ଜଗତ୍ସିଂହପୁର ଅଫିସ, ୧୨।୪: ଜଗତ୍ସିଂହପୁର ସହର ନିକଟ ମଠ ତର୍ତ୍ତଙ୍ଗ ଗ୍ରାମରେ ଅଭାବନୀୟ ଘଟଣା ଘଟିଛି। ସଞ୍ଜ ନିଆଁ ସଂସ୍ପର୍ଶରେ ଆସି ଏକ ବାଇକ୍ ସମ୍ପୂର୍ଣ୍ଣ ଜଳିଯାଇଛି। ଏଥିରେ ୨ ଗୁରୁତର ଓ ୨ ଆହତ ହୋଇଛନ୍ତି। ଗୁରୁତର ଦ୍ୱୟ ହେଲେ ଏହି ଗାଁର ପାପୁନି ଦାସ, ପ୍ରଦୀପ୍ତ ସେଠୀ ଏବଂ ଆହତମାନେ ହେଲେ ପ୍ରଦୀପ୍ତଙ୍କ ପୁଅ ରଞ୍ଜନ ଓ ସ୍ମୃତିରଞ୍ଜନ ସେଠୀ। ପାପୁନି ଓ ପ୍ରଦୀପ୍ତଙ୍କ ଶରୀରର ୯୦ ଓ ୪୦ ପ୍ରତିଶତ ପୋଡ଼ିଯାଇଥିବାରୁ ସେମାନଙ୍କୁ କଟକ ସ୍ଥାନାନ୍ତର କରାଯାଇଛି।
ଏ ସମ୍ପର୍କରେ ମଠ ତର୍ତ୍ତଙ୍ଗ ଗ୍ରାମର ତଥା ଜିଲା ପରିଷଦ ସଭାପତି ମନୋଜ ଭୋଇ କହିଛନ୍ତି, ଗ୍ରାମରେ ପ୍ରଦୀପ୍ତ ଏକ ଷ୍ଟେସ୍ନାରି ଦୋକାନ କରିଛନ୍ତି। ଲୋକଙ୍କ ଆବଶ୍ୟକତାକୁ ଦୃଷ୍ଟିରେ ରଖି ସେ ସେଠାରେ ପେଟ୍ରୋଲ ଆଣି ବିକ୍ରି କରିଥାନ୍ତି। ସୋମବାର ସନ୍ଧ୍ୟାରେ ଦୋକାନ ନିକଟ ଗଛମୂଳ ଠାକୁରାଣୀଙ୍କ ନିକଟରେ ଜଣେ ଝିଅ ସଞ୍ଜ ଦେଇଥିଲେ। ଦୋକାନୀ ପ୍ରଦୀପ୍ତ ଏକ ବଡ ଜାର୍କିନିରୁ ଛୋଟକୁ ପେଟ୍ରୋଲ ଢ଼ାଳିବା ପାଇଁ ପାଖରେ ଥିବା ପାପୁନିଙ୍କ ସହାୟତା ନେଇଥିଲେ। ସଞ୍ଜ ଜଳୁଥିବା ସ୍ଥାନର କିଛି ଦୂରରେ ପାପୁନି ଛୋଟ ଜାର୍କିନି ଧରିଥିବାବେଳେ ପ୍ରଦୀପ୍ତ ପେଟ୍ରୋଲ ଢାଳୁଥିଲେ । ଏହି ସମୟରେ କୌଣସିମତେ ନିଆଁ ସଂସ୍ପର୍ଶରେ ଆସି ଜାର୍କିନି ଫାଟି ଯାଇଥିଲା। ନିଆଁ ଛିଟିକି ପ୍ରଦୀପ୍ତଙ୍କ ବାଇକ୍ ଉପରେ ପଡ଼ିବାରୁ ତାହା ଜଳିଯାଇଥିଲା। ଘଟଣାସ୍ଥଳରେ ପାପୁନିଙ୍କ ସହ ପ୍ରଦୀପ୍ତ ପୋଡ଼ିଯାଇଥିବାବେଳେ ତାଙ୍କ ପୁଅ ଓ ପୁତୁରା ଆହତ ହୋଇଥିଲେ। ନିଆଁର କୋପ ଏତେ ଅଧିକ ଥିଲା ଯେ, ନିକଟରେ ଥିବା ଏକ ନିମ୍ବ ଓ ବେଲ ଗଛ ସମେତ କିଛି ଧାନ ପୋଡ଼ି ଯାଇଥିଲା। ସଙ୍ଗେସଙ୍ଗେ ଲୋକେ ଆହତମାନଙ୍କୁ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ପ୍ରଦୀପ୍ତଙ୍କ ପୁଅ ଆଶୁ ଚିକିତ୍ସା ହେବାପରେ ଘରକୁ ଫେରିଛନ୍ତି। କିନ୍ତୁ ପାପୁନି, ପ୍ରଦୀପ୍ତ ଓ ସ୍ମୃତିରଞ୍ଜନଙ୍କୁ କଟକ ସ୍ଥାନାନ୍ତର କରାଯାଇଥିଲା। ପାପୁନିଙ୍କ ମୁଣ୍ଡକୁ ଛାଡିଦେଲେ ଅବଶିଷ୍ଟ ଅଂଶ ପୋଡିଯାଇଛି । ସ୍ମୃତିରଞ୍ଜନଙ୍କ ଗୋଟିଏ ଗୋଡର ଅଧିକାଂଶ ପୋଡି ଯାଇଥିଲେ ସୁଦ୍ଧା ଅବସ୍ଥାରେ ସୁଧାର ଆସିବାରୁ ତାଙ୍କୁ ତର୍ତ୍ତଙ୍ଗ ଅଣାଯାଇଛି । ଏନେଇ ଜଗତ୍ସିଂହପୁର ଥାନା ପକ୍ଷରୁ ଏଏସ୍ଆଇ ନୟନା ଲେକାଙ୍କ ଅଭିଯୋଗ ଆଧାରରେ ମାମଲା (ନଂ.୨୫୦/୨୩) ରୁଜୁ କରି ତଦନ୍ତ ଜାରି ରହିଛି ବୋଲି ଆଇଆଇସି ଶୁଭ୍ରାଂଶୁ ପରିଡ଼ା କହଛନ୍ତି।
