ନୂଆଦିଲ୍ଲୀ, ୨୫ା୪: କ୍ରିକେଟରମାନଙ୍କ ମାନସିକ ଅବସ୍ଥାର ହିତ ଦୃଷ୍ଟିରୁ ଆସନ୍ତା ଦକ୍ଷିଣ ଆଫ୍ରିକା ବିପକ୍ଷ ୫ ମ୍ୟାଚ ବିଶିଷ୍ଟ ଟି୨୦ ସିରିଜରେ ବାୟୋ-ବବଲ ରହି ନ ପାରେ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତରଫରୁ ଏହି ସୂଚନା ଦିଆଯାଇଛି। କୋଭିଡ ମହାମାରୀ ଯୋଗୁ ବର୍ତ୍ତମାନ ଦେଶ ହେଉ ଅବା ବିଦେଶରେ ଆୟୋଜିତ ପ୍ରାୟ ସମସ୍ତ ସିରିଜରେ କ୍ରିକେଟରମାନେ କଠୋର ବାୟୋ-ବବଲ ସହ ଅଙ୍ଗାଙ୍ଗୀ ଭାବେ ଜଡ଼ିତ। ଜୁନ୍ ୯ରୁ ୧୯ ମଧ୍ୟରେ ଟି୨୦ ସିରିଜ ୫ଟି ଭେନ୍ୟୁ ଯଥା ଦିଲ୍ଲୀ, କଟକ, ଭାଇଜାଗ୍, ରାଜକୋଟ୍, ବେଙ୍ଗାଲୁରୁରେ ଖେଳାଯିବ। ଖେଳାଳିମାନଙ୍କ ସୁରକ୍ଷା ଦୃଷ୍ଟିରୁ ବାୟୋ-ବବଲରେ ଖେଳାଯାଉଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ମେ’ ୨୯ରେ ଶେଷ ହେଉଛି। ଲିଗ୍ ଶେଷ ହେବାପରେ ଖେଳାଳିମାନେ ଗୋଟିଏ ବାୟୋ-ବବଲରୁ ଅନ୍ୟ ଏକ ବାୟୋ-ବବଲରେ ଆବଦ୍ଧ ହୋଇ ରୁହନ୍ତୁ ବୋଲି ବିସିସିଆଇ ଚାହୁନାହିଁ। ବର୍ତ୍ତମାନ ଭଳି କୋଭିଡ୍ ଯଦି ନିୟନ୍ତ୍ରଣରେ ରୁହେ ତେବେ ଦକ୍ଷିଣ ଆଫ୍ରିକା ବିପକ୍ଷ ଘରୋଇ ସିରିଜରେ କଠୋର କ୍ୱାରାଣ୍ଟାଇନ କିମ୍ବା ବାୟୋ-ବବଲ ରହିବ ନାହିଁ ବୋଲି ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି। ପରେ ଆମେ ଆୟର୍ଲାଣ୍ଡ ଓ ଇଂଲଣ୍ଡ ଯିବୁ ଏହି ଦେଶଗୁଡ଼ିକରେ ବର୍ତ୍ତମାନ ବାୟୋ-ବବଲକୁ ବାଦ୍ ଦିଆଯାଇଛି। ଦୀର୍ଘ ଦିନ ଧରି ବାୟୋ-ବବଲରେ ସୀମିତ ଅଞ୍ଚଳ ମଧ୍ୟରେ ଆବଦ୍ଧ ରହିବା ଦ୍ୱାରା ଏହା ଖେଳାଳିମାନଙ୍କ ମାନସିକ ସ୍ବାସ୍ଥ୍ୟ ଉପରେ କୁପ୍ରଭାବ ପକାଉଛି। ଏ ବିଷୟରେ ବୋର୍ଡ ସଚେତନ ବୋଲି ବରିଷ୍ଠ ଅଧିକାରୀ ଜଣକ କହିଛନ୍ତି।