ସୁନ୍ଦରଗଡ,୨।୧୧(ଡି.ଏନ୍.ଏ)-୨୫ବର୍ଷ ଧରି ନିଖୋଜ ଥିବା ସୁନ୍ଦରଗଡ ଜିଲା କୁତ୍ରା ବ୍ଲକ କଟଙ୍ଗ ଜଙ୍ଗାଟୋଲିର ବିରଜୁ କୁଲୁ ପାକିସ୍ତାନ ଜେଲରେ ୨୦ବର୍ଷ ଧରି ସଜା କାଟି ସାରିବା ପରେ ଏବେ ନିଜ ଦେଶ ଭାରତକୁ ପ୍ରତ୍ୟାବର୍ତ୍ତନ କରିଛନ୍ତି। ପାକିସ୍ତାନ ସରକାର ତାଙ୍କୁ ଅନ୍ୟ ୪ଜଣ ଭାରତୀୟ ବନ୍ଦୀଙ୍କ ସହ ଗତ ୨୬ ତାରିଖରେ ଓ୍ବାଘା ସୀମାରେ ଭାରତ ସରକାରଙ୍କୁ ହସ୍ତାନ୍ତର କରିଛନ୍ତି। ଏହା ପରେ ତାଙ୍କୁ ଏବେ ପଞ୍ଜାବ ଅମୃତସରର ଏକ କୋଭିଡ ହସ୍ପିଟାଲରେ ରଖାଯାଇଛି। କୋଭିଡ ନିୟମାନୁଯାୟୀ ସେଠାରେ ତାଙ୍କର ପରୀକ୍ଷା କରାଯିବ। କ୍ୱାରାଣ୍ଟାଇନ୍ ଅବଧି ଶେଷ ହେବା ପରେ ସୁନ୍ଦରଗଡ ଜିଲା ପ୍ରଶାସନ ସହାୟତାରେ ତାଙ୍କ ନିଜ ଗ୍ରାମକୁ ପହଞ୍ଚାଇବାର ବ୍ୟବସ୍ଥା କରାଯାଇଛି। ଦିଲ୍ଲୀ ରେସିଡେନସ କମିଶନର ସୁନ୍ଦରଗଡ ଜିଲା ପ୍ରଶାସନଙ୍କୁ ଏସମ୍ପର୍କରେ ଅବଗତ କରିବା ପରେ କୁତ୍ରା ପୋଲିସ ତାଙ୍କ ସମ୍ପର୍କରେ ଅନୁସନ୍ଧାନ କରି ତାଙ୍କ ପରିବାର ଲୋକଙ୍କ ସହିତ ଯୋଗାଯୋଗ କରିଥିଲେ।
ବିରଜୁ ଗତ ୨୫ବର୍ଷ ପୂର୍ବେ ଯୁବକବେଳେ ରାଞ୍ଚିର ଏକ ହୋଟେଲରେ କାର୍ଯ୍ୟ କରୁଥିଲେ। ହେଲେ କିଛିଦିନ ପରେ ତାଙ୍କର ପରିବାର ସହିତ କୌଣସି ଯୋଗାଯୋଗ ନ ଥିଲା। ତାଙ୍କର ସେତେବେଳେ ମାନସିକ ସ୍ଥିତି ଠିକ୍ ନ ଥିବାରୁ ସେ କୁଆଡେ ନିଖୋଜ ହୋଇଯାଇଥିବା ସନ୍ଦେହ କରି ପରିବାର ଲୋକେ ବହୁ ଖୋଜାଖୋଜି ପରେ ନୀରବ ରହିଥିଲେ। ସେତେବେଳେ ମାନସିକ ସ୍ଥିତି ଠିକ୍ ନ ଥିବା ବିରଜୁ ଭୁଲବଶତଃ ପାକିସ୍ତାନ ସୀମାକୁ ଚାଲି ଯାଇଥିଲେ। ସେଠାରେ ତାଙ୍କୁ ପାକିସ୍ତାନ ସରକାର ୨୦ବର୍ଷ ଜେଲ ଦଣ୍ଡାଦେଶ ଦେଇଥିଲେ। ଫଳରେ ବିରଜୁଙ୍କୁ ପାକିସ୍ତାନର ଲାହୋର ଜେଲରେ ୨୦ବର୍ଷ ସଜା କାଟିବାକୁ ପଡିଥିଲା। ସଜା ସରିବା ପରେ ସେଠାକାର ସରକାର ତାଙ୍କୁ ଭାରତ ସରକାରଙ୍କୁ ହସ୍ତାନ୍ତର କରିବା ପରେ ସେ ଏବେ ନିଜ ଗ୍ରାମକୁ ଫେରୁଥିବା ନେଇ ତାଙ୍କର ପରିବାର ତଥା ଗ୍ରାମବାସୀଙ୍କ ମଧ୍ୟରେ ଖୁସିର ଲହରି ଖେଳିଯାଇଛି । ଗତ ୨୫ବର୍ଷ ମଧ୍ୟରେ ବିରଜୁଙ୍କ ମା’ ବେଲାବେଥ କୁଲୁ ଓ ବାପା କାମିଲ୍ କୁଲୁ ଆରପାରିକୁ ଚାଲିଯାଇଥିବା ବେଳେ ଏକମାତ୍ର ଭଉଣୀ ଟିନା କୁଲୁ ରାଜଗାଙ୍ଗପୁର କୁକୁଡା ଗ୍ରାମରେ ରହୁଛନ୍ତି। ଭାଇଙ୍କ ଫେରିବା ନେଇ ସେ ବିଶେଷ ଖୁସିବ୍ୟକ୍ତ କରିଥିବା ବେଳେ ତାଙ୍କ ଫେରିବା ବାଟକୁ ସମସ୍ତେ ଉତ୍ସୁକତାର ସହ ଅନେଇ ବସିଛନ୍ତି ବୋଲି କହିଛନ୍ତି।