ମୁମ୍ବାଇ,୪ ।୭: ବଲିଉଡ୍ର ବେଶ ନାଁ କରା କୋରିଓଗ୍ରାଫର ସରୋଜ ଖାଁଙ୍କ ପ୍ରଥମ ଶ୍ରାଦ୍ଧ ବାର୍ଷିକୀ ଶନିବାର ପାଳନ କରାଯାଇଛି । ଏହି ଅବସରରେ ଆଗାମୀ ଦିନରେ ସରୋଜଙ୍କ ଜବନିକୁ ନେଇ ଏକ ବାୟୋପିକ୍ ନିର୍ମାଣ କରାଯିବ ବୋଲି ସୂଚନା ମିଳିଛି । ସରୋଜ ଦେଶର ପ୍ରଥମ ମହିଳା କୋରିଓଗ୍ରାଫର ଭାବେ ବେଶ୍ ଜଣାଶୁଣା । ତେବେ କିଏ ଓ କେବେ ଏହି ବାୟୋପିକ୍ ନିର୍ମାଣ କରିବେ ତାହା ସ୍ପଷ୍ଟ ହୋଇ ନାହିଁ । ସରୋଜଙ୍କ ଝିଅ ସୁକୌନା ଖାଁ କହିଛନ୍ତି, ମୋ ମାଆଙ୍କୁ ବଲିଉଡ ଇଣ୍ଡଷ୍ଟ୍ରି ସମ୍ପୂର୍ଣ୍ଣ ସ୍ନେହ ଓ ସମ୍ମାନ ଦେଉଥିଲା । ହେଲେ ଆମେ ତାଙ୍କ ସଂଘର୍ଷକୁ ଅତି ନିକଟରୁ ଦେଖିଛୁ । ଏହି ବାୟୋପିକ୍ ମାଧ୍ୟରେ ଆମ ପାଇଁ ତାଙ୍କର ଥିବା ଭଲପାଇବା, ନୃତ୍ୟ ପାଇଁ ତାଙ୍କର ଆକର୍ଷଣ, ଅଭିନେତାଙ୍କ ପ୍ରତି ଥିବା ସ୍ନେହ ଓ ନିଜ ପେଶାକୁ ଦେଉଥିବା ସମ୍ମାନ ସହଜରେ ବାରିହୋଇ ପଡିବ । ଏବେ ସରୋଜଙ୍କ ପୁଅ ରାଜୁ ଖାଁ ବି ଜଣେ କୋରିଓଗ୍ରାଫର । ସୂଚନାଯୋଗ୍ୟ ଗତବର୍ଷ ୭୧ ବର୍ଷ ବୟସରେ ସରୋଜଙ୍କର ହୃଦଘାତରେ ମୃତ୍ୟୁ ହୋଇଥିଲା ।