ଭଞ୍ଜନଗର,୫।୩(ଡି.ଏନ.ଏ): ପୂର୍ବତନ ମୁଖ୍ୟମନ୍ତ୍ରୀ ସ୍ବର୍ଗତ ବିଜୁ ପଟ୍ଟନାୟକଙ୍କ ଜୟନ୍ତୀ ମାର୍ଚ୍ଚ ୫ରେ ସାରା ରାଜ୍ୟବ୍ୟାପୀ ପାଳନ ହେଉଥିବା ବେଳେ ତାଙ୍କ ପୈତୃକ ଗ୍ରାମ ଗଞ୍ଜାମ ଜିଲା ଭଞ୍ଜନଗର ସହରଠାରୁ ମାତ୍ର ୩ କିମି ଦୂର ଘୁମୁସର ନୂଆଁଗାସ୍ଥିତ ବାସଭବନରେ ମଧ୍ୟ ଜୟନ୍ତୀ ପାଳନ ନେଇ ପ୍ରସ୍ତୁତି ହୋଇଛି। ସମ୍ପର୍କୀୟ ପୁତୁରା ପ୍ରମୋଦ ପଟ୍ଟନାୟକଙ୍କ ନେତୃତରେ ଗ୍ରାମର ଶିଶୁମାନଙ୍କୁ ଖାତା, କଲମ ବଣ୍ଟନ କରାଯିବ। ସେହିଭଳି ବାଉଁଶଲୁଣ୍ଡି ବିଜୁ ପଟ୍ଟନାୟକ ଛକରେ ଥିବା ବିଜୁ ସ୍ମୃତି ସଂସଦ ପକ୍ଷରୁ ଜୟନ୍ତୀ ପାଳନ କରାଯିବ। ବ୍ଲକ ବିଜେଡ଼ି ସଭାପତି ରାଜେନ୍ଦ୍ର ପ୍ରସାଦ ପ୍ରଧାନଙ୍କ ନେତୃତରେ କାର୍ଯ୍ୟକ୍ରମ ଆୟୋଜନ କରାଯାଇଛି। ତେବେ ନୂଆଗଁା ସହିତ ବିଜୁବାବୁଙ୍କ ସମ୍ପର୍କ ଅତି ନିବିଡ଼ ଥିବାରୁ ସେଠାରେ ବିଜୁବାବୁଙ୍କ ନାମରେ ଏକ ମ୍ୟୁଜିୟମ ସ୍ଥାପନ କରିବାକୁ ଅଞ୍ଚଳବାସୀ ଦାବି କରିଛନ୍ତି। ବିଜୁବାବୁଙ୍କ ପୈତୃକ ଗ୍ରାମରେ ତାଙ୍କ ପୁତ୍ର ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୦୧୩ ଜାନୁୟାରୀ ୧୮ରେ ବିଜୁ ବାବୁଙ୍କ ନାମିତ ପାଠାଗାରକୁ ଉଦ୍ଘାଟନ କରିଥିଲେ। ବିଜୁବାବୁଙ୍କ ବାପା ଲକ୍ଷ୍ମୀନାରାୟଣ ପଟ୍ଟନାୟକ ୧୮୭୫ ଜୁଲାଇ ୧ରେ ଭଞ୍ଜନଗରରେ ଜନ୍ମଗ୍ରହଣ କରିଥିଲେ। ତାଙ୍କ ମାତାଙ୍କ ନାମ ଥିଲା ଆଶାଲତା ଦେବୀ। ବିଜୁବାବୁ କଟକରେ ଜନ୍ମ ଗ୍ରହଣ କରିଥିଲେ ମଧ୍ୟ ଭଞ୍ଜନଗର ଗସ୍ତରେ ଆସିବା ସମୟରେ ପୈତୃକ ବାସଭବନକୁ ଯାଇ ବିଶ୍ରାମ ନେଉଥିଲେ। ତେଣୁ ପୈତୃକ ଗ୍ରାମରେ ଏକ ମ୍ୟୁଜିୟମ୍ ସ୍ଥାପନ କରିବା ପାଇଁ ଭଞ୍ଜନଗର ବାର୍ ଆସୋସିଏଶନ ସଭାପତି ତଥା ନୂଆଗଁାବାସୀ ସନ୍ତୋଷ ନାୟକଙ୍କ ସମେତ ଅଞ୍ଚଳବାସୀ ଦାବି କରିଛନ୍ତି ।
