି ଆଜି ଲୋକାର୍ପିତ ହୋଇଥିବା ବିଜୁ ଏକ୍ସପ୍ରେସ ଓ୍ବେ କେବଳ ଏକ ରାସ୍ତା ନୁହେଁ, ଏହା ଅଞ୍ଚଳବାସୀଙ୍କ ପାଇଁ ଜୀବନ ରେଖା। ଏହି ରାସ୍ତା ବିକାଶର ନୂଆ ଇତିହାସ ଲେଖିବ। ଏହି ରାସ୍ତା ଯୋଗୁ ଚାଷୀ, ସାଧାରଣ ଲୋକ, ଛାତ୍ରୀଛାତ୍ର ସୁବିଧା ପାଇ ପାରିବେ। ସେହିପରି ସ୍ବାସ୍ଥ୍ୟସେବାରେ ଉନ୍ନତି ଆସିବା ସହିତ ଅଞ୍ଚଳର ଅର୍ଥନୈତିକ ଅଭିବୃଦ୍ଧି ହେବ ଏବଂ ନୂତନ ଶିଳ୍ପ ଗଢ଼ି ଉଠିବ। ମୁଖ୍ୟମନ୍ତ୍ରୀ ଆହୁରି କହିଥିଲେ ଯେ, ବିଜୁ ଏକ୍ସପ୍ରେସ ଓ୍ବେର ବିଜୁ ଇକୋନୋମିକ କରିଡର ଭାବେ ପରିଗଣିତ ହୋଇଛି। ଏହାଦ୍ୱାରା ପଶ୍ଚିମ ଓ ଦକ୍ଷିଣ ଓଡ଼ିଶାର ୧୦ ଜିଲାର ଲୋକେ ସୁବିଧା ପାଇବେ ଏବଂ ବିଜୁ ଏକ୍ସପ୍ରେସ ୱେ ବିକାଶର ଆଉ ଏକ ମାଇଲଖୁଣ୍ଟ ହେବ। ସେହିପରି ବିଜୁ ବାବୁଙ୍କୁ ଶ୍ରଦ୍ଧାଞ୍ଜଳି ଅର୍ପଣ ସହିତ ବିଜୁ ବାବୁଙ୍କ ପାଇଁ ଆଜି ଓଡ଼ିଆ ଜାତି ଗର୍ବିତ ବୋଲି କହି ମୁଖ୍ୟମନ୍ତ୍ରୀ ୨୧୭ କୋଟିରୁ ଊର୍ଦ୍ଧ୍ୱ ଟଙ୍କାର ବିଭିନ୍ନ ପ୍ରକଳ୍ପର ଉଦ୍ଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ ସହିତ ଏସ୍ଏଚ୍ଜି ଗ୍ରୁପଗୁଡ଼ିକୁ ଋଣ ପ୍ରଦାନ କରିଥିଲେ। ପରେ ଏକ କାର୍ ଯୋଗେ ମୁଖ୍ୟମନ୍ତ୍ରୀ ରୋଡ ଶୋ’ରେ ଘେଁସ ପର୍ଯ୍ୟନ୍ତ ଯାଇଥିଲେ। ସଭାମଞ୍ଚରେ ୫-ଟି ସଚିବ ଭି. କେ ପାଣ୍ଡିଆନ, ମନ୍ତ୍ରୀ ରୀତା ସାହୁ, ବରଗଡ଼ ବିଧାୟକ ଦେବେଶ ଆଚାର୍ଯ୍ୟ, ଭଟଲି ବିଧାୟକ ସୁଶାନ୍ତ ସିଂ, ପଦ୍ମପୁର ବିଧାୟିକା ବର୍ଷା ସିଂ ବରିହା, ଅତାବିରା ବିଧାୟିକା ସ୍ନେହାଙ୍ଗିନୀ ଛୁରିଆ ପ୍ରମୁଖ ମଞ୍ଚାସୀନ ଥିଲେ।