ଝାରସୁଗୁଡ଼ା ଅଫିସ,୧୦।୧: ପ୍ରତିବର୍ଷ ଶୀତଋତୁରେ ହୀରାକୁଦ ଜଳଭଣ୍ଡାରକୁ ବିଭିନ୍ନ ପ୍ରଜାତିର ବିଦେଶାଗତ ପକ୍ଷୀ ଆସିଥାନ୍ତି। ବନ୍ୟପ୍ରାଣୀ ବିଭାଗ ତରଫରୁ ବିଧିବଦ୍ଧ ଭାବେ ଏହାର ଗଣନା କରାଯାଇଥାଏ। ଚଳିତବର୍ଷ ହୀରାକୁଦ ବନ୍ୟପ୍ରାଣୀ ଡିଭିଜନ ତରଫରୁ ଏହି ଗଣନା କରାଯାଇଛି। ୧୫ସେକ୍ଟରରେ ବିଭକ୍ତ କରାଯାଇ ପ୍ରତି ସେକ୍ଟରରେ ୨ବିଶେଷଜ୍ଞ ଦଳ ନିୟୋଜିତ ହୋଇଥିଲେ। ଏଥିରେ ସମୁଦାୟ ୩୮ଗୋଟି ଡଙ୍ଗା ନିୟୋଜିତ ହୋଇଥିବାବେଳେ ୬୦ରୁ ଊର୍ଦ୍ଧ୍ୱ ଗଣନାକାରୀ ସାମିଲ ହୋଇଥିଲେ। ଝାରସୁଗୁଡା ଫରେଷ୍ଟ ଡିଭିଜନ ଅଧୀନରେ ୪ ସେକ୍ଟର ରହିଥିଲା। ହୀରାକୁଦ ଜଳଭଣ୍ଡାରର ଝରାପଡା ଅଞ୍ଚଳକୁ ୭ନଂ ସେକ୍ଟର, ବୃହତ୍ ଅଞ୍ଚଳ ରମ୍ପାଲୁଗାର ୮ନଂ ଓ ୯ନଂ ସେକ୍ଟର, ତିଲିଆ ଗୁଜାପାହାଡ ୧୦ନଂ ସେକ୍ଟର ହିସାବରେ ନିଆଯାଇଥିଲା। ସକାଳ ସାଢେ ୬ଟାରୁ ଅପରାହ୍ନ ୫ଟା ପର୍ଯ୍ୟନ୍ତ ଏହା ଚାଲିଥିଲା। ଡିଏଫ୍ଓ ଲଳିତ ପାତ୍ରଙ୍କ ତତ୍ତ୍ୱାବଧାନରେ ଗଣନା ହୋଇଥିବାବେଳେ ଏସିଏଫ୍ ସସ୍ମିତା ସାହୁ, ଏସିଏଫ୍(ଏଏଫ୍ଏସ୍) ଅଶୋକ ମନୁଭଟ୍ଟ, ରେଞ୍ଜର ସୁବାସ ମହାପାତ୍ର ଏହାର ତଦାରଖ କରିଥିଲେ। ୭ନଂ ସେକ୍ଟରରେ ବନ୍ୟପ୍ରାଣୀ ବିଶେଷଜ୍ଞ ଡ. ଚିତ୍ରସେନ ସେଠୀ, ସିଦ୍ଧାର୍ଥ ସାହୁ, ଫରେଷ୍ଟର ପ୍ରଶାନ୍ତ କୁମାର ବାଗ୍, ସୁନିଲ କୁମାର ନାୟକ, ୮ନଂ ସେକ୍ଟରରେ ବିଶେଷଜ୍ଞ ଶୁଭମ ରାଉତ, ଗୌରବ ପତି, ଫରେଷ୍ଟର ଗୌରାଙ୍ଗ ସାହୁ, ଫରେଷ୍ଟଗାର୍ଡ ସୁରେଶ କୁମାର ତରେଇ, ଜେଏନ୍ ଖୁଣ୍ଟିଆ ପ୍ରମୁଖ ରହିଥିଲେ। ରମ୍ପାଲୁଗା ୯ନଂ ସେକ୍ଟରରେ ଡ. ପ୍ରକାଶ ଚନ୍ଦ୍ର ଜେନା, ଇଞ୍ଜିନିୟର ସଞ୍ଜୀବ କୁମାର ପରିଜା, ଫରେଷ୍ଟର ପ୍ରଦୀପ କୁମାର ନାୟକ, ବିକ୍ରମାଦିତ୍ୟ ବେହେରା ଓ ୧୦ନଂ ସେକ୍ଟରରେ ବିଶେଷଜ୍ଞ ଆଶିଷ କୁମାର ଶୁକ୍ଳା, ଫରେଷ୍ଟର ଅରକ୍ଷିତ ପ୍ରଧାନ, ଫରେଷ୍ଟଗାର୍ଡ କାଜଳ ଶର୍ମା, ମନୋଜ ଗଣ୍ଡ ପ୍ରମୁଖ ସାମିଲ ହୋଇଥିଲେ। ଏହାର ଫଳାଫଳ ମଙ୍ଗଳବାର ପ୍ରକାଶ ପାଇବ।