ଅଗରତାଲା,୧୫ ।୨: ତିପୁରା ମୁଖ୍ୟମନ୍ତ୍ରୀ ବିପ୍ଳବ ଦେବ ପୁଣିଥରେ ନିଜର ଅଜବ ଦାବିକୁ ନେଇ ଆସିଛନ୍ତି ଚର୍ଚ୍ଚାକୁ । ଅଗରତାଲାରେ ଆୟୋଜିତ ଏକ କାର୍ଯ୍ୟକ୍ରମରେ ସେ କହିଛନ୍ତି ଭାରତୀୟ ଜନତା ପାର୍ଟି(ଭାଜପା)କେବଳ ଦେଶ ନୁହେଁ ପଡୋଶୀ ଦେଶରେ ବି ନିଜ ଦଳର ବିସ୍ତାର କରିବା ଯୋଜନାରେ ରହିଛି । ସେ କହିଛନ୍ତି ଭାଜପା ଶ୍ରୀଲଙ୍କା ଓ ନେପାଳରେ ଦଳର ବିସ୍ତାର କରିବା ଯୋଜନାରେ ରହିଛି । ଯେତେବେଳେ ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହା ଭାଜପାର ରାଷ୍ଟ୍ରୀୟ ଅଧ୍ୟକ୍ଷ ଥିଲେ ସେତେବେଳେ ସେ କହିଥିଲେ କି ତାଙ୍କର ଯୋଜନା ରହିଛି ନେପାଳ ଓ ଶ୍ରୀଲଙ୍କାରେ ଭାଜପା ସରକାର ଗଠନ କରିବା । ମୁଖ୍ୟମନ୍ତ୍ରୀ ବିପ୍ଳବ ଦେବ ୨୦୧୮ରେ ଅମିତ ଶାହାଙ୍କ ସହ ହୋଇଥିବା କଥାବାର୍ତ୍ତା ବେଳେ ସେ ଏମିତି କହିଥିବା ପ୍ରକାଶ କରିଛନ୍ତି । ସେତେବେଳେ ଦଳର ଏକ ବୈଠକରେ ଶାହା କହିଥିଲେ ଭାଜପା ଯେତେବେଳେ ଦେଶର ସବୁ ରାଜ୍ୟରେ ସରକାର ଗଠନ କରିଦେବ ସେତେବେଳେ ତା’ର ଟାର୍ଗେଟ ହେବ ନେପାଳ ଓ ଶ୍ରୀଲଙ୍କା । ଅତିଥି ଗୃହରେ ହୋଇଥିବା ଏକ ବୈଠକରେ ଶାହା ଏହା ପ୍ରକାଶ କରିଥିବା ଦାବି କରିଛନ୍ତି ବିପ୍ଳବ ।
