ଭୁବନେଶ୍ୱର,୬ା୩ (ବ୍ୟୁରୋ):ଆଧୁନିକ ଜୀବନଶୈଳୀର ଦୈନନ୍ଦିନ କାର୍ଯ୍ୟରେ ପ୍ଲାଷ୍ଟିକ ପଦାର୍ଥର ବହୁଳ ବ୍ୟବହାର ହେଉଛି। ମାତ୍ର ଏସବୁ ପଦାର୍ଥର ନକାରାତ୍ମକ ଦିଗ ପ୍ରତି ସାଧାରଣ ଲୋକେ ବିଶେଷ ଅବଗତ ନ ଥିବାରୁ ସଚେତନତା ବୃଦ୍ଧିର ଯଥେଷ୍ଟ ଆବଶ୍ୟକତା ରହିଛି। ଅଶୋଧିତ ତୈଳ, ପ୍ରାକୃତିକ ଗ୍ୟାସ କିମ୍ବା କୋଇଲା ପରି ଜୀବାଶ୍ମ ଇନ୍ଧନରୁ ସଂଶ୍ଲେଷିତ ପ୍ଲାଷ୍ଟିକ ଉତ୍ପାଦିତ ହେଉଥିବାରୁ ଏହାର ପ୍ରସ୍ତୁତି ଓ ବିଘଟନରେ ଅଙ୍ଗାରକାମ୍ଳ ଏବଂ ମିଥେନ ପରି ସବୁଜଗୃହ ବାଷ୍ପ ନିର୍ଗମନ ହୋଇ ବିଶ୍ୱ ତାପମାତ୍ରା ବୃଦ୍ଧିର କାରଣ ହେଉଛି। ସେହିପରି ବ୍ୟବହାର ପରେ ପରିବେଶକୁ ବର୍ଜ୍ୟ ରୂପେ ନିଷ୍କାସିତ ହେଉଥିବାରୁ ଏହା ପ୍ରଦୂଷଣ ଘଟାଇ ବିଭିନ୍ନ ସମସ୍ୟା ସୃଷ୍ଟି କରୁଛି। ତେଣୁ ଏଥିରୁ ଦୂରେଇ ରହିବା ଆବଶ୍ୟକ। ତେଣୁ ଏହି ପ୍ଲାଷ୍ଟିକ ବିପଦରୁ ରକ୍ଷା କରିବା ଜୈବ ପ୍ଲାଷ୍ଟିକର ଗୁରୁତ୍ୱ ବଢ଼ିଛି। ଜୈବିକ ଉତ୍ସରୁ ସୃଷ୍ଟ ପ୍ଲାଷ୍ଟିକ ନବୀକରଣ ଯୋଗ୍ୟ ପଦାର୍ଥରୁ ଆସିଥାଏ, ଯାହା ମୁଖ୍ୟତଃ ଉଦ୍ଭିଦଜାତ। ଏସବୁ ଅବକ୍ଷୟଯୋଗ୍ୟ ହୋଇଥିବାରୁ ବୀଜାଣୁଙ୍କ ଦ୍ୱାରା ବିଘଟନରେ ମାଟିରେ ମିଶିଯିବ ଓ ଏଥିରୁ ପ୍ରଦୂଷଣ ସୃଷ୍ଟି ହେବ ନାହିଁ। ତେଣୁ ସଂଶ୍ଲେଷିତ ପ୍ଲାଷ୍ଟିକର ବିକଳ୍ପ ଭାବେ ଜୈବପ୍ଲାଷ୍ଟିକ ନୂତନ ସମ୍ଭାବନା ସୃଷ୍ଟି କରିଛି ବୋଲି ପରିବେଶ ବିଶେଷଜ୍ଞମାନେ ମତପୋଷଣ କରିଛନ୍ତି।
ରବିବାର ଓଡ଼ିଶା ପରିବେଶ ସମିତି (ଓଇଏସ) ପକ୍ଷରୁ ‘ସବୁଜ କମ୍ପୋଜିଟ-ପ୍ଲାଷ୍ଟିକ ବିପଦର ସମାଧାନ’ ଶୀର୍ଷକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। ଉତ୍କଳ ବିଶ୍ୱବିଦ୍ୟାଳୟ ଉଦ୍ଭିଦ ବିଜ୍ଞାନ ବିଭାଗ ମୁଖ୍ୟ ଡ. ଚିନ୍ମୟ ପ୍ରଧାନ ମୁଖ୍ୟବକ୍ତା ଭାବେ ଯୋଗଦେଇ, ଉଦ୍ଭିଦରୁ ଉପଲବ୍ଧ ସବୁଜ କମ୍ପୋଜିଟ୍ଗୁଡିକ ଜୈବପ୍ଲାଷ୍ଟିକ ପ୍ରସ୍ତୁତିରେ କିପରି ବ୍ୟବହାର କରାଯାଉଛି ତାହା ବର୍ଣ୍ଣନା କରିଥିଲେ। ଏଥିସହ ସେ ପିତା ତରଡ଼ା ଫଳରୁ ପ୍ରସ୍ତୁତ ସେଲୁଲୋଜ୍ ତନ୍ତୁ ଉପରେ କରୁଥିବା ଗବେଷଣାରେ ଜୈବପ୍ଲାଷ୍ଟିକ ତିଆରି ବିଷୟରେ ବିବରଣୀ ପ୍ରଦାନ କରିଥିଲେ। ଶିଳ୍ପ ପଦାର୍ଥ, କୃଷି ଓ ଖାଦ୍ୟ ପଦାର୍ଥ, କ୍ୟାଟରିଂ, ଔଷଧ ଓ ଚିକିତ୍ସା ଉପକରଣ ଏବଂ ମନୋରଞ୍ଜନ ପଦାର୍ଥ ସବୁର ବାହ୍ୟ ଆବରଣ ବା ପ୍ୟାକେଜିଂ ଏବେ ଜୈବପ୍ଲାଷ୍ଟିକରୁ ପ୍ରସ୍ତୁତ ହେବା ସମ୍ଭବ ହେଲାଣି। ତେଣୁ ସଂଶ୍ଲେଷିତ ପ୍ଲାଷ୍ଟିକ୍ ବ୍ୟବହାରରୁ ଦୂରେଇ ରହିବା ଆବଶ୍ୟକ ବୋଲି ଡ. ପ୍ରଧାନ ପରାମର୍ଶ ଦେଇଥିଲେ। ପୂର୍ବତନ ପିସିସିଏଫ ଡ. ବିଜୟ କେତନ ପଟ୍ଟନାୟକ ପୌରୋହିତ୍ୟ କରି କହିଲେ, ପ୍ରାକୃତିକ ଉତ୍ସରୁ ଜୈବପ୍ଲାଷ୍ଟିକ ପ୍ରସ୍ତୁତି ନିମନ୍ତେ ଅନୁସନ୍ଧାନ କରାଯିବା ସହ ପ୍ଲାଷ୍ଟିକର ଅପବ୍ୟବହାରକୁ ରୋକିବା ପାଇଁ ଅଧିକ ସଚେତନତା ସୃଷ୍ଟି କରାଯିବା ଆବଶ୍ୟକ। ସମିତି ସମ୍ପାଦକ ଡ. ଜୟକୃଷ୍ଣ ପାଣିଗ୍ରାହୀ ସ୍ବାଗତ ଭାଷଣ ଦେଇ, ପ୍ଲାଷ୍ଟିକ୍ର ବିନାଶକାରୀ ପ୍ରଭାବରୁ ବର୍ତ୍ତିବା ପାଇଁ ଆମ ମାନସିକତାରେ ପରିବର୍ତ୍ତନ କରିବା ଆବଶ୍ୟକ ବୋଲି କହିଥିଲେ। ଉପସଭାପତି ଡ. ଲାଲା ଏକେ ସିଂହ ଅତିଥି ପରିଚୟ ପ୍ରଦାନ କରିଥିବାବେଳେ ସଦସ୍ୟ ଇଂ. ବିମଳ ପ୍ରସାଦ ମିଶ୍ର ଧନ୍ୟବାଦ ଅର୍ପଣ କରିଥିଲେ।