ଟୋକିଓ,୩୦ ।୧୧: ଚାଇନାର ଅରବପତି ତଥା ବୃହତ୍ତ ଇ-କମର୍ସ କମ୍ପାନୀ ଆଲିବାବାର ସଂସ୍ଥାପକ ଜ୍ୟାକ ମା ପ୍ରାୟ ୬ ମାସ ହେବ ଜାପାନର ରାଜଧାନୀ ଟୋକିଓରେ ରହି ଆସୁଛନ୍ତି । ଜ୍ୟାକ ମା ୨୦୨୦ରୁ ଏକ ଲୋ ପ୍ରୋଫାଇଲ ଜୀବନ ଅତିବାହିତ କରୁଛନ୍ତି । ଏକାଧିକାର ବିରୋଧର ଉଲ୍ଲଂଘନ କରିବା ପରେ ଚାଇନା ସରକାରଙ୍କ ପକ୍ଷରୁ ଜ୍ୟାକ ମାଙ୍କ ଉପରେ ଚାପ ବଢିଯାଇଥିଲା ।
ଫାଇନାନସିଆଲ ଟାଇମ୍ସର ରିପୋର୍ଟ ଅନୁଯାୟୀ, ଜ୍ୟାକ ମା ତାଙ୍କ ପରିବାର ସହ ଜାପାନରେ ରହୁଛନ୍ତି । ଟୋକିଓ ବାହାରେ ଗାଁ ଅଞ୍ଚଳରେ ସ୍କି ରିସର୍ଟରେ ଅନେକ ସମୟରେ ତାଙ୍କୁ ଦେଖିବାକୁ ମିଳିଥାଏ । ନିକଟ ଅତିତରେ ଜ୍ୟାକ ମା ଅନେକ ଥର ଆମେରିକା ଓ ଇସ୍ରାଏଲ ବି ଗସ୍ତ କରିଛନ୍ତି ।
୫୮ ବର୍ଷୀୟ ଜ୍ୟାକ ମା ସାଧାରଣ ଜୀବନଠାରୁ ଟିକେ ଦୂରେଇ ଯାଇଛନ୍ତି । ସେ ୨୦୨୦ରେ ଚାଇନାର ନୀତିକୁ ସମାଲୋଚନା କରିଥିଲେ । ଚାଇନାର ଆର୍ଥିକ ନିୟାମକ ବ୍ୟବସ୍ଥାକୁ ସମାଲୋଚନା କରି ସେ ରାଷ୍ଟ୍ରାୟତ୍ତ ବ୍ୟାଙ୍କ ଗୁଡିକର ଉପଭୋକ୍ତାମାନଙ୍କ ସହ ତୁଳନା କରିଥିଲେ । ସେ ପବ୍ଲିକ ସେକ୍ଟର ବ୍ୟାଙ୍କ ଗୁଡିକର ସୁଧଖୋର ମାନସିକତା ଥିବା ଅଭିଯୋଗ କରିଥିଲେ । ଆନ୍ତର୍ଜାତୀୟ ଆର୍ଥିକ ନିୟାମକ ଚୁକ୍ତି(ବେସେଲ ଆକର୍ଡସ) ଉପରେ ମଧ୍ୟ ସେ ପ୍ରଶ୍ନ ଉଠାଇଥିଲେ । ସେବେଠାରୁ ତାଙ୍କ ଦ୍ୱାରା ଗଠିତ କମ୍ପାନୀ ଆଣ୍ଟ ଏବଂ ଆଲିବାବା ଚାଇନା ପ୍ରଶାସନ ଦ୍ୱାରା ହଇରାଣ ହରକତ ହୋଇଥିଲେ ।