ନୂଆଦିଲ୍ଲୀ,୫।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଭିଡିଓ କନଫରେନ୍ସିଂ ମାଧ୍ୟମରେ ‘ଦି ଗ୍ଲୋବାଲ୍ ଇନିସିଏଟିଭ୍ ଅଫ୍ ଲାଇଫ୍ ମୁଭ୍ମେଣ୍ଟ’ର ଶୁଭାରମ୍ଭରେ ଯୋଗ ଦେଇଥିଲେ। ଭିଡିଓ କନଫରେନ୍ସିଂ ମାଧ୍ୟମରେ ମାଇକ୍ରୋସଫ୍ଟର ସହ-ପ୍ରତିଷ୍ଠାତା ବିଲ ଗେଟ୍ସ ମଧ୍ୟ ଏହି କାର୍ଯ୍ୟକ୍ରମରେ ଯୋଗ ଦେଇ ମୋଦିଙ୍କୁ ପ୍ରଶଂସା କରିଥିଲେ।
ବିଲ ଗେଟ୍ସ କହିଛନ୍ତି, ଏହି ବିଶ୍ୱସ୍ତରୀୟ ପଦକ୍ଷେପର ନେତୃତ୍ୱ ପାଇଁ ମୁଁ ପ୍ରଧାନମନ୍ତ୍ରୀ ମୋଦିଙ୍କୁ ଅଭିନନ୍ଦନ ଏବଂ ଧନ୍ୟବାଦ ଜଣାଉଛି। ଆମର ବିଶ୍ୱ ଜଳବାୟୁ ଲକ୍ଷ୍ୟ ହାସଲ କରିବାରେ ଭାରତର ନେତୃତ୍ୱ ଗୁରୁତ୍ୱପୂର୍ଣ୍ଣ। ଗ୍ରୀନ୍ ହାଉସ ଗ୍ୟାସ ହଟାଇବା ପାଇଁ ସରକାରୀ ଏବଂ ବେସରକାରୀ କ୍ଷେତ୍ରର ଭାଗିଦାରୀ ସହିତ ଆମକୁ ସମସ୍ତଙ୍କ ସହଯୋଗ ଆବଶ୍ୟକ।
ଏହି ସମୟରେ ମୋଦି କହିଛନ୍ତି ଯେ, ଆସନ୍ତୁ ଆମେ, ‘Reduce, Reuse, Recycle’ ନୀତି ଅନୁସରଣ କରିବା। ‘ଗୋଟିଏ ପୃଥିବୀ – ଅନେକ ପ୍ରୟାସ’ ଆବଶ୍ୟକ। ବିଶ୍ୱର କଲ୍ୟାଣକୁ ଆଗକୁ ନେବା ପାଇଁ ଭାରତ ଯେକୌଶସି ପ୍ରୟାସକୁ ସମର୍ଥନ କରୁଛି। ବିଶ୍ୱ ପରିବେଶ ଦିବସରେ, ଆସନ୍ତୁ ‘ପରିବେଶ ପାଇଁ ଜୀବନ-ଜୀବନଶୈଳୀ’କୁ ଏକ ବିଶ୍ୱସ୍ତରୀୟ ଜନ ଆନ୍ଦୋଳନ ପରିବର୍ତ୍ତନ କରିବାକୁ ସଙ୍କଳ୍ପ ନେବା।