ଭୁବନେଶ୍ୱର, ୧୬।୧୧ (ବ୍ୟୁରୋ): ପୁଣି ଝୁଲିଲା ବହୁ ପ୍ରତୀକ୍ଷିତ ଭୁଆସୁଣୀ ବାୟୋମାଇନିଂ ପ୍ରକଳ୍ପ। ବିଏମ୍ସି ଅଳିଆ ଗାଡ଼ି ଧକ୍କାରେ ଦାରୁଠେଙ୍ଗ ଗ୍ରାମର ଦୁଇଜଣଙ୍କ ମୃତ୍ୟୁ ପରେ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି। ଫଳରେ ଭୁଆସୁଣୀ ଡମ୍ପିଂୟାର୍ଡରେ ବାୟୋମାଇନିଂ ପ୍ରକଳ୍ପ କରାଇ ଦେବେ ନାହିଁ ବୋଲି ଗ୍ରାମବାସୀ ଜିଦ୍ ଧରି ବସିଛନ୍ତି। ଏହା ଭିତରେ ସେମାନଙ୍କୁ ମନାଇବାକୁ ଚେଷ୍ଟା କରି ବିଏମ୍ସି ଫେଲ୍ ମାରିଥିବାବେଳେ ଗ୍ରାମବାସୀ ନିଜ ଭିତରେ ଆଲୋଚନା କରି ଫଳାଫଳ ଜଣାଇବେ ବୋଲି କହିଛନ୍ତି। ତେଣୁ ଏବେ ଗ୍ରାମବାସୀଙ୍କ ନିଷ୍ପତ୍ତିକୁ ଚାହିଁ ବସିଛି ବିଏମ୍ସି। ଯଦି ପୂର୍ବଥର ଭଳି ଏଥର ଗ୍ରାମବାସୀ ନିଜ ଜିଦ୍ରେ ଅଟଳ ରୁହନ୍ତି ତେବେ ବିଏମ୍ସି ପୁଣି ଥରେ ହରଡ଼ଘଣାରେ ପଡ଼ିବା ଏକପ୍ରକାର ନିଶ୍ଚିତ ହୋଇଯାଇଛି। ଗତଥର ବିଏମ୍ସି ଅଳିଆ ଗାଡ଼ି ଧକ୍କାରେ ଯୁବକଙ୍କ ମୃତ୍ୟୁ ପରେ ଗ୍ରାମବାସୀ ବାୟୋମାଇନିଂ କରାଇ ଦେବେନାହିଁ ବୋଲି ରୋକଠୋକ ମନା କରି ଦେଇଥିଲେ। ଯେତେ ବୁଝାଇଥିଲେ ମଧ୍ୟ ସେମାନେ ବୁଝି ନ ଥିଲେ। ଶେଷରେ ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକରେ ସମାଧାନ ହୋଇଥିଲା। ମାତ୍ର ୨ମାସ ଭିତରେ ପୁନର୍ବାର ଅଳିଆ ଗାଡ଼ି ଧକ୍କାରେ ଆଉ ଜଣେ ବ୍ୟକ୍ତିଙ୍କ ମୃତ୍ୟୁ ପରେ ଗ୍ରାମବାସୀ ଉତ୍ତ୍ୟକ୍ତ ହୋଇଥିଲେ। ପୁନର୍ବାର ଯେପରି ସେମାନେ ଅଳିଆ ପକାଇବା କିମ୍ବା ପ୍ରକଳ୍ପକୁ ବିରୋଧ ନ କରିବେ ସେଥିପାଇଁ ସଙ୍ଗେସଙ୍ଗେ ବିଏମ୍ସି ପକ୍ଷରୁ ସମ୍ପୃକ୍ତ ବ୍ୟକ୍ତିଙ୍କ ପରିବାରକୁ ୫ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରାଯାଇଥିଲା। ଏଥିସହ ପରିବାରର ଜଣଙ୍କୁ ଚାକିରି ଦେବା ପାଇଁ ପ୍ରତିଶ୍ରୁତି ଦିଆଯାଇଥିଲା। ତଥାପି ଗ୍ରାମବାସୀ ଏକ ସପ୍ତାହ ଧରି ଅଳିଆ ପକାଇବାକୁ ଦେଇ ନ ଥିଲେ। ପରେ ସେମାନଙ୍କ ସହ ଆଲୋଚନା କରି ଆବଶ୍ୟକ ପଦକ୍ଷେପ ନେଇ ଅଳିଆ ପକା ଆରମ୍ଭ ହୋଇଛି। ଗ୍ରାମବାସୀ ଏଥର ସହଜରେ ମାନି ଯାଇଥିବାରୁ ପ୍ରକଳ୍ପ କାମରେ କୌଣସି ସମସ୍ୟା ହେବନାହିଁ ବୋଲି ବିଏମ୍ସି ଆଶା କରିଥିଲା ମାତ୍ର ଗ୍ରାମବାସୀ ପ୍ରକଳ୍ପ କାର୍ଯ୍ୟ କରାଇ ଦେବେ ନାହିଁ ବୋଲି ଅଡ଼ି ବସିଛନ୍ତି। ତେଣୁ ସେମାନଙ୍କୁ ପୁଣି କିପରି ବୁଝାଶୁଝା କରାଯିବ ତାହା ଚିନ୍ତାର କାରଣ ପାଲଟିଛି।
ସୂଚନାଯୋଗ୍ୟ, ପ୍ରକଳ୍ପ ପାଇଁ ଚିହ୍ନଟ ହୋଇଥିବା ସ୍ଥାନରେ ବିଏମ୍ସି ସଫେଇ କାର୍ଯ୍ୟ ଆରମ୍ଭ କରିଥିଲା। ଏହାପରେ ପାଚେରି ବୁଲାଇବା ଏବଂ ମେଶିନ୍ ଇନ୍ଷ୍ଟାଲେସନ୍ କାର୍ଯ୍ୟ ଆରମ୍ଭ ହେବାର ଥିଲା। ଆସନ୍ତା ଜାନୁୟାରୀ କିମ୍ବା ଫେବୃୟାରୀ ସୁଦ୍ଧା ମେସିନ୍ ଇନଷ୍ଟାଲେସନ୍ କାମ ସରିବା ପରେ ବାୟୋମାଇନିଂ କାମ ଆରମ୍ଭ ହେବ ବୋଲି ସୂଚନା ଦିଆଯାଇଥିଲା।