ଝାରସୁଗୁଡ଼ା ଅଫିସ,୨୨ା୧: ଲୁଟେରାମାନେ ପୋଲିସ୍କୁ ଚ୍ୟାଲେଞ୍ଜ ଦେଇ ପଶ୍ଚିମ ଓଡିଶାର ବିଭିନ୍ନ ସ୍ଥାନରୁ ଗୋଟିଏ ପରେ ଗୋଟିଏ ବାଇକ୍ ଲୁଟ୍ କରି ଚାଲିଥିଲେ। ଯାହାକି ପୋଲିସ ପାଇଁ ମୁଣ୍ଡବିନ୍ଧାର କାରଣ ହୋଇଥିଲା। ଏହି ଆନ୍ତଃଜିଲା ବାଇକ୍ ଚୋରି ରାକେଟ୍ ପର୍ଦ୍ଦାଫାଶ କରିବାରେ ଝାରସୁଗୁଡ଼ା ପୋଲିସ ସଫଳ ହୋଇଛି।
ସଂପୃକ୍ତ ଘଟଣାରେ ପୋଲିସ ୬ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ସୁନ୍ଦରଗଡ଼ ଜିଲା ବଡ଼ଗାଁ ଥାନା ଏକମା କିଷାନପଡ଼ାର ସୁବାସ ଟପ୍ପୋ(୨୯), ସମ୍ବଲପୁରର ରେଙ୍ଗାଲି ଥାନା ବ୍ଲକ୍ପଡ଼ାର ଜିତୁ ମାଝି(୩୦), ଡୁଙ୍ଗୁରିପଡ଼ାର ବିଶ୍ୱାମିତ୍ର ଛୁରିଆ(୨୭),ବ୍ରଜରାଜନଗର ଥାନା ବଘରାଚକାର ରାମ କଣ୍ଡରା(୩୨), କତରବଗା ଥାନା ଘଣ୍ଟାମାଳର ରବିରନତ୍ ରଣବିଡ଼ା(୩୪),ଏସ୍ କୁମାର ସିଂହ(୨୫)ବୋଲି ଜଣାପଡ଼ିଛନ୍ତି। ଏମାନଙ୍କ ନିକଟରୁ ପୋଲିସ ସମୁଦାୟ ୨୦ ଚୋରି ବାଇକ୍ ଜବତ କରିଛି। ଏନେଇ ପୋଲିସ୍ ଝାରସୁଗୁଡା ଟାଉନ୍ ଥାନା କେସ୍ ନଂ ୩୧/୨୨ରେ ଏକ ମାମଲା ରୁଜୁ କରି ତଦନ୍ତ ଚଳାଇଛି। ଗିରଫ ଅଭିଯୁକ୍ତଙ୍କୁ ପୋଲିସ ଶନିବାର କୋର୍ଟ ଚାଲଣ କରିଥିବା ଜଣାପଡ଼ିଛି।
ତେବେ ଏହି ଆନ୍ତଃଜିଲା ବାଇକ୍ ଚୋରି ରାକେଟର ମାଷ୍ଟରମାଇଣ୍ଡ୍ ତଥା ମୁଖ୍ୟ ଅଭିଯୁକ୍ତ ହେଲେ ଜଗନ୍ନାଥ ରଣା(୩୧)। ସେ ଗଞ୍ଜାମ ଜିଲା ତାରାସିଂହ ଉଲୁଧନା ଗ୍ରାମର ମୂଳବାସିନ୍ଦା ହୋଇଥିବାବେଳେ ସମ୍ବଲପୁର ଜିଲା ରେଙ୍ଗାଲି ଥାନା ବ୍ଲକ୍ପଡ଼ାରେ ରହୁଛନ୍ତି। ସେ ବର୍ତ୍ତମାନ ସୁଦ୍ଧା ଫେରାର ଅଛନ୍ତି। ତାଙ୍କୁ ପୋଲିସ୍ ଧରିବା ପାଇଁ ଜାଲ ବିଛାଇଛି। ଖୁବ୍ଶୀଘ୍ର ତାଙ୍କୁ ଗିରଫ କରାଯିବ ବୋଲି ଏସ୍ପି ବିକାଶ ଚନ୍ଦ୍ର ଦାସ କହିଛନ୍ତି।
ଏସ୍ପି ଦାସ,ଏସ୍ଡିପିଓ ନିର୍ମଳ ମହାପାତ୍ର,ଆଇଆଇସି ସାବିତ୍ରୀ ବଳ ପ୍ରମୁଖ ପୋଲିସ ଅଧିକାରୀଙ୍କୁ ନେଇ ଶନିବାର ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଥିଲା। ଏଥିରେ ଏସ୍ପି କହିଥିଲେ, ସ୍ଥାନୀୟ ମାଳିମୁଣ୍ଡାସ୍ଥିତ ଷ୍ଟାଡିୟମ ନିକଟରେ କେତେକ ଯୁବକ ଏକତ୍ରିତ ହୋଇ ଅସାମାଜିକ କାର୍ଯ୍ୟ କରିବା ପାଇଁ ଯୋଜନା ପ୍ରସ୍ତୁତ ଚଳାଇଥିଲେ। ଏହି ସମୟରେ ଝାରସୁଗୁଡ଼ା ଟାଉନ୍ ଥାନା ପୋଲିସ ବିଶେଷ ସୂତ୍ରରୁ ଖବରପାଇ ସବ୍ଇନ୍ସପେକ୍ଟର ଏମ୍ ପାଣିଗ୍ରାହୀଙ୍କ ନେତୃତ୍ୱରେ ଏକ ପୋଲିସ୍ ଟିମ୍ ଷ୍ଟାଡିୟମ ନିକଟରେ ଚଢ଼ାଉ କରି ଯୁବକମାନଙ୍କୁ କାବୁ କରିଥିଲେ। ସେମାନଙ୍କ ନିକଟରୁ ପୋଲିସ୍ ୬ ବାଇକ୍ ଜବତ କରିବା ସହ ଏହାର କାଗଜପତ୍ର ଯାଞ୍ଚ କରିଥିଲା। ହେଲେ କୌଣସି ବାଇକ୍ର କାଗଜପତ୍ର ନ ଥିଲା। ଏ ସମ୍ପର୍କରେ ସେମାନଙ୍କୁ ପୋଲିସ୍ ପଚରାଉଚରା ପରେ ଜଣାପଡ଼ିଥିଲା ଏହାସବୁ ଚୋରି ବାଇକ୍ ବୋଲି। ତା’ପରେ ଏ ସମ୍ପର୍କରେ ପୋଲିସ୍ ଖୋଳତାଡ଼ ଆରମ୍ଭ କରିଥିଲା।