ଭୁବନେଶ୍ୱର,୨୭ା୫: ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ସ୍ବାସ୍ଥ୍ୟ ସୂଚନା ଓ ସ୍ବାସ୍ଥ୍ୟ ପରିସଂଖ୍ୟାନ ନିର୍ଦ୍ଦେଶାଳୟ ଓ ୟୁନିସେଫ୍ ଆନୁକୂଲ୍ୟରେ ଏକ ଦୁଇଦିନିଆ ତାଲିମ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ପ୍ରଥମ ଦିବସରେ ସ୍ବାସ୍ଥ୍ୟ ଓ ପରିବାର କଲ୍ୟାଣ ପ୍ରତିଷ୍ଠାନର ନିର୍ଦ୍ଦେଶକ ଡା. ଅମରେନ୍ଦ୍ର ମହାନ୍ତି ଯୋଗଦେଇ ଜନ୍ମମୃତ୍ୟୁ ପଞ୍ଜୀକରଣ ସହ ଆହୁରି ଅନେକ ସ୍ବାସ୍ଥ୍ୟ ସମ୍ବନ୍ଧୀୟ ପରିସଂଖ୍ୟାନ କାର୍ଯ୍ୟ କରୁଥିବା ପରିସଂଖ୍ୟାନ କର୍ମଚାରୀମାନଙ୍କୁ ସେମାନଙ୍କ ଦାୟିତ୍ୱ ଓ କାର୍ଯ୍ୟ ସମ୍ପର୍କରେ ଅବଗତ କରାଇଥିଲେ। ରାଜ୍ୟ ସେବିକା ନିର୍ଦ୍ଦେଶିକା ଡା. ସଂଯୁକ୍ତା ସାହୁ ଏହି କ୍ଷେତ୍ରରେ ସେବିକା, ନର୍ସିଂ ଅଧିକାରୀ ଓ ଗୋଷ୍ଠୀ ସ୍ବାସ୍ଥ୍ୟ ଅଧିକାରିଣୀ (ସିଏଚ୍ଓ) ମାନଙ୍କ ଯୋଗଦାନ ଏବଂ କାର୍ଯ୍ୟ ବିଷୟରେ ଆଲୋକପାତ କରିଥିଲେ। ରାଜ୍ୟ ସ୍ବାସ୍ଥ୍ୟ ସୂଚନା ଓ ପରିସଂଖ୍ୟାନ ନିର୍ଦ୍ଦେଶକ ଡା. ରାମଚନ୍ଦ୍ର ରାଉତ ଏହି ତାଲିମର ଉଦ୍ଦେଶ୍ୟ, କାର୍ଯ୍ୟକାରିତା, ସାମାଜିକ ପ୍ରତିବଦ୍ଧତା ଉପରେ ଦିଗ୍ଦର୍ଶନ ପ୍ରଦାନ କରିଥିଲେ। ଅନ୍ୟମାନଙ୍କ ମଧ୍ୟରେ ଅତିରିକ୍ତ ନିର୍ଦ୍ଦେଶକ ଡା. ଅଜିତ୍ କୁମାର ଦଳେଇ, ଅତିରିକ୍ତ ନିର୍ଦ୍ଦେଶିକା ଡା. ପୁଷ୍ପିତା ମହାନ୍ତି ଓ ୟୁନିସେଫ୍ର ପରାମର୍ଶଦାତା ଅପରାଜିତ୍ ସିହ୍ନା ପ୍ରମୁଖ ଯୋଗ ଦେଇ ତାଲିମ ପ୍ରଦାନ ପୂର୍ବକ ପରିଚାଳନାରେ ସାହାଯ୍ୟ କରିଥିଲେ।
୨୦୨୧ ଜାନୁଆରୀ ୧ଠାରୁ ରାଜ୍ୟରେ ପ୍ରଥମଥର ପାଇଁ ସମ୍ପୂର୍ଣ୍ଣ ଅନ୍ଲାଇନ ମାଧ୍ୟମରେ ଜନ୍ମମୃତ୍ୟୁ ପଞ୍ଜୀକରଣ ସହ ସାର୍ଟିଫିକେଟ ପ୍ରଦାନ କରାଯାଉଛି।