ଓ୍ବାଶିଂଟନ୍,୫।୧:ଇସ୍ରାଏଲ ଏବଂ ହମାସ ମଧ୍ୟରେ ଚାଲିଥିବା ଯୁଦ୍ଧ ସମୟରେ ଆମେରିକାର ଆଭିମୁଖ୍ୟ ଯୋଗୁ ଆତଙ୍କବାଦୀ ସଂଗଠନ ଅଲ-କାଏଦା ରାଗିଯାଇଛି। ଏହି କାରଣରୁ ସେମାନେ ଆମେରିକାର ଧନା ବ୍ୟବସାୟୀଙ୍କୁ ଟାର୍ଗେଟ କରିବାକୁ ଚାହୁଁଛନ୍ତି। ଅଲ-କାଏଦା ଏଲନ ମସ୍କ, ବିଲ ଗେଟ୍ସ ଏବଂ ସତ୍ୟ ନାଡେଲାଙ୍କୁ ହତ୍ୟା କରି ଆମେରିକାର ଅର୍ଥନୀତିକୁ ଟାର୍ଗେଟ କରିବେ ବୋଲି ଧମକ ଦେଇଛନ୍ତି।
ପାନ-ଇସଲାମିକ ଆତଙ୍କବାଦୀ ସଂଗଠନ ଅଲ-କାଏଦା ଏହାର ସମର୍ଥକମାନଙ୍କୁ ଆମେରିକୀୟ, ବ୍ରିଟିଶ ଏବଂ ଫ୍ରାନ୍ସ କମ୍ପାନୀ ଦ୍ୱାରା ପରିଚାଳିତ ବିମାନ ଉପରେ ଆକ୍ରମଣ କରିବାକୁ ଅପିଲ୍ କରିଛି। ଅଲ-କାଏଦାର ତାଲିକାରେ ଆମେରିକୀୟ ଏୟାରଲାଇନ୍ସ, କଣ୍ଟିନେଣ୍ଟାଲ, ଡେଲଟା, ବ୍ରିଟିଶ ଏୟାରୱେଜ, ଏୟାର ଫ୍ରାନ୍ସ ଏବଂ ଏୟାର ଫ୍ରାନ୍ସ-କେଏଲଏମ ରହିଛି।
ଅଲ-କାଏଦା କହିଛି ଯେ, ମସ୍କ, ଗେଟ୍ସ ଏବଂ ଆମେରିକାର ପୂର୍ବତନ ଫେଡେରାଲ ରିଜର୍ଭ ଚେୟାରମ୍ୟାନ ବେନ ବର୍ନାଙ୍କେ ଯିହୁଦୀ-ଆମେରିକୀୟ ଅର୍ଥନୀତିର ଏକ ଅଂଶ। ଏହି କାରଣରୁ ସେହି ସମସ୍ତ ଲୋକ ଆମର ଲକ୍ଷ୍ୟ।
