ଦୁବାଇ,୨୬।୧୧(ପି.ଟି.): ବିଶ୍ୱ କ୍ରିକେଟରେ ‘ବିଗ୍ ଥ୍ରୀ’ ଧାରଣର କୌଣସି ଅସ୍ତିତ୍ୱ ନାହିଁ ବୋଲି ନବ ନିର୍ବାଚିତ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଅଧ୍ୟକ୍ଷ ଗ୍ରେଗ୍ ବାର୍କଲେ ସ୍ପଷ୍ଟ କରିଛନ୍ତି। ଆଗକୁ ଦ୍ୱିପାକ୍ଷିକ ସିରିଜ ଓ ଆଇସିସି ଇଭେଣ୍ଟଗୁଡିକୁ ଅଧିକ ଗୁରୁତ୍ୱ ଦିଆଯିବ। ଏହା ହେଲେ ବିଶ୍ୱରେ କ୍ରିକେଟର ଉନ୍ନତି ହୋଇପାରିବ ବୋଲି ସେ କହିଛନ୍ତି। ଉଲ୍ଲେଖଥାଉ କି, ଭାରତ, ଅଷ୍ଟ୍ରେଲିଆ ଓ ଇଂଲଣ୍ଡ ଆଇସିସି ରାଜସ୍ବରେ ସିଂହଭାଗ ହାସଲ କରିଥାନ୍ତି। ତେଣୁ ଏହି ୩ଟି ଦେଶକୁ ବିଗ୍ ଥ୍ରୀ ବୋଲି ଅଭିହିତ କରାଯାଇଥାଏ। ବିଶ୍ୱ କ୍ରିକେଟରେ ଏହି ୩ଟି ଦେଶର ପ୍ରଭାବ ଅଧିକ ରହିଛି। ତେବେ ସେ ଏଭଳି ଧାରଣାରେ ବିଶ୍ୱାସ କରନ୍ତି ନାହିଁ ବୋଲି କହିଛନ୍ତି। ବିଶ୍ୱ କ୍ରିକେଟରେ ସବୁ ମେମ୍ବର ସମାନ ଗୁରୁତ୍ୱ ବହନ କରିଥାନ୍ତି ଓ ସମସ୍ତଙ୍କୁ ସମାନ ଭାବେ ସମ୍ମାନ ଦିଆଯିବ ବୋଲି ସେ ସ୍ପଷ୍ଟ କରିଛନ୍ତି।
ଦୁଇ ଦେଶ ମଧ୍ୟରେ ନିୟମିତ ଭାବେ ଦ୍ୱିପାକ୍ଷିକ କ୍ରିକେଟ ଖେଳାଯିବା ନିହାତି ଆବଶ୍ୟକ। ଏହା ଦ୍ୱାରା କ୍ରିକେଟରେ ଲୋକପ୍ରିୟତା ବୃଦ୍ଧି ହେବା ସହ ପ୍ରତିଦ୍ୱନ୍ଦ୍ୱିତା ମଧ୍ୟ ବଢ଼ିବ। କିନ୍ତୁ ଏହାର ଅର୍ଥ ନୁହେଁ ଯେ, ଆଇସିସି ଇଭେଣ୍ଟଗୁଡିକର କୌଣସି ଗୁରୁତ୍ୱ ନାହିଁ। ତେଣୁ ଦ୍ୱିପାକ୍ଷିକ ସିରିଜ ସହ ଓ୍ବାଲର୍ଡ ଇଭେଣ୍ଟଗୁଡିକ ମଧ୍ୟରେ ସନ୍ତୁଳନ ରକ୍ଷା କରି ସମାନ୍ତରାଳ ଭାବେ ଆୟୋଜନ ହେବା ଉପରେ ସେ ଗୁରୁତ୍ୱ ଦେଇଛନ୍ତି। ବାର୍କଲେଙ୍କୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଖୋଲାଖୋଲି ଭାବେ ସମର୍ଥନ କରିଛି। ଗତବର୍ଷ ଅନୁଷ୍ଠିତ ମହିଳା ଟି୨୦ ବିଶ୍ୱକପ୍ ଓ ଦିନିକିଆ ପୁରୁଷ ବିଶ୍ୱକପ୍ ଲୋକପ୍ରିୟତାର ଶୀର୍ଷକୁ ଛୁଇଁ ଥିଲା ବୋଲି ସେ କହିଛନ୍ତି। ଅତ୍ୟଧିକ କ୍ରିକେଟ ଖେଳା ଯିବାକୁ ସେ ଅବଶ୍ୟ ବିରୋଧ କରିଛନ୍ତି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଓ ବିଗ୍ ବାସ ଭଳି ଲିଗ୍ ଖେଳାଯାଉଥିବାରୁ ଅତ୍ୟଧିକ କ୍ରିକେଟ ଖେଳାଯିବା ଉଚିତ ନୁହଁ। ପ୍ରଶଂସକଙ୍କୁ ମଧ୍ୟ ସମପରିମାଣରେ ଗୁରୁତ୍ୱ ଦିଆଯିବା ଉଚିତ ବୋଲି ସେ କହିଛନ୍ତି।