ଢେଙ୍କାନାଳ ଅଫିସ, ୭।୩(ରତନ ନାୟାର): ଢେଙ୍କାନାଳ ଜିଲା କଙ୍କଡ଼ାହାଡ଼ ବ୍ଲକର ବୀରାଶାଳ ଏୟାରଷ୍ଟ୍ରିପ୍କୁ ମିଳିଛି ନୂଆ ପରିଚୟ। ବିଜୁ ପଟ୍ଟନାୟକ ଏରୋସ୍ପେସ୍ ଏକାଡେମୀ ଭାବେ ଏହାର ନାମକରଣ କରାଯାଇଛି। ଏହାକୁ ବିଶ୍ୱସ୍ତରୀୟ ପାଇଲଟ୍ ଟ୍ରେନିଂ ସେଣ୍ଟରରେ ପରିଣତ କରାଯିବା ପାଇଁ ରାଜ୍ୟ ସରକାର ନିଷ୍ପତ୍ତି ନେଇଥିବାବେଳେ ସାମଗ୍ରିକ ବିକାଶ ପାଇଁ ପ୍ରଥମ ପର୍ଯ୍ୟାୟରେ ୨୭୫ କୋଟି ଟଙ୍କାର ପ୍ରାବଧାନ କରିଛନ୍ତି। ବିଜୁବାବୁଙ୍କ ସ୍ମୃତି ସହିତ ଜଡ଼ିତ ବୀରାଶାଳ ଏୟାରଷ୍ଟ୍ରିପ୍ ଦୀର୍ଘଦିନ ଧରି ଅବହେଳିତ ଅବସ୍ଥାରେ ରହିଥିବା ବେଳେ ଏହାର ନବକଳେବର ଜିଲାର ସାମାଜିକ, ସାଂସ୍କୃତିକ ଏବଂ ଅର୍ଥନୈତିକ କ୍ଷେତ୍ରରେ ଅଭୂତପୂର୍ବ ପରିବର୍ତ୍ତନ ଆଣିବ ବୋଲି ଆଶା କରାଯାଉଛି।
ବିଜୁ ପଟ୍ଟନାୟକ ଏରୋସ୍ପେସ୍ ଏକାଡେମୀରେ ବିମାନ ଉଡ଼ାଣ ପ୍ରଶିକ୍ଷଣ ଦିଆଯାଉଛି। ଏହାର ପରିଚାଳନା କରୁଛି ଗଭର୍ନମେଣ୍ଟ ଆଭିଏଶନ ଟ୍ରେନିଂ ଇନ୍ଷ୍ଟିଚ୍ୟୁଟ୍ (ଜିଏଟିଆଇ)। ହେଲେ ହାତଗଣତି ପ୍ରଶିକ୍ଷାର୍ଥୀଙ୍କୁ ପ୍ରଶିକ୍ଷଣ ଦିଆଯିବା ସୁବିଧା ରହିଥିବାବେଳେ ବହୁ ଆଶାୟୀ ଏଥିରୁ ବଞ୍ଚତ୍ତ ହେଉଛନ୍ତି। ଏହାର କଳେବର ବୃଦ୍ଧି ପରେ ଏଠାରେ ଏକକାଳୀନ ୫୦୦ ଜଣଙ୍କୁ ପ୍ରଶିକ୍ଷଣ ଦିଆଯାଇପାରିବ। ଏଥିଲାଗି ୧୮୮.୭୭ ଏକର ଜମି ଅଧିଗ୍ରହଣ ପ୍ରକ୍ରିୟା ଆରମ୍ଭ ହୋଇଛି। ବିଜୁ ପଟ୍ଟନାୟକ ଏରୋସ୍ପେସ୍ ଏକାଡେମୀ କାର୍ଯ୍ୟକ୍ଷମ ହେଲେ ବୀରାଶାଳ ସାରା ଭାରତବର୍ଷକୁ ଉଚ୍ଚ ପ୍ରଶିକ୍ଷିତ ପାଇଲଟ ଯୋଗାଇବ ବୋଲି ରାଜ୍ୟ ସରକାର ଦୃଢ଼ୋକ୍ତି ପ୍ରକାଶ କରିଛନ୍ତି।
୨୦୧୯ରେ ବୀରାଶାଳରେ ଆରମ୍ଭ ହୋଇଥିଲା ବିମାନ ଉଡ଼ାଣ ପ୍ରଶିକ୍ଷଣ କେନ୍ଦ୍ର। ଏବେ ଏଠାରେ ଦିଲ୍ଲୀ, ମହାରାଷ୍ଟ୍ର, ପଶ୍ଚିମବଙ୍ଗ, ବିହାର, ରାଜସ୍ଥାନ, ପଞ୍ଜାବ, ଉତ୍ତରପ୍ରଦେଶ, କର୍ନାଟକ, ଓଡ଼ିଶାର ୩୩ ଜଣ ଛାତ୍ରୀଛାତ୍ର ତାଲିମ ନେଉଛନ୍ତି। ତନ୍ମଧ୍ୟରେ ରହିଛନ୍ତି ୪ ଓଡ଼ିଆ। ଖୁବ୍ଶୀଘ୍ର ଆଉ ୪୦ ଜଣଙ୍କ ପ୍ରଶିକ୍ଷଣ ନେବା ବ୍ୟବସ୍ଥା କରାଯିବ। ତେବେ ପ୍ରଶିକ୍ଷାର୍ଥୀଙ୍କ ପାଇଁ ରହିବା ମୁଖ୍ୟ ସମସ୍ୟା ହୋଇଛି। ଆବଶ୍ୟକ ସଂଖ୍ୟକ ବାସଗୃହ ନ ଥିବାରୁ ସେମାନଙ୍କୁ ନିକଟବର୍ତ୍ତୀ ଅଞ୍ଚଳର ଭଡ଼ାଘରେ ରହିବାକୁ ପଡୁଛି। ତେଣୁ ହଷ୍ଟେଲ ନିର୍ମାଣ ହେବା ଯାଏ କାମାକ୍ଷାନଗରସ୍ଥିତ ରେଙ୍ଗାଳି ବାମ କେନାଲ କଲୋନୀ ପରିସରରେ ଖାଲିପଡ଼ିଥିବା କ୍ୱାର୍ଟର୍ସଗୁଡ଼ିକୁ ଏଥିଲାଗି ବ୍ୟବହାର କରାଯିବାକୁ ନିଷ୍ପତ୍ତି ହୋଇଛି। ଏ ନେଇ ରାଜ୍ୟ ଖଣି ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ ଢେଙ୍କାନାଳ ଜିଲାପାଳ ସରୋଜ କୁମାର ସେଠୀ, ଉପଜିଲାପାଳ ଜ୍ୟୋତିଶଙ୍କର ସାହୁଙ୍କ ଉପସ୍ଥିତିରେ ବିଭାଗୀୟ ଅଧୀକ୍ଷଣ ଯନ୍ତ୍ରୀ, ନିର୍ବାହୀ ଯନ୍ତ୍ରୀଙ୍କ ସହ ଆଲୋଚନା କରିଛନ୍ତି। ସେହିପରି ଜିଲାପାଳ ମଧ୍ୟ କେନ୍ଦ୍ର ପରିଦର୍ଶନ କରି ଭିତ୍ତିଭୂମିର ସମୀକ୍ଷା କରିଛନ୍ତି।
ଅନୁରୂପ ଭାବେ ୪,୦୦୦ ଫୁଟ ଦୀର୍ଘ ରନ୍ଓ୍ବେ ଏବଂ ୮୦ ଫୁଟ ପ୍ରସ୍ଥ ବିଶିଷ୍ଟ ପ୍ରଶିକ୍ଷଣ କେନ୍ଦ୍ରର ଅନ୍ୟତମ ଗୁରୁତ୍ୱପୂର୍ଣ୍ଣ ୟୁନିଟ୍ ଟ୍ରାଫିକ୍ କଣ୍ଟ୍ରୋଲ୍ ଟାଓ୍ବାରକୁ ନେଇ ଏବେ ଅଡୁଆ ବଢ଼ିଛି। ଠିକ୍ ଭାବେ ତିଆରି କରାଯାଇ ନ ଥିବାରୁ ଏହାକୁ ଭଙ୍ଗାଯିବ। ପ୍ରଶିକ୍ଷାର୍ଥୀଙ୍କ ସୁବିଧା ଅନୁଯାୟୀ ଏହାର ସ୍ଥାନ ପରିବର୍ତ୍ତନ କରି ଆଉ ଥରେ ନିର୍ମାଣ କରାଯିବ। ଏଥିସହ ବିମାନ ଚଳାଚଳରେ ପ୍ରତିବନ୍ଧକ ସୃଷ୍ଟି କରୁଥିବା ଶାଳଗଛଗୁଡ଼ିକୁ କଟାଯିବ। ନିରବଚ୍ଛିନ୍ନ ବିଦ୍ୟୁତ୍ ସରବରାହ ଲାଗି ସ୍ବତନ୍ତ୍ର ବିଦ୍ୟୁତ୍ ଷ୍ଟେଶନ ନିର୍ମାଣ ହେବ। ପାନୀୟ ଜଳ, କ୍ୟାଣ୍ଟିନ୍ ସମେତ ଅତ୍ୟାଧୁନିକ ଜିମ୍ ବ୍ୟବସ୍ଥା ହେବ। ଏହାର ଭିତ୍ତିଭୂମି ବିକାଶ ପାଇଁ ଜମି ଅଧିଗ୍ରହଣ ପ୍ରକ୍ରିୟା ଆରମ୍ଭ ହୋଇଛି ବୋଲି ଜିଲାପାଳ ସୂଚନା ଦେଇଛନ୍ତି।
ପ୍ରଶିକ୍ଷାର୍ଥୀଙ୍କ ମୁହଁରୁ…
ଉଦ୍ୟମ ସ୍ବାଗତଯୋଗ୍ୟ
ପ୍ରଶିକ୍ଷଣ କେନ୍ଦ୍ରକୁ ଅତ୍ୟାଧୁନିକ କରିବା ପାଇଁ ସମସ୍ତ ପ୍ରକାର କାର୍ଯ୍ୟ ଚାଲିଛି। ବୀରାଶାଳ ହେଉଛି ବିମାନ ଉଡ଼ାଣ ପ୍ରଶିକ୍ଷଣ ପାଇଁ ପ୍ରକୃଷ୍ଟ ସ୍ଥାନ। ଏହାକୁ ଅଧିକ ବିକଶିତ ପାଇଁ ରାଜ୍ୟ ସରକାରଙ୍କ ପକ୍ଷରୁ ହେଉଥିବା ଉଦ୍ୟମ ସ୍ବାଗତଯୋଗ୍ୟ।
-ପୃଥ୍ବୀରାଜ ପ୍ରଧାନ
ପ୍ରଶିକ୍ଷଣ ଉଚ୍ଚକୋଟୀର
ପିଲାଟି ଦିନରୁ ପାଇଲଟ ହେବା ଇଚ୍ଛା ଥିଲା। ଏଠାରେ ମାସେ ହେଲା ପ୍ରଶିକ୍ଷଣ ନେଉଛି। ପିଲାମାନଙ୍କ ରହିବା ପାଇଁ ହଷ୍ଟେଲ ଆବଶ୍ୟକ ଅଛି। ଏଠାକାର ପ୍ରଶିକ୍ଷକ ଏବଂ ସେମାନଙ୍କ ପ୍ରଶିକ୍ଷଣ ଅତି ଉଚ୍ଚକୋଟୀର।
-ଅନୀଷା
ଆଦିବାସୀ ପିଲାଙ୍କ କ୍ୟାରିୟର କାଉନ୍ସେଲିଂ କରାଯିବ
ବୀରାଶାଳ ଏୟାରଷ୍ଟ୍ରିପ୍ର ବିକାଶ ପାଇଁ ସ୍ବପ୍ନ ଦେଖିଥିଲେ ବିଜୁବାବୁ। ସେ ଚାହୁଁଥିଲେ ଦେଶର ପ୍ରତିଭାବାନ ଯୁବତୀଯୁବକ ଓଡ଼ିଶା ମାଟିରେ ତାଲିମ ନେଇ ଭଲ ପାଇଲଟ ହୁଅନ୍ତୁ। ଦେଶ ପାଇଁ କାମ କରନ୍ତୁ। ଏଠାରେ ୫୦୦ ଛାତ୍ରୀଛାତ୍ରଙ୍କୁ ତାଲିମ ଦେବା ପାଇଁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯାଇଥିଲା। ବିଜୁ ପଟ୍ଟନାୟକ ଏରୋସ୍ପେସ୍ ଏକାଡେମୀର ସାମଗ୍ରିକ ବିକାଶ ପାଇଁ ରାଜ୍ୟ ସରକାର ୨୭୫ କୋଟି ଟଙ୍କା ଦେଇଛନ୍ତି। ଏଥିଲାଗି ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜ୍ଞାପନ କରୁଛୁ। ଏହି ଅର୍ଥରେ ବିଭିନ୍ନ ବିକାଶମୂଳକ କାର୍ଯ୍ୟ ହେବ। ହଷ୍ଟେଲ ନିର୍ମାଣ ସମେତ ଅନ୍ୟାନ୍ୟ ଅତ୍ୟାବଶ୍ୟକ ସୁବିଧା କରାଯିବ। ଆଦିବାସୀ ଅଞ୍ଚଳର ପ୍ରତିଭାବାନ ଛାତ୍ରୀଛାତ୍ରଙ୍କୁ ବିମାନ ଉଡ଼ାଣ ଶିଖାଇବା ପାଇଁ କ୍ୟାରିୟର କାଉନ୍ସେଲିଂ କରାଯିବ। ଏବେ ଯଦି ଆମେ ଦେଶକୁ ୧୦ ପାଇଲଟ୍ ଦେଉଛୁ, ଆଗାମୀ ଦିନରେ ଏହି ସଂଖ୍ୟା ନିଶ୍ଚିତ ଭାବେ ୨୦୦ ହେବ।
-ଲ୍ୟୁଟନାଣ୍ଟ କଲୋନେଲ ସୋନାଲି ରଥ, ପ୍ରଶିକ୍ଷଣ କେନ୍ଦ୍ର ଇନଚାର୍ଜ