ଅମରପାଲି,୧୫।୮(ଡି.ଏନ୍.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅଧ୍ୟକ୍ଷ ସନ୍ତୋଷ କୁମାର ଭୋଇ ରବିବାର ଇସ୍ତଫା ଦେଇଛନ୍ତି। ସ୍ବାଧୀନତା ଦିବସ ପାଳନ ଅବସରରେ ଏକ ହୋଟେଲରେ ଅନୁଷ୍ଠିତ ଖବରଦାତା ସମ୍ମିଳନୀରେ ସନ୍ତୋଷ ଏହି ଘୋଷଣା କରିଛନ୍ତି। ବ୍ୟକ୍ତିଗତ ଓ ଘରୋଇ କାରଣ ଯୋଗୁ ବ୍ଲକ ଅଧ୍ୟକ୍ଷ ପଦ ଛାଡିଥିବା ସେ ପ୍ରକାଶ କରିଛନ୍ତି ।
ସୂଚନା ଯୋଗ୍ୟ, ବୀରମହାରାଜପୁର ବ୍ଲକ ଅଧ୍ୟକ୍ଷ ଭାବେ ପଞ୍ଚାୟତ ସମିତି କାର୍ଯ୍ୟାଳୟରେ ସେ ପତାକା ଉତ୍ତୋଳନ କରିଥିଲେ। ଏପର କି ଭାଜପା ଯୁବମୋର୍ଚ୍ଚା ସଭାପତି ଭାବେ ସ୍ବାଧୀନତା ଦିବସ ଅବସରରେ ସେ ଗଣଦୌଡ କାର୍ଯ୍ୟକ୍ରମ ଆୟୋଜନ କରାଇଥିଲେ। ଏହି ସମସ୍ତ କାର୍ଯ୍ୟ ସାରି ହଠାତ୍ ଏକ ଖବରଦାତା ସମ୍ମିଳନୀ କରି ବୀରମହାରାଜପୁର ବ୍ଲକ ଅଧ୍ୟକ୍ଷ ପଦବୀରୁ ସେ ଇସ୍ତଫା ଦେବା ସମସ୍ତଙ୍କୁ ଚକିତ କରିଛି। ଭାଜପା ତାଙ୍କୁ ଜିଲା ଯୁବ ମୋର୍ଚ୍ଚା ସଭାପତି ଭାବରେ ଗୁରୁଦାୟିତ୍ୱ ଦେଇଥିବାରୁ ଦଳର ଜଣେ ସୃଙ୍ଖଳିତ ସଦସ୍ୟ ଭାବେ ଜିଲା ଓ ରାଜ୍ୟ ପଦାଧିକାରୀଙ୍କୁ ସାକ୍ଷାତ କରି ମତାମତ ଜଣାଇବି ବୋଲି ସେ କହିଛନ୍ତି । ଏହା ସହିତ ଆଗାମୀ ତ୍ରିସ୍ତରୀୟ ପଞ୍ଚାୟତିରାଜ ନିର୍ବାଚନରେ କୌଣସି ପଦ ପାଇଁ ପ୍ରଦିଦ୍ବନ୍ଦିତା କରିବେ ନାହିଁ ବୋଲି ସେ କହିଛନ୍ତି।