ଅନୁଗୋଳ ଅଫିସ, ୧୦ା୮: ଅନୁଗୋଳ ଜିଲାରେ ବିଜୁ ଜନତା ଦଳର ‘ଓଡ଼ିଶା ମୋ ପରିବାର’ ଓ ‘ଜୀବନ ବିନ୍ଦୁ’ର ପୁନର୍ଗଠନ ହେଉ ହେଉ ଏଥିରେ ଫାଟ ଦେଖାଦେଇଥିବା ଚର୍ଚ୍ଚାର ବିଷୟ ହୋଇଛି। ରବିବାର ଅଗଷ୍ଟ କ୍ରାନ୍ତି ଦିବସ ଅବସରରେ ଜିଲା କଳାକେନ୍ଦ୍ରଠାରେ ଓଡ଼ିଶା ମୋ ପରିବାର ଓ ଜୀବନ ବିନ୍ଦୁ ପକ୍ଷରୁ ଆୟୋଜିତ ରକ୍ତ ଦାନ ଶିବିରରେ ଏହି ସଙ୍ଗଠନର ଜିଲା ସଂଯୋଜକ ଶକ୍ତି ପଟ୍ଟନାୟକଙ୍କୁ ଦୁର୍ବ୍ୟବହାର କରାଯାଇଥିବା ଅଭିଯୋଗ ହୋଇଛି। ଏ ନେଇ ନିଜେ ଶକ୍ତି ରାଜ୍ୟସ୍ତରୀୟ କର୍ମକର୍ତ୍ତାଙ୍କୁ ଜଣାଇଥିବା ବେଳେ କାର୍ଯ୍ୟକ୍ରମରେ ଉପସ୍ଥିତ ଥାଇ ବି ଜିଲା ବିଜେଡି ସଭାପତି ମହେନ୍ଦ୍ର ବସ୍ତିଆ ଘଟଣା କ’ଣ ଘଟିଛି ଜାଣି ନ ଥିବା କହିଛନ୍ତି।
କଳାକେନ୍ଦ୍ରଠାରେ ଆୟୋଜିତ ଜୀବନବିନ୍ଦୁ କାର୍ଯ୍ୟକ୍ରମରେ ଜିଲା ସଂଯୋଜକ ପଟ୍ଟନାୟକ ନିଜ ସମର୍ଥକଙ୍କ ସହ ପହଞ୍ଚିଥିଲେ। ସେ ପହଞ୍ଚତ୍ବା କ୍ଷଣି କୁଆଡ଼େ ଓ କାହିଁକି ଆସିଛନ୍ତି ବୋଲି ପ୍ରଶ୍ନ କରାଯାଇଥିଲା। ଏପରି କି ତାଙ୍କ ସହ ଯାଇଥିବା ଯୁବକମାନେ ରକ୍ତ ଦେଇପାରିବେ ନାହିଁ ବୋଲି ମଧ୍ୟ ବାରଣ କରାଯାଇଥିଲା। ଏ ସମ୍ପର୍କରେ ସେ ଦଳର ରାଜ୍ୟସ୍ତରୀୟ କର୍ମକର୍ତ୍ତାଙ୍କୁ ଅବଗତ କରିଥିବା ଜିଲା ସଂଯୋଜକ ଶକ୍ତି କହିଛନ୍ତି। ଅପରପକ୍ଷରେ ଏହି ଜୀବନବିନ୍ଦୁ କାର୍ଯ୍ୟକ୍ରମରେ ଅନୁଗୋଳ ବିଧାୟକଙ୍କ ପୁଅ ଅରୁଣାଭ ସିଂହଙ୍କ ସହ ଜିଲା ବିଜେଡି ସଭାପତି ମହେନ୍ଦ୍ର ବସ୍ତିଆ ଏବଂ ଓଡ଼ିଶା ମୋ ପରିବାର ଓ ଜୀବନ ବିନ୍ଦୁର ଜିଲା ସହ ସଂଯୋଜକ ପ୍ରିୟଦର୍ଶୀ ପଟ୍ଟନାୟକ ଉପସ୍ଥିତ ଥିଲେ। ସହ ସଂଯୋଜକ ପ୍ରିୟଦର୍ଶୀ ପଟ୍ଟନାୟକଙ୍କ ନେତୃତ୍ୱରେ ଏହି କାର୍ଯ୍ୟକ୍ରମ ଆୟୋଜନ କରାଯାଇଥିଲା। ତେଣୁ ଜିଲା ସଂଯୋଜକଙ୍କର ଏଥିରେ କୌଣସି ଭୂମିକା ନ ଥିବା ଜିଲା ବିଜେଡି ପକ୍ଷରୁ କୁହାଯାଇଛି। ଜିଲା ସଭାପତି ବସ୍ତିଆ କହିଛନ୍ତି, ଘଟଣା କ’ଣ ହୋଇଛି ଜାଣି ନାହିଁ। ଜିଲା ସହସଂଯୋଜକ ଏହାର ଆୟୋଜନ କରିଥିଲେ। ଏଥିରେ ଶକ୍ତିଙ୍କ କୌଣସି ଭୂମିକା ନାହିଁ। ତେଣୁ ତାଙ୍କ ନାମ ପ୍ରେସ୍ ବିଜ୍ଞପ୍ତିରେ ଦିଆଯାଇ ନାହିଁ ବୋଲି ବସ୍ତିଆ ପ୍ରକାଶ କରିଛନ୍ତି।