ନୂଆଦିଲ୍ଲୀ, ୧୨।୧୦(ପି.ଟି.): ସୌରଭ ଗାଙ୍ଗୁଲିଙ୍କ ସ୍ଥାନରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ହୋଇପାରନ୍ତି ୧୯୮୩ ବିଶ୍ୱକପ୍ ବିଜୟୀ ହିରୋ ରୋଜର ବିନ୍ନି। ଏପରି କି ସେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇପାରନ୍ତି ବୋଲି ବିସିସିଆଇ ଉପସଭାପତି ରାଜୀବ ଶୁକ୍ଳା ସୂଚନା ଦେଇଛନ୍ତି। ଅକ୍ଟୋବର ୧୮ରେ ବୋର୍ଡର ବାର୍ଷିକ ସାଧାରଣ ଅଧିବେଶନ (ଏଜିଏମ୍)ରେ ଏହା ସ୍ପଷ୍ଟ ହେବ। ମଙ୍ଗଳବାର ବିନ୍ନି ତାଙ୍କ ପ୍ରାର୍ଥତ୍ପତ୍ର ଦାଖଲ କରିଛନ୍ତି। ଗତ ଏକ ସପ୍ତାହ ହେଲା ବିସିସିଆଇର ୩୬ତମ ସଭାପତି କାହାରିକୁ କରାଯିବ ସେ ନେଇ ଭିତିରି ଜୋର୍ଦାର ଆଲୋଚନା ଚାଲିଥିଲା। ଏଥିରେ ବେଙ୍ଗାଲୁରୁର ୬୭ ବର୍ଷୀୟ ବିନ୍ନିଙ୍କୁ ପରବର୍ତ୍ତୀ ସଭାପତି କରିବା ଲାଗି ଆପାତତଃ ସ୍ଥିର ହୋଇସାରିଥିବା କୁହାଯାଉଛି। କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ପୁତ୍ର ଜୟ ଶାହା ଦ୍ୱିତୀୟ ଥର ପାଇଁ ବିସିସିଆଇ ସମ୍ପାଦକ ପଦବୀରେ ରହିବେ। ଶାହା ଆହୁରି ମଧ୍ୟ ସବୁଠାରୁ କ୍ଷମତାଶାଳୀ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ବୋର୍ଡରେ ଗାଙ୍ଗୁଲିଙ୍କ ସ୍ଥାନରେ ଭାରତରୁ ପ୍ରତିନିଧିତ୍ୱ କରିବେ। ବୋର୍ଡ ସେଟ୍ଅପ୍ରେ କେନ୍ଦ୍ର ସରକାରଙ୍କ ଜଣେ ପ୍ରଭାବଶାଳୀ ମନ୍ତ୍ରୀ ବିସିସିଆଇରେ କିଏ କେଉଁ ପଦବୀରେ ରହିବେ ତାହା ସ୍ଥିର କରୁଥିବା ବିସିସିଆଇ ଭିତିରି ସୂତ୍ରରୁ ଜଣାପଡ଼ିଛି। ବିନ୍ନିଙ୍କୁ ବିସିସିଆଇ ମୁଖ୍ୟ ଭାବେ ପସନ୍ଦ କରିବା ଆଶ୍ଚର୍ଯ୍ୟଜନକ ମନେ ହେଉଥିଲେ ମଧ୍ୟ ଏନେଇ ପୂର୍ବରୁ ସଙ୍କେତ ମିଳିଥିଲା, ଯେତେବେଳେ କର୍ନାଟକ କ୍ରିକେଟ ଆସୋସିଏଶନ (କେଏସ୍ସିଏ) ବିସିସିଆଇ ଏଜିଏମ୍ ପାଇଁ ଏହାର ପ୍ରତିନିଧି ଭାବେ ସମ୍ପାଦକ ସନ୍ତୋଷ ମେନନଙ୍କ ସ୍ଥାନରେ ବିନ୍ନିଙ୍କୁ ପଠାଇବା ଲାଗି ନିଷ୍ପତ୍ତି ନେଇଥିଲା। ବିନ୍ନି ହେଉଛନ୍ତି ଜଣେ ବିଶ୍ୱକପ୍ ହିରୋ। ତାଙ୍କର ସ୍ବଚ୍ଛ ଓ ନିର୍ମଳ ଭାବମୂର୍ତ୍ତି ରହିଛି। ତାଙ୍କ ପୁଅ ଯେତେବେଳେ ଭାରତୀୟ ଦଳରେ ସ୍ଥାନ ପାଇଁ ଦୌଡ଼ରେ ରହିଥିଲା ସେ ସିଲେକ୍ସନ କମିଟିରୁ ତାଙ୍କର ଇସ୍ତଫା ପ୍ରଦାନ କରିଥିଲେ। ବିସିସିଆଇ କ୍ୟାବିନେଟ୍ରେ କଂଗ୍ରେସ ପାର୍ଟିର କେବଳ ଜଣେ ରହିଛନ୍ତି ସେ ହେଲେ ରାଜୀବ ଶୁକ୍ଳା। ବ୍ରିଜେଶ ପଟେଲଙ୍କ ସ୍ଥାନରେ ବର୍ତ୍ତମାନ କୋଷାଧ୍ୟକ୍ଷ ଥିବା କ୍ରୀଡ଼ା ମନ୍ତ୍ରୀ ଅନୁରାଗ ଠାକୁରଙ୍କ ସାନ ଭାଇ ଅରୁଣ ସିଂ ଧୂମଲ ଆଇପିଏଲ୍ ଚେୟାରମ୍ୟାନ ହେବେ। ମହାରାଷ୍ଟ୍ରର ପ୍ରଭାବଶାଳୀ ନେତା ଆଶିଷ ସେଲାର କୋଷାଧ୍ୟକ୍ଷ ହେବେ। ଫଳରେ ସେ ଆଉ ମୁମ୍ବାଇ କ୍ରିକେଟ ଆସୋସିଏଶନ (ଏମ୍ସିଏ) ସଭାପତି ରହିବେ ନାହିଁ। ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କ ଘନିଷ୍ଠ ବୋଲି କୁହାଯାଉଥିବା ଦେବଜିତ୍ ସାଇକିଆ ନୂଆ ଯୁଗ୍ମ ସମ୍ପାଦକ ହେବେ। ଅକ୍ଟୋବର ୧୮ରେ ମୁମ୍ବାଇଠାରେ ହେବାକୁଥିବା ବିସିସିଆଇ ଏଜିଏମ୍ରେ ବିନ୍ନି ବିଧିବଦ୍ଧ ଭାବେ ବିସିସିଆଇ ମୁଖ୍ୟ ଭାବେ ଦାୟିତ୍ୱ ଗ୍ରହଣ କରିବେ। ବୋର୍ଡର କୌଣସି ପଦବୀ ପାଇଁ ନିର୍ବାଚନ ହେବ ନାହିଁ। ସମସ୍ତ ପ୍ରାର୍ଥୀ ନିର୍ଦ୍ୱନ୍ଦ୍ୱରେ ନିର୍ବାଚିତ ହେବେ। ଆଇସିସି ଚେୟାରମ୍ୟାନ ପଦବୀ ପାଇଁ ବିସିସିଆଇ ପ୍ରାର୍ଥୀ ଦେବ କି ନା ତାହ ସ୍ଥିର ହୋଇ ନାହିଁ।
ଆଇପିଏଲ୍ ଚେୟାରମ୍ୟାନ ହେବାକୁ ମନାକଲେ ଗାଙ୍ଗୁଲି
ମୁମ୍ବାଇରେ ସୋମବାର ପହଞ୍ଚତ୍ଥିବା ଗାଙ୍ଗୁଲି ଗତ ସପ୍ତାହରେ ନୂଆଦିଲ୍ଲୀରେ ଅଂଶୀଦାରମାନଙ୍କ ସହ ବିସ୍ତୃତ ଆଲୋଚନା କରିଥିଲେ। ପୂର୍ବତନ ଭାରତୀୟ ଅଧିନାୟକ ବିସିସିଆଇ ସଭାପତି ପଦବୀରେ ରହିବାକୁ ଆଗ୍ରହ ପ୍ରକାଶ କରିଥିଲେ। ମାତ୍ର ଦ୍ୱିତୀୟ ଥର ପାଇଁ ଏହି ପଦବୀରେ ରଖାଯିବା କୌଣସି ପ୍ରସ୍ତାବ ନାହିଁ ବୋଲି ତାଙ୍କୁ ସ୍ପଷ୍ଟ ଭାବେ ଜଣାଇ ଦିଆଯାଇଥିଲା। ତାଙ୍କୁ ଆଇପିଏଲ ଚେୟାରମ୍ୟାନ ପଦବୀ ଯଚା ଯାଇଥିଲା। ମାତ୍ର ସେ ବିସିସିଆଇର ମୁଖ୍ୟ ଭାବେ କାର୍ଯ୍ୟ କରିସାରିଥିବାରୁ ଏକ ସବ୍ କମିଟିର ମୁଖ୍ୟ ହୋଇପାରିବେ ନାହିଁ ବୋଲି ରୋକ୍ଠୋକ୍ ଶୁଣାଇ ଦେଇଥିଲେ।