ଓ୍ବାଶିଂଟନ୍, ୩ା୫: ମାଇକ୍ରୋସଫ୍ଟ ସହପ୍ରତିଷ୍ଠାତା ବିଲ୍ ଗେଟ୍ସ ତାଙ୍କ ପୂର୍ବତନ ସ୍ତ୍ରୀ ମିଲିଣ୍ଡା ଫ୍ରେଞ୍ଚ ଗେଟ୍ସଙ୍କୁ ପୁଣି ବିବାହ କରିବାକୁ ଚାହୁଁଥିବା ଏକ ସାକ୍ଷାତକାରରେ କହି ଚର୍ଚ୍ଚାକୁ ଆସିଛନ୍ତି। ୨୦୨୧ ମେ’ରେ ଏହି ଦମ୍ପତି ୩୦ ବର୍ଷର ବୈବାହିକ ଜୀବନରେ ପୂର୍ଣ୍ଣଚ୍ଛେଦ ପକାଇ ଛାଡ଼ପତ୍ର ଘୋଷଣା କରିଥିଲେ। ଉଭୟଙ୍କର ୩ ସନ୍ତାନ ଜେନର, ରୋରି ଏବଂ ଫୋଏବି ରହିଛନ୍ତି। ରବିବାର ଏକ ସାକ୍ଷାତକାରରେ ବିଲ୍ ଗେଟ୍ସ କହିଛନ୍ତି, ଗତ ୨ ବର୍ଷ ତାଙ୍କ ପାଇଁ ବେଶ୍ ନାଟକୀୟ ଥିଲା। ପିଲାମାନେ ତାଙ୍କଠାରୁ ଦୂରେଇ ଯିବା ସବୁଠୁ ଅଜବ ଥିଲା। ପ୍ରତ୍ୟେକ ବୈବାହିକ ଜୀବନରେ ପରିବର୍ତ୍ତନ ଆସିଥାଏ। ତାଙ୍କ କ୍ଷେତ୍ରରେ ତାହା ଥିଲା ଛାଡ଼ପତ୍ର। କିନ୍ତୁ ତାଙ୍କ ଦୃଷ୍ଟିରୁ ମିଲିଣ୍ଡାଙ୍କ ସହ ବିବାହ ବେଶ୍ ଭଲ ଥିଲା ବୋଲି ବିଲ୍ ଗେଟ୍ସ କହିଛନ୍ତି। ସେ କ’ଣ ପୁଣି ମିଲିଣ୍ଡାଙ୍କୁ ବିବାହ କରିବାକୁ ଚାହାନ୍ତି କି ପ୍ରଶ୍ନରେ ବିଲ୍ ଗେଟ୍ସ କହିଥିଲେ, ଭବିଷ୍ୟତରେ ମୋର ଅନ୍ୟ ଯୋଜନା ନାହିଁ। କିନ୍ତୁ ଏହି ବିବାହକୁ ମୁଁ ଅଗ୍ରାଧିକାର ଦେବି। ସୂଚନାଯୋଗ୍ୟ, ଛାଡ଼ପତ୍ର ପରେ ମଧ୍ୟ ଏହି ଦମ୍ପତି ଏକାଠି ବିଲ୍ ଆଣ୍ଡ୍ ମିଲିଣ୍ଡା ଗେଟ୍ସ ଫାଉଣ୍ଡେଶନ ପାଇଁ କାମ କରୁଛନ୍ତି।