ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ସରସଦା ପଞ୍ଚାୟତ ତୁଳସୀପୁର ଗ୍ରାମର ୩୩ ବର୍ଷ ବୟସ୍କ ମହେଶ୍ୱର ସାମଲ ଓରଫ ଟୁନା (ବାପା-ସ୍ବର୍ଗତ କୈଳାଶ ଚନ୍ଦ୍ର ସାମଲ, ମା-ଶାନ୍ତିଲତା ସାମଲ, ମୋ : ୮୮୪୭୮୬୬୮୨୯)। କରୋନା ମହାମାରୀ ସମୟରେ ତାଙ୍କୁ ଏକ ନୂଆ ବାଟ ଦେଖାଇଥିଲା ବାୟୋ ଫ୍ଲକ୍ (କୁଣ୍ଡ ପ୍ରଣାଳୀ ମାଛ ଚାଷ)। ଘରେ ପାଞ୍ଚ ପ୍ରାଣୀ କୁଟୁମ୍ବ। ଏପଟେ ଯେଉଁ କାମରୁ ସେ କିଛି ରୋଜଗାର କରୁଥିଲେ କରୋନା ପାଇଁ ତାହା ବନ୍ଦ ହୋଇଗଲା। କିପରି ପରିବାର ଚଳାଇବେ ସେହି ଚିନ୍ତା ତାଙ୍କୁ ଘାରିଲା। ଏହି ସମୟରେ କୁଣ୍ଡ ପ୍ରଣାଳୀ ମାଛ ଚାଷ କରିବାକୁ ମନସ୍ଥ କରିଥିଲେ। ଏ ସମ୍ପର୍କରେ ମହେଶ୍ୱର କହନ୍ତି, ‘ଯୁକ୍ତ ଦୁଇ ପରେ ୨୦୦୭ରେ ହାଇଦ୍ରାବାଦ ପଳାଇଥିଲି। ସେଠାରେ ଏକ କମ୍ପାନୀରେ ରହି ରାସ୍ତା ଢଳେଇ କାମରେ ବ୍ୟବହୃତ ମିକ୍ସର ଗାଡି ଚଲାଇ ଯାହା ରୋଜଗାର କରୁଥିଲି ସେଥିରେ ଯେନତେନ ପରିବାର ଚଳୁଥିଲା। ୨୦୧୭ରେ ଭୁବନେଶ୍ୱର ଆସି ସେହି କାମ ଚାଲୁ ରଖିଲି। ହେଲେ କରୋନା ଯୋଗୁ ସବୁ କାମ ବନ୍ଦ ହୋଇଯିବା ପରେ ବାଧ୍ୟ ହୋଇ ନିଜ ଗ୍ରାମକୁ ଫେରିଆସିଥିଲି। ଭୁବନେଶ୍ୱରରେ ଥିବା ବେଳେ ୟୁଟ୍ୟୁବ୍ରେ ବାୟୋ ଫ୍ଲକ ସମ୍ପର୍କରେ ଦେଖି କିଛି ଜ୍ଞାନ ହାସଲ କରିଥିଲି। ତା’ସହ ଭୁବନେଶ୍ୱରସ୍ଥିତ ଯାଆଁଳାରେ ଥିବା ଚନ୍ଦ୍ରଶେଖର ଆଚାର୍ଯ୍ୟଙ୍କ ଫାର୍ମ ହାଉସ ବୁଲି ବାୟୋ ଫ୍ଲକ ସମ୍ପର୍କରେ ତାଙ୍କ ପାଖରୁ ତାଲିମ ନେଇଥିଲି। ଏହି ଚାଷ ପାଇଁ ବର୍ତ୍ତମାନ ସୁଦ୍ଧା ପ୍ରାୟ ୨ ଲକ୍ଷ ଟଙ୍କା ଖର୍ଚ୍ଚ କରିସାରିଲିଣି।’ ନିଜକୁ ଏଥିନେଇ ପ୍ରସ୍ତୁତ ହେବା ପରେ ସେ କୋଲକାତା ଯାଇ ବାୟୋ ଫ୍ଲକ୍ ପାଇଁ ଆବଶ୍ୟକ ସମସ୍ତ ସରଞ୍ଜାମ କିଣିଥିଲେ। ପ୍ରଥମେ ଦୁଇଟି କୁଣ୍ଡ କରି ଆରମ୍ଭ କଲେ ଏହି ପ୍ରଣାଳୀରେ ମାଛ ଚାଷ। ଏଥିରେ ସଫଳତା ହାସଲ ପରେ ବର୍ତ୍ତମାନ ଚାରିଟା କୁଣ୍ଡରେ ଏହି ଚାଷ ଚାଲିଛି। ଦଶ ହଜାର ଲିଟରବିଶିଷ୍ଟ କୁଣ୍ଡ ତିଆରି ହୋଇଛି। ଏହି କୁଣ୍ଡରେ ଭିଏତନାମା କଉ, ରୂପଚାନ୍ଦି, ତେଲଟିଆ, ରୋହୀ, ଭାକୁର, ମୀରଆଦି ମାଛ ଚାଷ କରୁଛନ୍ତି। ବଜାରରେ କଉ ମାଛ ୩୦୦ ଟଙ୍କାରେ ବିକ୍ରି ହେଉଥିବା ବେଳେ ଆଧୁନିକ ପ୍ରଣାଳୀରେ ମହେଶ୍ୱର ମାଛ ଚାଷ କରି ୨୦୦ ଟଙ୍କାରେ ବିକ୍ରି କରୁଛନ୍ତି। ଅନ୍ୟ ମାଛ ୧୨୦ଟଙ୍କା, ୯୦ ଟଙ୍କା ଓ ୮୦ ଟଙ୍କାରେ ବିକ୍ରି କରୁଛନ୍ତି। ଏହି ଚାଷ କରି ନିଜେ ସ୍ବାବଲମ୍ବୀ ହେବା ସହ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି ମହେଶ୍ୱର। ଏହି ଚାଷ ପାଇଁ ତାଙ୍କୁ ସହଯୋଗ କରୁଛନ୍ତି ଦାଦା କୈଳାସ ସାମଲ ଓ ଭାଇ ଜୀବନଜ୍ୟୋତି ଏବଂ ଦୀପକ। ମହେଶ୍ୱର କୁଣ୍ଡ ଚାଷ ନିକଟରେ ଥିବା ଚାଷ ଜମିକୁ ପୋତି କୁଣ୍ଡ ଚାଷ ବଢାଇବାକୁ ଇଚ୍ଛା କରୁଥିଲେ ମଧ୍ୟ ଅଧିକ ଅର୍ଥର ଆବଶ୍ୟକତା ଥିବା ପ୍ରକାଶ କରିଛନ୍ତି। ଆବଶ୍ୟକ ସରକାରୀ ସହଯୋଗ ମହେଶ୍ୱରଙ୍କୁ ମିଳିଲେ କୁଣ୍ଡ ପ୍ରଣାଳୀରେ ମାଛ ଚାଷ କରି ଅଞ୍ଚଳରେ ରହିଥିବା ମାଛ ଚାହିଦାକୁ ଅନେକାଂଶରେ ପୂରଣ କରିପାରିବେ ବୋଲି ଆଶା ରଖିଛନ୍ତି ଏହି ସଫଳ ଚାଷୀ।
-ଦେବେନ୍ଦ୍ର ଆନ୍ଦିଆ