ଲାଞ୍ଜିଗଡ଼,୩।୫(ଡି.ଏନ୍.ଏ.): କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ଲାଖବାହାଳି ପଞ୍ଚାୟତ ଅନ୍ତର୍ଗତ ଘାଟିକୁଣ୍ଡରୁ ଗାଁରେ ଏମ୍ଜିଏନ୍ଆର୍ଇଜିଏସ୍ରେ ମହାଦୁର୍ନୀତି ଏବଂ ମାସ ମାସ ଧରି ଶ୍ରମିକଙ୍କୁ ପାରିଶ୍ରମିକ ରାଶି ମିଳୁ ନ ଥିବା ଅଭିଯୋଗ ହୋଇଛି I କେନ୍ଦ୍ର ସରକାର ଗରିବ ଲୋକଙ୍କୁ କର୍ମ ନିଯୁକ୍ତି ଯୋଗାଇ ଦେବା ପାଇଁଁ ଏମ୍ଜିଏନ୍ଆର୍ଇଜିଏସ୍ କାର୍ଯ୍ୟକାରୀ କରିଛନ୍ତି ସତ ହେଲେ ଯୋଜନା ଠିକ ଭାବେ ପରିଚାଳନା ହେଉ ନ ଥିବା କୁହାଯାଉଛି। ଶ୍ରମିକମାନେ କାମକରି ମଧ୍ୟ ସେମାନଙ୍କ ପାରିଶ୍ରମିକ ପାଇ ପାରୁନାହାନ୍ତି। ଏହି ଗାଁରେ ୨୦୧୮/୧୯ ରେ ଏମ୍ଜିଏନ୍ଆର୍ଇଜିଏସ୍ ମାଧ୍ୟମରେ ମୁଖ୍ୟ ରାସ୍ତାଠାରୁ ଗାଁକୁ ମାଟି ରାସ୍ତା ପାଇଁ ୩ ଲକ୍ଷ ଟଙ୍କା ଅଟକଳ ହୋଇଥିଲା। ବର୍ତ୍ତମାନ କାମ ବନ୍ଦ ହେବା ସହ ରାସ୍ତା କାମ ମଧ୍ୟ ଅଧାପନ୍ତରିଆ ହୋଇ ରହିଛି। ହେଲେ କାମ ବନ୍ଦ ଥିବା ସତ୍ତ୍ୱେ ମଧ୍ୟ କାମ ନ କରିଥିବା ୪୦ ଜଣଙ୍କ ବ୍ୟାଙ୍କ ଖାତାରେ ଅର୍ଥରାଶି ଜମା କରି ୨ ଲକ୍ଷ ୩୦ ହଜାର ଅର୍ଥ ରାଶି ହଡପ କରୁଥିବା ଅଭିଯୋଗ ହେଉଛି। ଯେଉଁ ଶ୍ରମିକ କାମ କରିଛନ୍ତି ସେମାନଙ୍କ ବ୍ୟାଙ୍କ ଖାତାରେ ଅର୍ଥ ରାଶି ଜମା ହେଉ ନ ଥିବା ଚର୍ଚ୍ଚା ହେଉଛି। ଏହି ରାସ୍ତା କାମରେ ଗାଁର ଅନେକ ଶ୍ରମିକ ନିୟୋଜିତ ହୋଇ କାମ କରିଛନ୍ତି। ହେଲେ ମାସ ମାସ ଧରି ଶ୍ରମିକମାନେ ପାରିଶ୍ରମିକ ପାଇନାହଁାନ୍ତି। ଅନ୍ୟ ପଟେ ଏମ୍ଜିଏନ୍ଆର୍ଇଜିଏସ୍ ନିୟମ ଅନୁଯାୟୀ ଶ୍ରମିକ ପରିଶ୍ରମ ଅର୍ଥ ୧୫ ଦିନ ଭିତରେ ବ୍ୟାଙ୍କ ଖାତାରେ ଜମା ହେବା ବ୍ୟବସ୍ଥା ରହିଛି। କିନ୍ତୁ ମାସ ମାସ ଧରି ଶ୍ରମିକ ସେମାନଙ୍କ ପାରିଶ୍ରମିକ ଅର୍ଥ ପାଇ ନାହାନ୍ତି। ପ୍ରଶାସନ ଆନ୍ତରିକତା ଅଭାବ ଯୋଗୁ ମନରେଗାରେ ଠିକ ସମୟରେ ପାରିଶ୍ରମିକ ନ ମିଳିବା, ଯୋଜନା ନାଁରେ ରଫା ଦଫା କରି ଅର୍ଥ ହଡପ କରାଯାଉଛି ବୋଲି ଅଞ୍ଚଳବାସୀ କହିଛନ୍ତି। ତେବେ ଶ୍ରମିକଙ୍କୁ କେମିତି ପାରିଶ୍ରମିକ ଅର୍ଥରାଶି ମିଳିବ ଏଥି ପ୍ରତି ଜିଲାପାଳ ତୁରନ୍ତ ଦୃଷ୍ଟି ଦେବାକୁ ବ୍ରିଟିଶ କୁମାର, ସାନ ମାଝୀ, ଶ୍ରାବୁଣୁ ମାଝୀ, ରାମତୁ ମାଝୀ, ନର୍ସିଂ ମାଝୀଙ୍କ ସମେତ ଗ୍ରାମବାସୀ ଦାବି କରିଛନ୍ତି। ଏ ବିଷୟରେ ବ୍ଲକ ଏପିଓ ସଞ୍ଜୀତ ପରିଡାଙ୍କୁ ପଚାରିବାରୁ ସେ କହିଲେ, ଏ ବିଷୟରେ ମୁଁ କିଛି ଜାଣିନାହିଁ, କିନ୍ତୁ ସେ ପ୍ରୋଜେକ୍ଟ ବନ୍ଦ ହୋଇନାହିଁ। ଅନ୍ଲାଇନରେ ଚେକ୍ କଲେ ତାହାର ଡିଟେଲ ମିଳିବ। ମୁଁ ମେଡିକାଲ କାମରେ ଛୁଟିରେ ଥିବା ହେତୁ ତାହା ଦେଖିବା ସମ୍ଭବ ନୁହଁ। ତେଣୁ ମୁଁ ଅଫିସ ଗଲେ ଡିଟେଲ ଚେକ୍ କରି କହିପାରିବି ବୋଲି କହିଥିଲେ।