ଇମ୍ଫାଲ,୧୮।୪ : ମଣିପୁରରେ ଭାଜପା ସରକାରଙ୍କ ସଙ୍କଟ ବଢ଼ିବାରେ ଲାଗିଛି। ଜଣେ ପରେ ଜଣେ ଦଳୀୟ ବିଧାୟକଙ୍କ ଇସ୍ତଫା ପରେ ବର୍ତ୍ତମାନ ଅସନ୍ତୁଷ୍ଟ ବିଧାୟକଙ୍କ ଦଳ ଦିଲ୍ଲୀ ଆଡକୁ ମୁହାଁଇଛନ୍ତି। ସେମାନେ ଭାଜପାର କେନ୍ଦ୍ରୀୟ ନେତାମାନଙ୍କୁ ଭେଟିବା ପାଇଁ ଡେରା ପକାଇଛନ୍ତି। ବିଧାୟକଙ୍କ ଏହି ଆଭିମୁଖ୍ୟକୁ ଦେଖିଲେ ମୁଖ୍ୟମନ୍ତ୍ରୀ ଏନ ବିରେନ ସିଂଙ୍କ ସରକାରଙ୍କ ସହିତ ସେମାନଙ୍କର ମତଭେଦ ପଦାରେ ପଡ଼ିଛି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ଏନେଇ ଦଳର ଜଣେ ପ୍ରତିଷ୍ଠିତ ନେତା ସୋସିଆଲ ମିଡିଆରେ ମଧ୍ୟ ପୋଷ୍ଟ କରିଛନ୍ତି। ଏଥିରେ ଦର୍ଶାଯାଇଛି, ଅଭିଯୋଗ କରିବା କିମ୍ବା ବିବାଦକୁ ଦଳୀୟ କର୍ତ୍ତୃପକ୍ଷଙ୍କ ନିକଟକୁ ନେଇଯିବା ଅନୁଶାସନହୀନତା ନୁହେଁ।
ଦଳର କାର୍ଯ୍ୟକର୍ତ୍ତାଙ୍କ ଅନୁଯାୟୀ ମଣିପୁରର ଚାରିଜଣ ଭାଜପା ବିଧାୟକ କେନ୍ଦ୍ରୀୟ ନେତାଙ୍କୁ ଭେଟିବା ପାଇଁ ଦିଲ୍ଲୀରେ ପହଞ୍ଚିଛନ୍ତି। ବିଧାୟକମାନଙ୍କ ମଧ୍ୟରେ ଉରିପୋକ ବିଧାୟକ ଖ୍ବାଇରକପମ ରଘୁମଣି ସିଂ ମଧ୍ୟ ଅଛନ୍ତି। ବିଧାୟକଙ୍କ ଏହି କାର୍ଯ୍ୟ ସମ୍ପର୍କରେ ଦଳର ଅନ୍ୟ ଜଣେ ବିଧାୟକ ଆର.କେ ଇମୋ ସିଂ କହିଛନ୍ତି, ଆମେ ସମସ୍ତେ ଏକ ରାଜନୈତିକ ଦଳର ଏକ ନିର୍ଦ୍ଦିଷ୍ଟ ଆଦର୍ଶ ଏବଂ ଏହାର ସମ୍ବିଧାନ ଦ୍ୱାରା ବନ୍ଧା। ବିଧାୟକ ଭାବରେ, ସରକାର ତଥା ଦଳର କାର୍ଯ୍ୟକ୍ରମ ଏବଂ ନିଷ୍ପତ୍ତି ଅନୁଯାୟୀ କାର୍ଯ୍ୟ କରିବା ଆମର କର୍ତ୍ତବ୍ୟ। ଏ ବିଷୟରେ କେହି ଅଭିଯୋଗ କରିପାରିବେ, କିନ୍ତୁ ବିବାଦକୁ ଗଣମାଧ୍ୟମକୁ ନେଇପାରିବେ ନାହିଁ ।
ମଣିପୁରରେ ବିଧାୟକମାନଙ୍କ ମଧ୍ୟରେ ଅସନ୍ତୋଷ ଅନେକ ଦିନ ଧରି ଚାଲିଆସୁଛି। ଦିଲ୍ଲୀ ଯିବାର ଗୋଟିଏ ଦିନ ପୂର୍ବରୁ ଲଙ୍ଗଥବଲ ନିର୍ବାଚନମଣ୍ଡଳୀର ଭାଜପା ବିଧାୟକ କରମ ଶ୍ୟାମ ପର୍ଯ୍ୟଟନ ନିଗମ ମଣିପୁର ଲିମିଟେଡର ଅଧ୍ୟକ୍ଷ ପଦରୁ ଇସ୍ତଫା ଦେଇଛନ୍ତି। ସେ ତାଙ୍କ ଇସ୍ତଫା ପତ୍ରରେ କହିଛନ୍ତି, ତାଙ୍କୁ ଅଧ୍ୟକ୍ଷ ଭାବରେ କୌଣସି ଦାୟିତ୍ୱ ଦିଆଯାଇ ନାହିଁ। ତାଙ୍କର ଏହି ଚିଠି ଭାଇରାଲ ହେବାରେ ଲାଗିଛି। ଏହାପୂର୍ବରୁ, ଏପ୍ରିଲ ୮ ରେ, ହିରୋକ ନିର୍ବାଚନମଣ୍ଡଳୀର ବିଧାୟକ ଥୋକଚୋମ ରାଧେଶ୍ୟାମ ମଧ୍ୟ ସମାନ ଅଭିଯୋଗ ଦର୍ଶାଇ ମୁଖ୍ୟମନ୍ତ୍ରୀଙ୍କ ଉପଦେଷ୍ଟା ପଦରୁ ଇସ୍ତଫା ଦେଇଥିଲେ। ଏହା ମଧ୍ୟ କୁହାଯାଉଛି, ଅସନ୍ତୁଷ୍ଟ ବିଧାୟକଙ୍କ ସହିତ କୁକି ଜନଜାତିର କେତେକ ଭାଜପା ବିଧାୟକ ମଧ୍ୟ ଜାତୀୟ ରାଜଧାନୀରେ ଡେରା ପକାଇଛନ୍ତି। ମଣିପୁର ବିଧାନସଭାରେ କୁକି ଜନଜାତିର ଦଶ ଜଣ ବିଧାୟକ ଅଛନ୍ତି। ସେମାନଙ୍କ ମଧ୍ୟରୁ ୭ଜଣ ଭାଜପା ବିଧାୟକ।
କୁହାଯାଉଛି ଅସନ୍ତୁଷ୍ଟ ବିଧାୟକମାନେ ମୁଖ୍ୟମନ୍ତ୍ରୀ ବିରେନଙ୍କୁ ବଦଳାଇବା ଦାବି ନେଇ କେନ୍ଦ୍ରୀୟ ନେତାମାନଙ୍କ ଦିଲ୍ଲୀ ଯାଇଛନ୍ତି। ଭାଜପା ସୂତ୍ରରୁ ପ୍ରକାଶ, ବିରେନ ସିଂ କିମ୍ବା ତୁରନ୍ତ କ୍ୟାବିନେଟରେ ପରିବର୍ତ୍ତନ ପାଇଁ ଦାବି ତୀବ୍ର ହେବାରେ ଲାଗିଛି। ତେବେ ଏନେଇ ରାଜ୍ୟ ଭାଜପା ୟୁନିଟ କିମ୍ବା ମୁଖ୍ୟମନ୍ତ୍ରୀ ଏନ ବିରେନ ସିଂଙ୍କ ତରଫରୁ କୌଣସି ପ୍ରତିକ୍ରିୟା ମିଳିନାହିଁ।